ក្រសួងវប្បធម៌ និងវិចិត្រសិល្បៈ បានសម្រេចប្រគល់សិទ្ធិអោយក្រុមស្រាវជ្រាវដំណើរខ្មែរ ផលិតឡើងវិញនូវចម្រៀងចំនួន១៥បទ ដែលបានវិនាសបាត់បង់ ដើម្បីទុកជាប្រយោជន៍ជាតិទាំងមូល
រាជធានីភ្នំពេញ ៖ ក្រសួងវប្បធម៌ និងវិចិត្រសិល្បៈ បានសម្រេចប្រគល់សិទ្ធិអោយក្រុមស្រាវជ្រាវដំណើរខ្មែរ ផលិតឡើងវិញនូវចម្រៀងចំនួន១៥បទ ដែលបានវិនាសបាត់បង់ ដើម្បីទុកជាប្រយោជន៍ជាតិទាំងមូល។
ប្រធានក្រុមដំណើរខ្មែរ លោក វីរ: វ៉ារ៉ានី បានលើកឡើងថា «លោកពិតជារំភើប និងអរគុណដល់ក្រសួងវប្បធម៌ និងវិចិត្រសិល្បៈ បានអនុញ្ញាតផ្តល់សិទ្ធិចម្រៀងគ្មានមរតកសាស្ត្រចំនួន១៥បទ ដល់ខ្ញុំបាទ ដើម្បីផលិតឡើងវិញ និងផ្សព្វផ្សាយក្នុងបណ្តេញសង្គមយូធូប និងហ្វេសប៊ុក»។
លោកបញ្ជាក់ថា «នេះជាជំហានមួយ នៃគ្រោងផែនការរបស់ក្រុមដំណើរខ្មែរ ក្នុងការលើកស្ទួយទ្រទ្រង់វិស័យសិល្បៈខ្មែរ»។ លោកថា «ចម្រៀងទាំង១៥បទនេះ បានវិនាសបាត់បង់ទៅហើយ នៅសល់តែស្លាកស្នាមអនុស្សាវរីយ៍នៃការចងចាំដ៏មានតម្លៃ កាត់ថ្លៃពុំបាន ហេតុនេះហើយ បានជាជំរុញចិត្តខ្ញុំអោយផលិតចម្រៀងទាំងនេះឡើងវិញ ដើម្បីឧត្តមប្រយោជន៍ប្រជាជាតិយើងទាំងមូល»។
បើតាមលោក វីរៈ វ៉ារ៉ានី ថា «បទចម្រៀងទាំងអស់នេះ ក្រុមដំណើរខ្មែរបានចំណាយពេលស្រាវជ្រាវលំអិតលើបទនីមួយៗ ដើម្បីយកមកផលិតឡើងវិញ កុំអោយប្រាសចាកខ្លាំងពីច្បាប់ដើម បើទោះបីជាបទចម្រៀងទាំងនោះ បានបាត់បង់អស់ទៅហើយក្តី»។ លោកបន្ថែមថា «ចម្រៀងទាំង១៥បទ នៃគម្រោងដំបូងនេះ មាន៧បទ ជាបទទាក់ទងនឹងទីតាំងភូមិសាស្ត្រ និង៨បទទៀត ជាចម្រៀងដកស្រង់ចេញពីខ្សែភាពយន្ត»។
យ៉ាងណា លោកបានថ្លែងអំណរគុណដល់ភាគីពាក់ព័ន្ធ រួមមាន លោក ស៊ឹម សត្តា ប្រធាននាយកដ្ឋានកម្មសិទ្ធិបញ្ញា និងសិទ្ធិប្រហាក់ប្រហែល ដែលបានជួយគាំទ្រការងារនេះ ហើយលោកក៏អរគុណដល់សមាជិក សមាជិកា ក្នុងក្រុមដំណើរខ្មែរទាំងអស់ ដែលបានជួយ និងកំពុងជួយផលិតចម្រៀងនេះឡើយវិញ។ លោកបញ្ជាក់បន្ថែមថា «ជំហានដំបូង ពួកយើងផលិតជាសំឡេងសិន បន្ទាប់មកពួកយើងនឹងផលិតជាវីដេអូចម្រៀងទៅតាមអត្ថន័យនៃចម្រៀងទាំងនោះ»៕
ចែករំលែកព័តមាននេះ