ADផ្ទាំងផ្សព្វផ្សាយពាណិជ្ជកម្ម

Picture

នាយ ពាក់​មី រំភើប​ចង់​ហោះ ក្រោយ​ឃើញ​សម្តេច​តេ​ជោ​ដាក់​មួយ​ឃ្លា «​រឿង​ដើម​ស្វាយ​អ្នក​ជិតខាង»(​វី​ដេ​អូ​)

11 ខែ មុន
  • ភ្នំពេញ

ពិតជា​រឿង​នឹក​ស្មាន​មិន​ដល់ រហូត​តារា​កំប្លែង​ប្រុស​ដ៏​ល្បីឈ្មោះ នាយ ពែ​ក​មី រំភើប​ឥត​ឧបមា ក្រោយ​ពី​សម្តេច​តេ​ជោ ហ៊ុន សែន នាយក​រដ្ឋមន្ត្រី​កម្ពុជា បាន​សរសេរ​សារ​ប៉ុន្មាន​ឃ្លា

រាជធានី​ភ្នំពេញ ៖ ពិតជា​រឿង​នឹក​ស្មាន​មិន​ដល់ រហូត​តារា​កំប្លែង​ប្រុស​ដ៏​ល្បីឈ្មោះ នាយ ពែ​ក​មី រំភើប​ឥត​ឧបមា ក្រោយ​ពី​សម្តេច​តេ​ជោ ហ៊ុន សែន នាយក​រដ្ឋមន្ត្រី​កម្ពុជា បាន​សរសេរ​សារ​ប៉ុន្មាន​ឃ្លា ពោល​សរសើរ​តារា​កំប្លែង​រូប​នេះ អំពី​ភាព​ចុះសម្រុង​របស់​លោក​ជាមួយនឹង​អ្នក​ជិតខាង ជុំវិញ​រឿង​ដំណាំ​នៅ​ជាប់​ព្រំ​របង​គ្នា​។

រឿងរ៉ាវ​វី​ដេ​អូ​ខ្លី​មួយ ដែល​តារា​កំប្លែង​មាន​សម្តី​ចាក់ទឹកមិនលិច នាយ ពែ​ក​មី ដែល​មានឈ្មោះ​ពិត​ថា ចែ​ម ចាន់​រ៉ា បាន​បង្ហោះ​នោះ គឺ​លោក​បាន​និយាយ​ពី​អ្នក​ជិតខាង​របស់​ខ្លួន​ទាក់ទង​ជាមួយនឹង​រឿង​ដើម​ស្វាយ​ដែល​ដាំ​កៀក​ព្រំ​ដី​។ ដំណាំ​ដើម​ស្វាយ​របស់​អ្នក​ជិតខាង​នោះ​ទៀត​សោត បាន​លយ​មក​ផ្ទះ​របស់​លោក​ប្រមាណ​ជា​២​ម៉ែត្រ​។ ដោយសារ​តែ​ឃើញ​ដំណាំ​នៅ​កៀក​ព្រំ​របង​បាន​លយ​ចូល​ផ្ទះ​របស់​នាយ ពែ​ក​មី នោះ ម្ចាស់ផ្ទះ​ក៏​បាន​សុំ​កា​.​ប់​ដើម​ស្វាយ​ដែល​លយ​ចូល​ផ្ទះ​តារា​កំប្លែង​នោះ​ចោល ប៉ុន្តែ​បែរជា នាយ​ពែ​ក​មី មិន​ព្រមឱ្យ​កា​.​ប់​ដើម​ស្វាយ​នោះ​ទេ​។

ក្រោយ​ពេល​ដែល​តារា​រូប​នេះ បាន​បង្ហោះ​វី​ដេ​អូ​នោះ​រួច​មក សម្តេច​ត​ជោ ហ៊ុន សែន ដែល​អ្នកសិល្បៈ និង​ប្រជាជន​ខ្មែរ​ភាគច្រើន​លើសលប់​បាន​ហៅ​ថា «​សម្តេច​ពុក​ៗ» នោះ បាន​បញ្ចេញ​ទស​ន្សៈ​យល់​ឃើញ​របស់​សម្តេច ដោយ​សម្តេច​តេ​ជោ បាន​ចែកចាយ​វី​ដេ​អូ​របស់​នាយ​ពែ​ក​មី និង​បង្ហោះ​សារ​អម​ដែល​មាន​ខ្លឹមសារ​ទាំងស្រុង​ថា «​សូម​កោតសរសើរ​លោក​កូន ពែ​ក​មី និង​គ្រួសារ​មួយទៀត​ដែល​ខ្ញុំ​មិន​បាន​ស្គាល់ឈ្មោះ ដែល​ចេះ​សម្រួល​គ្នា និង​រស់នៅ​ជាមួយ​គ្នា​ដោយ​សុខសាន្ត​។ សូម​មើល​វី​ដេ​អូ​នេះ និង​ផ្តល់​នូវ​ការ​ពន្យល់​គ្រប់គ្រាន់​អំពី​របៀប​រស់នៅ​ជិតខាង​គ្នា​»​។

