កម្មវិធី «ភូមិខ្ញុំ» នៃព្រឹត្ដិការណ៍អង្គរសង្ក្រាន្ត ដែលបានរៀបចំឡើងដើម្បីបង្ហាញអំពីទិដ្ឋភាពខ្លះៗនៃភូមិខ្មែរសម្រាប់ឱ្យអ្នកទស្សនាជាតិ និងអន្តរជាតិ បានឃើញ និងនឹកដល់ជីវភាពសុខសាន្តនៃប្រជាពលរដ្ឋខ្មែរ តាំងពីសម័យអតីតកាល រហូតមកដល់បច្ចុប្បន្ន ដែលជា
ខេត្តសៀមរាប ៖ កម្មវិធី «ភូមិខ្ញុំ» នៃព្រឹត្ដិការណ៍អង្គរសង្ក្រាន្ត ដែលបានរៀបចំឡើងដើម្បីបង្ហាញអំពីទិដ្ឋភាពខ្លះៗនៃភូមិខ្មែរសម្រាប់ឱ្យអ្នកទស្សនាជាតិ និងអន្តរជាតិ បានឃើញ និងនឹកដល់ជីវភាពសុខសាន្តនៃប្រជាពលរដ្ឋខ្មែរ តាំងពីសម័យអតីតកាល រហូតមកដល់បច្ចុប្បន្ន ដែលជាក្ដីស្រមៃ ក្តីសង្ឃឹម សម្រាប់ពលរដ្ឋខ្មែរ ពីភាពរីកចម្រើន ភាពសុខសាន្ត សន្តិភាព នៅក្នុងប្រទេសកម្ពុជា។
កម្មវិធី ភូមិខ្ញុំ នៅឆ្នាំ២០២៣នេះ ក្រោមប្រធានបទ «ភូមិខ្ញុំ ភូមិសុខសាន្ត» ដែលមានទីតាំងនៅខាងជើងជាប់នឹងប្រាសាទបាយ័ន ហើយលាតសន្ទឹងនៅលើផ្ទៃដីបណ្ដោយពីជើងទៅត្បូងប្រវែង២០០ម៉ែត្រ និងទទឹងពីកើតទៅលិចប្រវែង៦០ម៉ែត្រ។ ភូមិខ្ញុំ បែរមុខទៅទិសខាងលិចទល់នឹងប្រាសាទភិមានអាកាស ដែលមានខ្លោងទ្វារពីរ។ ខាងមុខភូមិខ្ញុំ រចនាតុបតែងដោយក្បូរក្បាច់រចនា របៀបខ្មែរគួរឱ្យទាក់ទាញ និងហ៊ុមព័ទ្ធទៅដោយរបបឈើជុំវិញភូមិ។
នៅក្នុងភូមិ នឹងរៀបចំតំបន់តាំងបង្ហាញនូវពិព័រណ៍អនុស្សាវរីយ៍ រំលឹកខួប១០ឆ្នាំនៃព្រឹត្តិការណ៍ អង្គរសង្ក្រាន្ត ដែលមានវត្ថុយក្សជាច្រើនដូចជា ៖ អង្រុតយក្ស, ចាប៉ីដងវែងយក្ស, កន្ត្រងប្រហុកយក្ស, មួកស្លឹកត្នោតយក្ស, សម្បុក និងពងមាន់យក្ស, គោម ផ្កាយយក្ស និងបំពង់ទឹកត្នោតយក្ស។ ហើយនៅកណ្តាលតំបន់នេះ នឹងមានសាងសង់រោងធំសមរម្យមួយ ដើម្បីដាំរូបថតរំលឹកខួប១០ឆ្នាំ នៃព្រឹត្ដិការណ៍អង្គរសង្ក្រាន្ដ និងក្រុមការងារអាចស្នាក់នៅពេលបំពេញ ការងារផងដែរ។
កម្មវិធី ភូមិខ្ញុំនេះ មានសំណង់ផ្ទះខ្មែរបុរាណ ដែលមានដូចជា ៖ ផ្ទះសិល្បៈទស្សនីយភាព, ផ្ទះសេដ្ឋី, ផ្ទះនំ, សាលាឆទាន និងផ្ទះចាក់ចេក។ ផ្សារភូមិខ្មែរ ដែលមានលក់ម្ហូប អាហារ នំ ភេសជ្ជៈ និងវត្ថុអនុស្សាវរីយ៍ផ្សេងៗរបស់អ្នកភូមិ ហើយក៏មានឆាកតន្ត្រីបុរាណសម័យ និងសកម្មភាពសាសនារបស់អ្នកភូមិផងដែរ។ ជាងនេះទៅទៀត ដើម្បីអបអរសាទរឆ្នាំថ្មី ឆ្នាំថោះ បញ្ចស័ក នៅចំកណ្តាលភូមិខ្ញុំ នឹងរៀបចំរូបទន្សាយយក្ស តុបតែងលម្អ ដោយគោមភ្លើង ផ្កាភ្ញី និង ទង់ជ្វាលាផ្សេងៗទៀតផង។
