រាជធានីភ្នំពេញ ៖ នៅពេលដែលនិយាយដល់តារាចម្រៀងសំឡេងផ្អែម ហ៊ុន ម៉ាលីស ប្រហែលជាប្រិយមិនទាន់ភ្លេចរូបកញ្ញានៅឡើយទេ ដោយកាលពីច្រើនឆ្នាំមុនកញ្ញាក៏ធ្លាប់ប្រឡងចម្រៀងម្តងជាពីររួចហើយ ដោយលទ្ធផលឃើញថា កញ្ញាក៏ជាបេក្ខភាពមួយរូបដែលពោរពេញដោយសមត្ថភាព និងមានសំឡេងផ្អែមស្រទន់…
រាជធានីភ្នំពេញ ៖ នៅពេលដែលនិយាយដល់តារាចម្រៀងសំឡេងផ្អែម ហ៊ុន ម៉ាលីស ប្រហែលជាប្រិយមិនទាន់ភ្លេចរូបកញ្ញានៅឡើយទេ ដោយកាលពីច្រើនឆ្នាំមុនកញ្ញាក៏ធ្លាប់ប្រឡងចម្រៀងម្តងជាពីររួចហើយ ដោយលទ្ធផលឃើញថា កញ្ញាក៏ជាបេក្ខភាពមួយរូបដែលពោរពេញដោយសមត្ថភាព និងមានសំឡេងផ្អែមស្រទន់ ដោយគណៈកម្មការសរសើរមិនដាច់ពីមាត់នោះឡើយ ។
ប្រាកដណាស់ ការពីកន្លងមក ស្រីស្រស់ ហ៊ុន ម៉ាលីស ក៏ធ្លាប់បានទម្លាយពីបញ្ហាជីវិតកម្សត់កម្ររបស់ខ្លួនជាច្រើននៅលើឆាកប្រកួត ដោយកាលពី៦ឆ្នាំ បានកន្លងផុតទៅនោះ ម៉ាលីស ធ្លាប់និយាយដោយក្តីក្តុលក្តួលថា សម្លៀកបំពាក់ដែលខ្លួនស្លៀកមក គឺខ្ចីគេ ហើយការដែលមកប្រឡងនេះក៏ជួបការខ្វះខាតជាច្រើន ទាំងការហូបចុក និងមធ្យោបាយធ្វើដំណើរ ។
ជាការពិតណាស់ ឆ្អឹងដែលកប់ក្នុងសាច់ មិនអាចមើលឃើញនោះទេ ដូចគ្នាទៅនឹងខ្សែជីវិតរបស់កញ្ញា ហ៊ុន ម៉ាលីស ដែលកញ្ញាបានឆ្លងកាត់រឿងរ៉ាវជីវិតជាច្រើន ទម្រាំកញ្ញាមានឈ្មោះបោះសំឡេងមកដល់សព្វថ្ងៃនេះ ដោយសិល្បៈជាដង្ហើមរបស់កញ្ញា ។
តាមរយៈបទសម្ភាសន៍ជាមួយកម្មវិធី 60Buzz នៃសារព័ត៌មានកោះសន្តិភាព ដោយស្រីស្រស់ ហ៊ុន ម៉ាលីស ដែលជាតារាចម្រៀងសំឡេងផ្អែមបាននិយាយថា មូលហេតុដែលខ្លួនប្រឡងម្តងទៀតនេះ ដោយយល់ថា កម្មវិធីមួយនេះល្អ ចង់ដុសខាត់សមត្ថភាពបន្ថែម ជាពិសេសចង់សម្រេចក្តីស្រម៉ៃរបស់ឯង ដោយចង់ក្លាយជាតារាចម្រៀងមួយដួង ដែលមានប្រជាប្រិយភាពមានឈ្មោះបោះសំឡេងនៅក្នុងសិល្បៈ ។
ស្រីស្រស់ ម៉ាលីស ដែលមានវ័យ ២៣ឆ្នាំ រូបនេះបានបន្តថា កាលពីឆ្នាំ២០១៥ កញ្ញាធ្លាប់ប្រឡងចម្រៀងយីកេ នៅក្នុងកម្មវិធីមរតកវប្បធម៌ខ្មែរ ។ ឆ្នាំ២០១៦ នៅក្នុងកម្មវិធី Cambodian Idol ។ ឆ្នាំ២០១៧ សំនៀងឯក និងនៅឆ្នាំ២០២៣នេះ កញ្ញាក៏បានដាក់ពាក្យប្រឡងម្តងទៀត នៅក្នុងកម្មវិធី The Voice Cambodia ដែលកញ្ញាក៏ជាបេក្ខភាពដែលមានភាពលេចធ្លោមួយរូបផងដែរ ។
កញ្ញា ម៉ាលីស ដែលធ្លាប់មានប្រវត្តិតស៊ូនៅក្នុងសិល្បៈនេះបានបន្តថា បទដែលកញ្ញាពេញចិត្តជាបទបែបមនោសញ្ចេតនាបែបស្នេហា និងបទកន្ទ្រឹមជាដើម ។ បន្ថែមពីនេះ កញ្ញាក៏អាចច្រៀងបទចម្រៀងជាភាសាចិន និងជាភាសាថៃបានខ្លះៗផងដែរ ។
បើងាកមកមើលពីជីវិតកម្សត់របស់កញ្ញាមុនប្រឡូកក្នុងសិល្បៈវិញ កញ្ញាបានរៀបរាប់ទាំងក្រៀមក្រំថា មុនពេលទៅរៀនកញ្ញាត្រូវស៊ីឈ្នួលធ្វើត្រីនៅផ្សារ ដើម្បីបានលុយទៅរៀន ហើយពេលខ្លះទៀត ជួយលក់ស្បែកជើងគេក៏មាន ។
គួរបញ្ជាក់ដែលថា សិល្បៈជាជីវិតថ្មីរបស់កញ្ញា ដោយកញ្ញាបានផ្គត់ផ្គង់គ្រួសារ ដើរតួនាទីជាបងស្រីផង ជាម្តាយផង ដើម្បីមើលថែប្អូនៗ ដោយចំណាយលើថ្លៃការសិក្សា និងមើលថែទាំម្តាយជាដើម ។
ប្រាកដណាស់ សិល្បៈអាចផ្លាស់ប្តូរជីវិតតារាស្រីរូបនេះស្ទើរតែ៣៦០ដឺក្រេ ម្ល៉េះហើយទើបបានជាកញ្ញាសាកល្បងប្រឡងចម្រៀងម្តងទៀតដូច្នេះ ។ ជាចុងក្រោយ កញ្ញា ហ៊ុន ម៉ាលីស ដែលមានជីវិតដ៏កម្សត់រូបនេះ សូមអរគុណដល់ពុកម៉ែបងប្អូនចំពោះការគាំទ្រកញ្ញា ដោយរាល់ការគាំទ្រនេះហើយ ទើបកញ្ញាមានដល់ថ្ងៃនេះ៕ ដោយ៖លីហួ គីមឆាយ
ចែករំលែកព័តមាននេះ