ប្រាកដ​ណាស់ កន្លង​មក យើង​តែងតែ​បានឃើញ​នូវ​ការ​កើត​មាន​ជម្លោះ​ជា​រឿយ​ៗ​រវាង​អ្នក​ជិតខាង​គ្នា ដោយសារ​តែ​បញ្ហា​រឿង​ដើមឈើ ឬ​ដាំ​ដំណាំ​កៀក​ព្រំ​ដី​ឆ្លង​ចូល​ទៅ​ដី ឬ​ផ្ទះ​ម្ខាង​ទៀត ហើយ​ខ្លះ​ក៏​កើត​មាន​ជា​ទំនាស់​រវាង​អ្នក​ជិតខាង​មើល​មុខ​គ្នា​មិន​ចំ ដោយសារ​តែ​ខឹង​ឈ្លោះ​រឿង​ដំណាំ​ហូប​ផ្លែ ឬ​ដើមឈើ លយ​ឆ្លង​ព្រំ​ដី​ម្ខាង​ទៅ​ដី​ម្ខាង​ទៀត​។

សម្រាប់​វី​ដេ​អូ នាយ​ពែ​ក​មី ដែល​ផ្ទុះ​ការ​ចាប់អារម្មណ៍ រហូត​ប្រមុខ​ដឹកនាំ​កំពូល​ប្រទេស​បាន​ចាប់អារម្មណ៍ និង​កោតសរសើរ​នោះ គឺ​បាន​ឆ្លុះ​បញ្ចាំង​ពី​ទឹកចិត្ត​ចេះ​ស្រុះស្រួល​គ្នា​រវាង​នាយ​ពែ​ក​មី និង​អ្នក​ជិតខាង ដោយ​ម្ចាស់​ដើម​ស្វាយ មិន​ចាំបាច់​កា​.​ប់​ស្វាយ​ចោល ខណៈ​នាយ​ពែ​ក​មី ក៏​អាច​ទទួល​បាន​ផលប្រយោជន៍​ពី​ដើម​ស្វាយ​របស់​អ្នក​ជិតខាង​បាន​ដូច​គ្នា​។

តាម​រយៈ​វី​ដេ​អូ​ដែល​នាយ​ពែ​ក​មី បាន​ថត និង​ផ្សព្វផ្សាយ​នោះ គឺ​មែក​ស្វាយ​របស់​អ្នក​ជិតខាង បាន​លយ​ចូល​លើដំបូល​ផ្ទះ​នាយ​ពែ​ក​មី​ប្រមាណ​ជា​២​ម៉ែត្រ និង​មែក​ស្វាយ​មាន​ផ្លែស្វាយ​យ៉ាងច្រើន ដែល​នាយ​ពែ​ក​មី​បាន​រៀបរាប់​ថា លោក​អាច​បេះ​ស្វាយ​ដែល​លយ​ចូល​ក្នុង​ចំណែក​ផ្ទះ​របស់​លោក​ទទួលទាន​បាន​យ៉ាង​ស្រួល​ផង​ដែរ​។

តាម​រយៈ​បទ​សម្ភាសន៍​ជាមួយ​សារព័ត៌មាន​កោះសន្តិភាព ដោយ​តារា​កំប្លែង​នាយ ពែ​ក​មី បាន​ពោល​ឱ្យ​ដឹង​ថា លោក​ពិតជា​សប្បាយ​រីករាយ​ជា​ខ្លាំង ក្រោយ​ពេល​សម្តេច​ពុក បាន​លើក​សរសើរ​លោក ទាក់ទង​ជាមួយ​ការ​ដែល​លោក​រស់នៅ​ជាមួយ​អ្នក​ជិតខាង​បាន​ល្អ ដោយ​ចេះ​អធ្យាស្រ័យ ការ​អត់ឱន​ឱ្យ​គ្នា​ទៅ​វិញ​ទៅ​មក ដូច​ជា​ករណី​ដែល​ដើម​ស្វាយ​អ្នក​ជិតខាង​បាន​លយ​មក​ចំណែក​ដី​កម្មសិទ្ធិ​របស់​លោក​នេះ​ជាដើម​។

ទាក់ទង​ជាមួយ​រឿង​ដើម​ស្វាយ​របស់​អ្នក​ជិតខាង ដែល​ដាំ​ជិត​របង និង​លយ​ចូល​ផ្ទះ​របស់​លោក​នេះ នាយ​ពែ​ក​មី បាន​ពោល​ឱ្យ​ដឹង​ថា អ្នក​ជិតខាង​របស់​លោក​សុំ​លោក​កា​.​ប់​ចោល​ជា​ច្រើន​ដង​ហើយ ដោយ​ខ្លាច​រអែងចិត្ត​របស់​លោក​។ ប៉ុន្តែ​នាយ ពែ​ក​មី បាន​តប​ទៅ​ម្ចាស់​ដើម​ស្វាយ​ថា «​កុំ​កា​.​ប់​អី ទម្រាំ​ដាំ​បាន​ធំ​ប៉ុណ្ណឹង ត្រូវ​ចំណាយពេល​ពុំ​តិច​ឆ្នាំ​នោះ​ទេ លើស​នេះ​វា​ក៏​ដូច​ជា​មិន​ប៉ះពាល់​អ្វី​ដែល​សម្រាប់​លោក ព្រោះ​វា​ក៏​បាន​ផ្តល់​ជា​ម្លប់​ដល់​ផ្ទះ​លោក​ផង​ដែរ​»​។

