ជាទូទៅ នៅក្នុងឱកាសពិធីបុណ្យចូលឆ្នាំថ្មី បងប្អូនប្រជាពលរដ្ឋខ្មែរភាគច្រើនធ្វើដំណើរទៅកាន់ស្រុកកំណើតជួបជុំក្រុមគ្រួសារ ឬក៏ធ្វើដំណើរកម្សាន្តតាមបណ្ដាខេត្តនានា ដើម្បីសម្រាកលំហែខួរក្បាល បន្ទាប់ពីសម្រាកពីការងារ។ ប៉ុន្តែយើងតែងតែ
រាជធានីភ្នំពេញ ៖ ជាទូទៅ នៅក្នុងឱកាសពិធីបុណ្យចូលឆ្នាំថ្មី បងប្អូនប្រជាពលរដ្ឋខ្មែរភាគច្រើនធ្វើដំណើរទៅកាន់ស្រុកកំណើតជួបជុំក្រុមគ្រួសារ ឬក៏ធ្វើដំណើរកម្សាន្តតាមបណ្ដាខេត្តនានា ដើម្បីសម្រាកលំហែខួរក្បាល បន្ទាប់ពីសម្រាកពីការងារ។ ប៉ុន្តែយើងតែងតែសង្កេតឃើញថា អោយតែជិតដល់ពិធីបុណ្យចូលឆ្នាំខ្មែរប្រពៃណីជាតិ រាល់សណ្ឋាគារ ផ្ទះសំណាក់ និងកន្លែងស្នាក់នៅផ្សេងៗទៀត ទទួលការកក់ស្ទើរតែទាំងអស់ ដោយការកក់ទាំងនេះ គឺតាំងតែពីមួយខែមុនឯណោះ។
ម្ល៉ោះហើយ សម្រាប់បងប្អូនដែលធ្វើដំណើរកម្សាន្តដោយឥតព្រាងទុក អាចនឹងពិបាករកកន្លែងគេង ហើយសូម្បីតែហាងលក់ម្ហូបអាហារ ឬក៏រម្មណីយដ្ឋានមួយចំនួន ដែលមានខ្យូសសម្រាប់អង្គុយលេង ក៏មានគេកក់ទុកផងដែរ។ ក្នុងនោះផងដែរ ខេត្តដែលមានអ្នកទៅកម្សាន្តច្រើនជាងគេ នោះគឺខេត្តសៀមរាបតែម្តង។
តាមសម្តីរបស់បងស្រី វល័ក្ខ ជាអ្នករស់នៅភ្នំពេញ បានអោយដឹងថា គាត់មិនមានគម្រោងដើរលេងក្នុងថ្ងៃចូលឆ្នាំនោះទេ តែដោយសារកូនៗទាមទារពេក ទើបគាត់ស្វែងរកកក់សណ្ឋាគារនៅក្នុងខេត្តសៀម ប៉ុន្តែនៅពេលដែលគាត់ call ទៅសួរនាំគេជាច្រើនកន្លែងមក គឺសុទ្ធតែពេញទាំងអស់ ដូច្នេះគាត់ប្រហែលជាមិនបាននាំក្រុមគ្រួសារទៅលេងខេត្តសៀមរាបនោះទេ មានតែនៅផ្ទះជួបជុំគ្នាធម្មតាតែប៉ុណ្ណោះ។
ចំណែកកញ្ញា មិនា ដែលជានិសិត្សមួយរូប នៅសកលវិទ្យាល័យកម្ពុជា ក៏បានអោយដឹងដែរថា កញ្ញាបានរៀបគម្រោងធ្វើដំណើរកម្សាន្តទៅខេត្តសៀមរាបតាំងពីដើមឆ្នាំមកម្ល៉េះ ដូច្នេះកញ្ញាបានកក់សណ្ឋាគារមួយកន្លែងនៅជិត Pupstreet តាំងតែពីចុងខែកុម្ភៈមកម្ល៉េះ ព្រោះកញ្ញាដឹងច្បាស់ថា បើមិនកក់មុនទេ ច្បាស់ណាស់គឺពុំមានកន្លែងគេងទេ។ ហើយបើនិយាយអំពីតម្លៃវិញ គឺនៅដដែល តែបើកន្លែងផ្សេង កញ្ញាបន្តថា មិនដឹងថាតើទ្បើងថ្លៃអត់ទេ? ព្រោះសណ្ឋាគារដែលកញ្ញាកក់ គឺដោយសាតែកញ្ញាធ្លាប់មកសា្នក់នៅម្តងរួចមកហើយ ឃើញថាសេវាកម្មល្អ ទើបសម្រេចជ្រើសរើសសណ្ឋាគារនោះម្តងទៀត។