បើតាមអ្នកមើលការខុសត្រូវនៅការដ្ឋានសាងសង់សំណង់កម្មវិធី ភូមិខ្ញុំ នៃព្រឹត្ដិការណ៍អង្គរសង្ក្រាន្ដ បានប្រាប់ថា មកដល់ពេលនេះ សំណង់សម្រេចបានប្រមាណជា៨០ភាគរយ ដែលគ្រោងនឹងតុបតែងលម្អ តាមបែបបទនៃកម្មវិធីនៅដើមខែមេសា ឆ្នាំ២០២៣ខាងមុខនេះ ខណៈដែលព្រឹត្ដិការណ៍ខួប១០ឆ្នាំ នៃព្រឹត្ដិការណ៍អង្គសង្ក្រាន្ត នឹងចូលមកដល់នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣មុខនេះ។
ក្រុមការងារសាងសង់ក៏បានបញ្ជាក់ថា នៅទីលានប្រាសាទជល់ដំរី នៃក្រុងអង្គរធំ ក៏មានកម្មវិធីជាច្រើនទៀត រួមមានកម្មវិធី «នេះមិនមែនជាសុបិន» កម្មវិធីនេះ ជាកម្មវិធីផ្ដល់នូវការគាំទ្រ និងជួយស្វែងរកសមាជិកក្រុមគ្រួសារបស់ប្រជាជនខ្មែរ ដែលបែកបាក់គ្នាក្នុងអំឡុងពេលសង្គ្រាម ដែលរៀបចំដោយស្ថានីយទូរទស្សន៍បាយ័ន។ កម្មវិធីបានបង្ហាញក្នុងព្រឹត្តិការណ៍អង្គរសង្ក្រាន្តជានិមិត្តរូប នៃការជួបជុំបងប្អូន និងភាពសប្បាយរីករាយក្នុងមហាគ្រួសារខ្មែរ ជាពិសេសស្របពេលនឹងពិធីបុណ្យចូលឆ្នាំប្រពៃណីជាតិខ្មែរ ដែលប្រជាជនខ្មែរតែងតែជួបជុំបងប្អូនពីទីជិតទីឆ្ងាយ។
កម្មវិធី «ពិព័រណ៍វត្ថុយក្ស» ដែលមានពិព័រណ៍វត្ថុយក្សរៀបចំឡើងក្នុងខ្លឹមសារអបអរសាទរខួប១០ឆ្នាំ នៃព្រឹត្តិការណ៍អង្គរសង្ក្រាន្ត ដោយពាំនាំត្រឡប់មកវិញនូវស្នាដៃយក្សក្នុងព្រឹត្តិការណ៍អង្គរសង្ក្រាន្តឆ្នាំមុនៗ និងស្នាដៃដទៃទៀតដ៏គួរជាទីមោទភាពរបស់យុវជន ដោយរំលេចជាទស្សនីយភាពដ៏អស្ចារ្យ ក្នុងការរួមចំណែកលើកតម្កើង ស្នាដៃកូនខ្មែរក្រោមពាក្យស្លោក «ខ្មែរធ្វើបាន»។ កម្មវិធី «សួនមុនីហទ័យ» កម្មវិធីសួនមុនីហទ័យ គឺជាកម្មវិធីមួយដែលបង្កើតឡើងក្នុងអត្តន័យប្រមូលផ្តុំនូវសារៈសំខាន់ និងភាពដ៏អស្ចារ្យនៃសិល្បៈ ទំនៀមទម្លាប់ និងឥរិយាបថដ៏ប្រពៃរបស់ប្រជាជនខ្មែរ ក្នុងគោលបំណងបង្កើតបរិយាកាសជូនអ្នកចូលរួមឱ្យបានយល់ច្បាស់អំពីភាពថ្កើនថ្កាននៃសិល្បៈវប្បធម៌ ទំនៀមទម្លាប់ ភាពទន់ភ្លន់ និងស្នាមញញឹមដ៏ថ្លៃថ្នូរប្រកបដោយភាពជឿជាក់ ជាពិសេសការផ្សារភ្ជាប់នូវក្តីស្រមៃ និងក្តីសង្ឃឹម និងភក្តីភាព របស់ប្រជាជនខ្មែរដែលមិនអាចបំភ្លេចបាន។
ដោយឡែកកម្មវិធី «ភូមិស៊ីហ្គេម និង អាស៊ានប៉ារ៉ាហ្គេម ២០២៣» កម្មវិធីនេះជាកម្មវិធីផ្សព្វផ្សាយទូលំទូលាយពីព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ក្រោមប្រធានបទ «កីឡារស់ក្នុងសន្តិភាព» និងដើម្បីជាការចូលរួមចំណែកពីប្រជាជនកម្ពុជាគ្រប់រូបក្នុងការលើកតម្កើនមោទកភាពជាតិ ភាពដ៏សម្បូរបែប និងសក្តានុពលរបស់កម្ពុជាលើឆាកជាតិ និងអន្តរជាតិ៕
ចែករំលែកព័តមាននេះ