ជាមោទកភាពបំផុតសម្រាប់វិស័យសិល្បៈខ្មែរ ក្នុងពេលដែលតារាសម្តែងនាង ស៊ីន យូប៊ីន បានក្លាយជាតារាស្រីកម្ពុជាដំបូង និងលើកទី១ ដែលមានឱកាសបានដើរនៅលើកម្រាលព្រំក្រហមនៃកម្មវិធី មហោស្រពភាពយន្តពិភពលោក ទីក្រុង
ប្រទេសបារាំង ៖ ជាមោទកភាពបំផុតសម្រាប់វិស័យសិល្បៈខ្មែរ ក្នុងពេលដែលតារាសម្តែងនាង ស៊ីន យូប៊ីន បានក្លាយជាតារាស្រីកម្ពុជាដំបូង និងលើកទី១ ដែលមានឱកាសបានដើរនៅលើកម្រាលព្រំក្រហមនៃកម្មវិធី មហោស្រពភាពយន្តពិភពលោក ទីក្រុងកាន ប្រទេសបារាំង ដែលប្រារព្ធធ្វើឡើងកាលពីថ្ងៃទី១៧ ខែឧសភា ឆ្នាំ២០២៣។
ហើយអ្វីដែលធ្វើឲ្យមហាជន ជាពិសេសបណ្តាអ្នកគាំទ្រកាន់តែកោតសរសើរដល់តារាស្រីរូបនេះថែមទៀតនោះ គឺក្នុងពេលគេបានឃើញរូបភាព ស៊ីន យូប៊ីន តស៊ូព្យាយាមទៅចូលរួមនៅក្នុងកម្មវិធីលំដាប់ពិភពលោកមួយនេះ ទាំងខ្លួនមានស្ថានភាពមិនល្អ ពោលគឺនាងបញ្ហាជើងដែលទាមទារឲ្យនាងដើរដោយកាន់ឈើច្រត់ទាំងសងខាង។ ទោះជាមានបញ្ហាខ្លះលើរាងកាយក៏ដោយ ប៉ុន្តែតារាស្រីរូបនេះនៅតែព្យាយាម ដោយមិនអាចខកខានបានសម្រាប់កម្មវិធីលំដាប់ពិភពលោកមួយនេះឡើយ។
បើយោងតាមការបង្ហោះសារនៅលើបណ្តាញសង្គមរបស់អ្នកនាង ទូច បុប្ឋា ប្រធានផ្នែកគ្រប់គ្រងកម្មវិធីកម្សាន្តរបស់ស្ថានីយទូរទស្សន៍ភីអ៊ិនអ៊ិន បានលើកឡើងថា «តារាល្បីៗទូទាំងពិភពលោក តែងតែចង់ដើរលើកម្រាលព្រំក្រហម ក្នុងកម្មវិធី មហោស្រពភាពយន្តពិភពលោក ទីក្រុងកាន ប្រទេសបារាំង»។
អ្នកនាងបញ្ជាក់ថា «កញ្ញា ស៊ីន យូប៊ីន គឺជាតារាស្រីភីអិនអិនដំបូងគេ ដែលបានដើរលើកម្រាលព្រំក្រហម មហោស្រពភាពយន្តពិភពលោក ទីក្រុងកាន នាឆ្នាំ២០២៣នេះ គាត់មានការតាំងចិត្តខ្ពស់ តស៊ូជំនះឧបសគ្គទាំងឡាយ ដើម្បីនាំមកនូវមោទនភាពសម្រាប់សិល្បៈភាពយន្តខ្មែរ សារព័ត៌មានបារាំងជាច្រើន បានស្ងើចសរសើរនូវការលះបង់ និងការបេ្តជ្ញាចិត្តរបស់គាត់»។
ក្នុងស្ថានភាពដែលស្រីស្អាត ស៊ីន យូប៊ីន ចូលរួមទាំងកាន់ឈើច្រតបែបនេះ ត្រូវបានអ្នកនាង ទូច បុប្ឋា ដកស្រង់យកចំណុចសំខាន់ៗមួយចំនួនដែលសារព័ត៌មានបរទេសល្បីចុះផ្សាយពីតារាស្រីរូបនេះ ដោយនៅក្នុងនោះ សារព័ត៌មាន JEZEBEL បានលើកឡើងថា «ខ្ញុំមិនដឹងថាហេតុអ្វី Yubin ត្រូវការប្រើឈើច្រត់ទេ? ប៉ុន្តែព្រះជាម្ចាស់ ខ្ញុំស្រលាញ់ការប្តេជ្ញាចិត្តរបស់នាងចំពោះរូបរាងនេះ ដែលនឹងពិបាកក្នុងការផ្លាស់ទី សូម្បីតែមនុស្សដែលមានជំនាញបំផុត និងមិនមានរបួស»។
ចំណែកសារព័ត៌មានអង់គ្លេសមួយបាននិយាយដែរថា «ទោះជាយ៉ាងណាក៏ដោយ របួសរបស់ Yubin មិនបានបញ្ឈប់នាងពីការដើរនៅលើកម្រាលព្រំក្រហមនោះទេ»។
ទោះជាយ៉ាងណា មហាជន ជាពិសេសបណ្តាអ្នកគាំទ្រជាច្រើនបានសម្តែងមោទកភាព និងអបសារទរទៅកាន់ស្រីស្អាត ស៊ីន យូប៊ីន ដែលមានឱកាសដ៏កម្រនៅក្នុងការចូលរួមកម្មវិធីដ៏ធំ និងល្បីល្បាញលំដាប់ពិភពលោកមួយនេះ។ ហើយវាក៏ជាមុខមាត់មួយផងដែរ សម្រាប់វិស័យសិល្បៈ និងតារាភាពយន្តខ្មែរនៅក្នុងការផ្សព្វផ្សាយឲ្យអន្តរជាតិបានស្គាល់កាន់តែច្បាស់។
ជាការកត់សម្គាល់ នៅមុនពេលចូលរួមកម្មវិធីដ៏ធំខាងលើនេះ កន្លងមក ស៊ីន យូប៊ីន ក៏ធ្លាប់បានចូលរួមក្នុងកម្មវិធីដ៏ធំមួយឈ្មោះថា «Christian Dior haute couture spring/summer 2023» ដែលធ្វើឡើងនៅក្នុងប្រទេសបារាំងដូចគ្នា ខណៈពេលដែលកម្មវិធីមួយនេះ ក៏មានតារាល្បីៗមកពីជុំវិញពិភពលោកចូលរួមផងដែរ៕
ចែករំលែកព័តមាននេះ