ត្បូងឃ្មុំ៖ សហគមន៍ខ្មែរឥស្លាម ជាគោលដៅទេសចរណ៍ដ៏ទាក់ទាញមួយ ដែលបម្រើដល់វិស័យទេសចរណ៍ ជាពិសេសប្រភេទនៃទេសចរណ៍មូស្លីម។ នេះបើតាមមន្ត្រីជាន់ខ្ពស់ក្រសួងទេសចរណ៍។ នៅព្រឹកថ្ងៃទី០២ ខែមិថុនា ឆ្នាំ២០២៣ លោក…
ត្បូងឃ្មុំ៖ សហគមន៍ខ្មែរឥស្លាម ជាគោលដៅទេសចរណ៍ដ៏ទាក់ទាញមួយ ដែលបម្រើដល់វិស័យទេសចរណ៍ ជាពិសេសប្រភេទនៃទេសចរណ៍មូស្លីម។ នេះបើតាមមន្ត្រីជាន់ខ្ពស់ក្រសួងទេសចរណ៍។
នៅព្រឹកថ្ងៃទី០២ ខែមិថុនា ឆ្នាំ២០២៣ លោក កាទើ មហាំម៉ាត់ណោសស្រ៊ី អនុរដ្ឋលេខាធិការ និងជាតំណាងដ៏ខ្ពង់ខ្ពស់លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានចូលរួមជាអធិបតីក្នុងពិធីដាំកូនដើមឈើ ចំនួន ៥០០០ដើម ក្រោមប្រធានបទ “យើងរួមគ្នាបង្កើតភូមិបៃតង” ដែលស្ថិតក្នុងនៅភូមិខ្ពប២ ឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ។
កម្មវិធីនេះ ក៏មានការចូលរួមពីលោក សយ ទូច អភិបាលនៃគណៈអភិបាលស្រុកក្រូចឆ្មារ និងលោក អឿន រិទ្ធ ប្រធានមន្ទីរទេសចរណ៍ ខេត្តត្បូងឃ្មុំ ផងដែរ។
គោលបំណងសំខាន់នៃកម្មវិធីនេះ គឺប្រជាសហគមន៍ភូមិខ្ពប២ ចង់ដាំដើមឈើ ដើម្បីរៀបចំសោភ័ណភាពសហគមន៍របស់ពួកគាត់ ឱ្យប្រែក្លាយជាសហគមន៍បៃតងគំរូ និងជាពិសេសឱ្យទៅជាសហគមន៍ទេសចរណ៍មូស្លីម (Muslim Community Tourism) ដែលជាគោលដៅទេសចរណ៍មួយ ជាពិសេសទេសចរមូស្លីម។ ខេត្តត្បូងឃ្មុំ ជាខេត្ត ដែលមានសក្តានុពលទេសចរណ៍ជាច្រើន ក្នុងនោះ ផលិតផលទេសចរណ៍ នៅតាមសហគមន៍ខ្មែរឥស្លាម ក៏ចាត់ទុក និងអាចរៀបចំ ដើម្បីបម្រើដល់វិស័យទេសចរណ៍ ជាពិសេសទេសចរណ៍មូស្លីម ដោយសារមានផលិតផលជាច្រើនទាំងនោះ មានប្រវត្តិ និងអាយុកាលយូរឆ្នាំមកម្ល៉េះ។
លោក កាទើ មហាំម៉ាត់ណោសស្រ៊ី បានគូសបញ្ជាក់អំពីកត្តាគន្លឹះសំខាន់នៃវិស័យទេសចរណ៍គឺសុខសន្តិភាព ស្ថិរភាពនយោបាយ ព្រោះបើគ្មានសន្តិភាពទេ ក៏គ្មានទេសចរនោះដែរ។
ក្នុងឱកាសនោះ លោក បានជម្រាបជូនអំពីស្ថានភាពទេសចរណ៍ក្នុងតំបន់ និងអន្តរជាតិផងដែរ និងជាពិសេសគោលនយោបាយថ្មីៗរបស់ក្រសួងទេសចរណ៍ ក្នុងការទាក់ទាញទេសចរណ៍មូស្លីម មកកាន់គោលដៅកម្ពុជាបន្ថែមទៀត។
លោកក៏បានផ្តាំផ្ញើរធ្វើយ៉ាងណា រៀបចំសហគមន៍ទេសចរណ៍មូស្លីម អោយមានភាពស្អាត និងបៃតង បដិសណ្ឋារកិច្ចល្អ ដើម្បីទទួលបាននូវភ្ញៀវទេសចរមកកាន់គោលដៅសហគមន៍ខ្ពប២ ឱ្យកាន់តែច្រើន និងជំរុញអោយមានយុទ្ធនាការ “ទេសចរម្នាក់ ដើមឈើមួយដើម”៕
ចែករំលែកព័តមាននេះ