ចំណែកលោក សុខ បញ្ហា ជាបុគ្គលិកធនាគារឯកជនមួយ បានអោយដឹងថា លោកមានគម្រោងទៅលេងខេត្តសៀមរាបដែរ ប៉ុន្តែដោយសារលោកដឹងថា មានមនុស្សបុកទៅច្រើនពេក ខ្លាចមិនសប្បាយដូចការគិត ទើបលោកសម្រេចទៅលេងខេត្តព្រះសីហនុវិញ។ ដោយលោកគិតថា តាំងពីមានផ្លូវល្បឿនលឿនមក គឺលោកងាយស្រួលធ្វើដំណើរ ចង់ទៅវិលល្ងាចក៏បាន ណាមួយជិះតែមួយភ្លែតដល់ មិនយូរដូចទៅសៀមរាម តែលោកមិនច្បាស់ថា ដល់ថ្ងៃនោះ អាចនឹងជួបបញ្ហាស្ទះផ្លូវ ឬក៏ទំនិញទ្បើងថ្លៃដែរឬអត់ទេ? ព្រោះកន្លងមក មិនចំថ្ងៃបុណ្យទានផង ក៏មានរបស់ខ្លះនៅតែថ្លៃ ចុះទម្រាំដល់ថ្ងៃបុណ្យទានមិនដឹងថា តើយ៉ាងណានោះទេ? តែបើអាច យើងដាក់ម្ហូបអាហារទៅតាមខ្លះ ដើម្បីកាត់បន្ថយចំណាយបានខ្លះ។
ងាកទៅកាន់កញ្ញា យ៉ង់ កញ្ញា ដែលជាបុគ្គលិករបស់ក្រុមហ៊ុនឯកជនមួយ ក៏បានរៀបរាប់ទាំងទឹកមុខអស់សំណើចថា កញ្ញាជាអ្នកសៀមរាបតែម្តង រាល់ដងកញ្ញាទៅស្រុក គឺតែងតែជិះរថយន្តជាមួយប្អូនស្រី ប្រភេទទ្បាន VIP ឬក៏ទ្បានយប់ ហើយកក់មុនតែមួយថ្ងៃ ឬពីរថ្ងៃទេ។ តែលើកនេះ ទ្បានដែលចេញទៅសៀមរាបទាំងអស់ គឺសុទ្ធតែពេញណែន ចឹងហើយមានតែសុខចិត្តនៅធ្វើការបន្ថែមម៉ោង ព្រោះមិនបានទៅស្រុកដដែល។ ហើយណាមួយទៀត កញ្ញាគឺតែងតែទៅជារៀងរាល់ឆ្នាំទៅហើយ ទើបសម្រេចថា ឆ្នាំនេះធ្វើជាអ្នកភ្នំពេញម្តងទៅចុះ ណាមួយក៏ព្រួយបារម្ភរឿងផ្ទះសម្បែង ព្រោះអ្នកជិតខាងទៅដើរលេងអស់ ខ្លាចជនឆ្លៀតឱកាសចូលគាស់ផ្ទះលួចរបស់របរ និងសម្ភារៈផ្សេងៗដែលមានតម្លៃ ព្រោះនៅភ្នំពេញ អោយតែរដូវកាលបុណ្យទាន គឺមានសភាពស្ងប់ស្ងាត់ខ្លាំង។
ដូច្នេះហើយ យើងអាចមើលឃើញថា បងប្អូនប្រជាពលរដ្ឋខ្មែរមួយចំនួនធំ សុទ្ធសឹងតែមានដំណើរកម្សាន្តទេសចរណ៍ទៅគ្រប់ខេត្ត-ក្រុង ព្រោះរដូវកាលនេះ ជារដូវកាលសង្ក្រាន្ត ហើយសង្ក្រាន្តក៏មិនមែនមានតែខេត្តសៀមរាបនោះទ្បើយ គឺមាននៅតាមបណ្តាខេត្តជាច្រើនផ្សេងទៀត ពិសេសនោះ សម្រាប់អ្នកភ្នំពេញក៏មិនចាំបាច់ទៅណាឆ្ងាយ ព្រោះសាលារៀនផ្សេងៗទៀតក៏បានរៀបចំនូវកម្មវិធីសង្ក្រាន្តនេះផងដែរ។
តែអ្វីដែលបងប្អូនមហាជនភាគច្រើនតែងតែមានការបារម្ភពេលធ្វើដំណើរកម្សាន្តនោះ គឺទាក់ទងនឹងតម្លៃម្ហូបអាហារ ការស្នាក់នៅ ការធ្វើដំណើរ បញ្ហាចរាចរណ៍ និងសុវត្ថភាពពេលមិននៅផ្ទះ ដូច្នេះមានតែសំណូមពរទៅដល់អាជ្ញាធរ ក្រសួងដែលពាក់ព័ន្ធ សូមមេត្តាកុំតម្លើងថ្លៃ ម្ហូបអាហារ ជាពិសេសចង់អោយភ្ញៀវជាតិ និងអន្តរជាតិ បានភ្លក់នូវមុខម្ហូបស្នាដៃកូនខ្មែរអោយបានគ្រប់ៗគ្នា នៅក្នុងឱកាសដ៏ពិសេសនេះ និងសុំអោយមានសុវត្ថិភាពគ្រប់ទីកន្លែងក្នុងពេលធ្វើដំណើរកម្សាន្ត មិនមានការគប់ទឹកផ្តេសផ្តាស់ក្នុងពេលធ្វើដំណើរ ព្រោះវាអាចប៉ះពាល់ទៅដល់សម្លៀកបំពាក់ សម្ភារៈ និងបញ្ហាចរាចរណ៍របស់អ្នកដំណើរនៅតាមដងផ្លូវ។ ដោយ ៖ សុជាតា
ចែករំលែកព័តមាននេះ