នាយ ពែ​ក​មី តារា​កំប្លែង​ប្រុស​ដែល​ពោរពេញ​ទៅ​ដោយ​សំនួនវោហារ​កំប្លែង​មិន​រីងស្ងួត បាន​បន្ត​ឱ្យ​ដឹង​ថា ការ​យោគយល់​អ​ព្យា​ស្រ័យ​រវាង​អ្នក​ជិតខាង គឺជា​រឿង​សំខាន់​ណាស់​។ ជាក់ស្តែង​ករណី​ដើម​ស្វាយ​របស់​អ្នក​ជិតខាង​លោក គឺ​មែក​ស្វាយ​ដែល​លយ​មក​ផ្ទះ​លោក គឺ​លោក​អាច​បេះ​ហូប​ផ្លែ​ខ្លះទៅ ខណៈ​ម្ចាស់ផ្ទះ​ក៏​ទទួលផល​ខាង​មែក​ណា​ដែល​នៅ​ក្នុង​ដី​របស់​ម្ចាស់ផ្ទះ ម្ចាស់ផ្ទះ​បេះ​ហូប​ទៅ​។ ដូច្នេះ​ត្រង់នេះ វា​ឆ្លុះ​បញ្ចាំង​អំពី​ការ​ចេះ​សម្របសម្រួល​គ្នា ចេះ​អត់ឱន​ឱ្យ​គ្នា​ទៅ​វិញ​ទៅ​មក ព្រោះ​មាន​តែ​អ្នក​ជិតខាង​នេះ​ហើយ​ដែល​យើង​តែងតែ​ពឹងពាក់​គ្នា​ទៅ​វិញ​ទៅ​មក នៅ​ពេល​យើង​ជួប​ការ​លំបាក ឬ​មាន​រវល់​អ្វី​ផ្សេង​ទាំង​ពិធីការ ពិធីបុណ្យ​ទាន​ផ្សេង ឬ​គ្រា​មាន​អាសន្ន​អ្វីមួយ​ជាដើម​។

នាយ​ពែ​ក​មី ក៏​បាន​លើក​ឡើង​បន្ត​ថា វី​ដេ​អូ​រឿង​ដំណាំ​ដើម​ស្វាយ​ជាប់​ព្រំ​របង​នេះ គឺជា​រឿង​ពិត​របស់​លោក ដោយ​លោក​ចង់​ចែករំលែក​ឱ្យ​បងប្អូន​មហាជន​បាន​ជ្រាប​ថា ការ​រស់នៅ​ជា​ទូទៅ​តែងតែ​ប៉ះពាល់​គ្នា​ខ្លះ​ហើយ ជា​ពិសេស​នៅ​ទីក្រុង​តែ​ម្តង ដូច្នេះ​ចូរ​ចេះ​គោរព​សិទ្ធិ​គ្នា​ទៅ​វិញ​ទៅ​មក ចេះ​យោគយល់​គ្នា ទើប​នាំ​ឱ្យ​មាន​ភាព​សុខសាន្ត​ទាំងអស់​គ្នា​។

តារា​កំប្លែង​រូប​នេះ​បាន​បន្ត​ថា លោក​ពិតជា​សប្បាយ​រីករាយ​ជា​ខ្លាំង ហើយ​ក៏​ចង់​ចែករំលែក​ចំណុច​ល្អ​ទាំង​អស់នេះ​ឱ្យ​មហាជន​បាន​ជ្រាប ដូច្នេះ​លោក​សង្ឃឹមថា ចំណុច​ទាំងនេះ បងប្អូន​មហាជន​នឹង​អាច​យក​ជា​គំរូ​តាម​លោក ដើម្បី​ទទួល​បាន​សុខ​សន្តិភាព​ទាំងអស់​គ្នា​ជាមួយ​អ្នក​ជិតខាង ដែល​មាន​ព្រំ​របង​ជាប់​ៗ​គ្នា​។ ជា​ចុង​ក្រោយ តារា​កំប្លែង​នាយ ពែ​ក​មី ពិតជា​អគុណ​ខ្លាំង​ណាស់ សម្រាប់​ការ​គាំទ្រ​នា​ពេល​កន្លង​មក ដោយ​លោក​ជូនពរ​អោយ​បងប្អូន​មហាជន​ជួប​ប្រទះ​អ្វី​ដែល​ល្អ​ៗ ក៏​ដូច​ជា​ទទួល​បាន​សុខ​សុភមង្គល​ក្នុង​ក្រម​គ្រួសារ​៕ ដោយ ៖ លី​ហួ គី​ម​ឆាយ
https://www.facebook.com/KohSantepheap60Buzz/videos/870694680901923/

អត្ថបទសរសេរ ដោយ

កែសម្រួលដោយ