លោក ថម មី បានចេញមុខមកបញ្ជាក់យ៉ាងច្បាស់ៗ ពាក់ព័ន្ធចំណងស្នេហ៍ជាប្តីប្រពន្ធជាមួយតារាចម្រៀងនាង សួស វីហ្សា ក្រោយលោកព្រមានចំណាត់ការលើផ្លូវច្បាប់ទៅកាន់សារព័ត៌មានក្នុងស្រុកដែលផ្សាយរឿងព័ត៌មាន
រាជធានីភ្នំពេញ ៖ លោក ថម មី បានចេញមុខមកបញ្ជាក់យ៉ាងច្បាស់ៗ ពាក់ព័ន្ធចំណងស្នេហ៍ជាប្តីប្រពន្ធជាមួយតារាចម្រៀងនាង សួស វីហ្សា ក្រោយលោកព្រមានចំណាត់ការលើផ្លូវច្បាប់ទៅកាន់សារព័ត៌មានក្នុងស្រុកដែលផ្សាយរឿងព័ត៌មានបែកបាក់គ្នា។
លោក ថម មី បានអះអាងថា ចំណងស្នេហ៍ជាប្តីប្រពន្ធរបស់លោក និងភរិយា សួស វីហ្សា គឺនៅតែមានភាពរឹងមាំ ពោលគឺមិនមានការបែកបាក់ដូចការចុះផ្សាយពីបណ្តាញសារព័ត៌មានមួយចំនួន និងការយល់ឃើញដោយភាន់ច្រឡំពីមហាជនមួយចំនួននោះឡើយ។
ការចេញមុខបញ្ជាក់រឿងរ៉ាវខាងលើនេះពីលោក ថម មី នាពេលនេះបានធ្វើឡើង បន្ទាប់ពីកាលពីពេលថ្មីៗនេះ អ្នកនាង សួស វីហ្សា បានបង្ហោះសារដ៏គួរអោយភ្ញាក់ផ្អើលមួយនៅលើគណនីហ្វេសប៊ុករបស់ខ្លួន។ សារដែលតារាចម្រៀងរូបនេះ បង្ហោះនោះនាងបានសរសេរថា «អស់និស្ស័យនឹងគ្នាហើយ ដើរផ្លូវរៀងខ្លួនចុះ» ដែលសារទាំងនេះបានធ្វើអោយមហាជន ជាពិសេសបណ្តាអ្នកលេងហ្វេសប៊ុកសម្តែងការភ្ញាក់ផ្អើលយ៉ាងខ្លាំង ក្នុងពេលអ្នកខ្លះដាក់ការសង្ស័យថា ចំណងស្នេហ៍របស់នាងទំនងជាដល់ផ្លូវបំបែក។
ម្នាក់ៗបានចូលទៅខំមិន ដោយអ្នកខ្លះសម្តែងការសោកស្តាយចំពោះរឿងមួយនេះ ខណៈពេលអ្នកខ្លះយល់ឃើញថា អ្វីដែល សួស វីហ្សា បានបង្ហោះនាពេលនេះ គ្រាន់តែជាអត្ថន័យនៃបទចម្រៀងចេញថ្មីរបស់នាងតែប៉ុណ្ណោះ។ ដោយឡែកសារដែលអ្នកនាង សួស វីហ្សា បានបង្ហោះនាពេលនេះ ក៏មានការចុះផ្សាយតាមបណ្តាញសារព័ត៌មាននៅក្នុងស្រុកមួយចំនួនផងដែរ។
យ៉ាងណា ក្រោយពីមានការចុះផ្សាយព័ត៌មានខាងលើនេះ លោក ថម មី បានសម្តែងការមិនពេញចិត្តឡើយ ដោយនៅក្នុងនោះលោកក៏បានព្រមានប្តឹងចំពោះបណ្តាញសារព័ត៌មានទាំងនោះផងដែរ ប្រសិនបើមិនចេញមុខសុំទោស ត្បិតការចុះផ្សាយនោះខុសពីការពិតទាំងស្រុង។
យ៉ាងណាក្រោយមានការសុំទោសរបស់បណ្តាញសារព័ត៌មានតាមការស្នើសុំនោះ លោក ថម មី ក៏បានបញ្ចេញសារបង្ហោះតាមបណ្តាញសង្គមថា «អរគុណចំពោះការសុំទោស ប្តីប្រពន្ធខ្ញុំតស៊ូជាមួយគ្នាណាស់ ស្រលាញ់គ្នាណាស់ រាល់ថ្ងៃទោះបីបើខឹង ឬឈ្លោះគ្នា ក៏យើងមិនដែលមកហែកខ្លួនឯងតាមបណ្តាញសង្គមចឹងដែរ»។ លោកបញ្ជាក់ថា «២នាក់ខ្ញុំ មិនងា.យបែកបាក់គ្នាទេ លុះត្រាតែអស់ជីវិតរៀងៗខ្លួន។ ទោះថ្ងៃក្រោយ យើងទាំងប្រែជាអ្វី ក៏នៅតែស្រលាញ់គ្នា ស្មោះត្រង់នឹងគ្នា លុះសូន្យសង្ខារ»៕
ចែករំលែកព័តមាននេះ