ប្រវត្តិគ្រួសារ
អ្នកស្រីឌី សាវ៉េត ជាតារាភាពយន្តមានកេរ្តិ៍ឈ្មោះបោះសំឡេងល្បីសុសសាយក្នុងប្រទេសកម្ពុជា កាលពីអំឡុងទសវត្សរ៍ទី៦០និងដើមទសវត្សរ៍ទី៧០ ។ អ្នកស្រីកើតនៅឆ្នាំ១៩៤៤ នៅសង្កាត់លេខ៦ ទីក្រុងភ្នំពេញ (ម្ដុំ
ប្រវត្តិគ្រួសារ
អ្នកស្រីឌី សាវ៉េត ជាតារាភាពយន្តមានកេរ្តិ៍ឈ្មោះបោះសំឡេងល្បីសុសសាយក្នុងប្រទេសកម្ពុជា កាលពីអំឡុងទសវត្សរ៍ទី៦០និងដើមទសវត្សរ៍ទី៧០ ។ អ្នកស្រីកើតនៅឆ្នាំ១៩៤៤ នៅសង្កាត់លេខ៦ ទីក្រុងភ្នំពេញ (ម្ដុំសួនច្បារសម្ដេចតេជោហ៊ុន សែន សព្វថ្ងៃ)។ ឪពុកឈ្មោះឌី ណយ ជាស្មៀនរបស់ជីតាដែលជាចាងហ្វាងសាលាឧទ្ធរណ៍ មានស្រុកកំណើតនៅខេត្តតាកែវ ម្តាយឈ្មោះសាត់ រិន ជាកសិករនៅស្រុកអង្គស្នួល ខេត្តកណ្ដាល ។
អ្នកស្រីឌី សាវ៉េត មានបងប្អូនទាំងអស់៦នាក់ ប៉ុន្តែនៅមានជីវិតតែពីរនាក់ប៉ុណ្ណោះគឺអ្នកស្រីឌី សាវ៉ៃ ដែលសព្វថ្ងៃរស់នៅប្រទេសបារាំង និងអ្នកស្រីផ្ទាល់ ។
កាលពីវ័យកុមារអ្នកស្រីឌី សាវ៉េត បានសិក្សានៅសាលាបឋមសិក្សាសម្ដេចសុធារស ហើយក្រោយមកបន្តនៅវិទ្យាល័យចតុម្មុខ។
អ្នកស្រីមានស្វាមីគឺលោកហ៊ុយ គឹង ដែលជាតារាសម្ដែង និងជាផលិតករភាពយន្តនាជំនាន់ទសវត្សទី៦០ ហើយទទួលបានបុត្រពីរនាក់ជាចំណងដៃឈ្មោះហ៊ុយ ឌីណា និងហ៊ុយ ឌីលី។
ក្រោយមកអ្នកស្រីឌី សាវ៉េត និងស្វាមីបានបែកបាក់គ្នាក្នុងឆ្នាំ១៩៧៤ មុនពេលដែលអ្នកស្រីភៀសខ្លួនទៅរស់នៅប្រទេសបារាំង ។
នៅឆ្នាំ១៩៩៣ អ្នកស្រីឌី សាវ៉េត បានវិលត្រឡប់មកកាន់មាតុភូមិវិញ ដោយជួលផ្ទះគេនៅម្ដុំផ្សារកាប់គោ ។
ក្រោយពីទូរទស្សន៍ជាតិអញ្ជើញអ្នកស្រីឌី សាវ៉េត ទៅសម្ភាសន៍មក មានអ្នកទាក់ទងអ្នកស្រីឱ្យជួយបង្ហាត់សម្តែងភាពយន្តតាមក្លឹប អង្គការ និងស្ថានីយទូរទស្សន៍នានា។ នៅអំឡុងឆ្នាំ១៩៩៧-១៩៩៨ អ្នកស្រីឌី សាវ៉េត បានបើកក្លឹបសិល្បៈMSL ជាមូយលោកហ៊ុយ សាន់ អតីតតារាភាពយន្តរួមជំនាន់ ទទួលបង្ហាត់បង្រៀនរាំ ដើរម៉ូដ សម្ដែង និងច្រៀង ។ មិនត្រឹមតែប៉ុណ្ណោះអ្នកស្រីបានសហការជាមួយទូរទស្សន៍ជាតិកម្ពុជាបង្កើតកម្មវិធីជាច្រើន ។
ក្លាយជាបវរកញ្ញា និងតារាភាពយន្ត
នៅឆ្នាំ១៩៥៩ ក្នុងវ័យ១៥ឆ្នាំ អ្នកស្រីឌី សាវ៉េត បានប្រលងជាប់បវរកញ្ញាចំណាត់ថ្នាក់លេខ១ ។ នៅឆ្នាំ១៩៦២ អ្នកស្រីត្រូវបានលោកអ៊ួង កន្ធន់ ចាងហ្វាងផលិតកម្មកងចក្រភាពយន្ត ជ្រើសរើសថតភាពយន្តដំបូងក្នុងរឿងក្បូនជីវិត ដើរតួជាមួយលោកម៉ក់ ហូ ។
ក្រោយមកអ្នកស្រីឌី សាវ៉េត បានបន្តសម្ដែងជាច្រើនផលិតកម្មដូចជា ផលិតកម្មតារារ័ត្នភាពយន្ដ របស់លោកទា លឹមគុណ, ផលិតកម្មឥន្ទ្រទេវីភាពយន្តរបស់លោកប៊ីវ ឆៃលាង, ផលិតកម្មព្រះខ័នពេជ្រភាពយន្ដ របស់លោកលី វ៉ា ,ផលិតកម្មនាគព័ន្ធភាពយន្ត របស់លោកស៊ុន ប៊ុនលី, ផលិតកម្មត្រង់ដឺភាពយន្ត របស់លោកយិន បឿនហៅត្រង់ដឺ, ផលិតកម្មព្រះកែវមរកតភាពយន្តរបស់លោកន ឫទ្ធីយ៉ា ជាដើម ។
ដោយសារជោគជ័យលើវិស័យសិល្បៈ អ្នកស្រីឌី សាវ៉េត បានបើកផលិតកម្មថតខ្សែភាពយន្តមួយជាមួយស្វាមីគឺផលិតកម្មសុវណ្ណគិរីភាពយន្ដ ហើយថតបានប្រមាណជាង១០រឿងដែលសុទ្ធសឹងតែទទួលការគាំទ្រពីមហាជន ។
តួឯកប្រុសដែលអ្នកស្រីឌី សាវ៉េត ធ្លាប់សម្ដែងជាមួយគឺលោកគង់ សំអឿន, លោកជា យុទ្ធថន,លោកណុប ណែម,លោកន ប្ញទ្ធីយ៉ា,លោកម៉ៃ យ៉ាសិទ្ធិ, លោកមាស សំអ៊ែល ,លោកសោម ដូរិន, លោកម៉ក់ ហូ ជាដើម ។
រួចជីវិតពីរបបខ្មែរក្រហមដោយសារគ្មានសំបុត្រយន្តហោះ
នៅក្នុងសម័យខ្មែរក្រហមអ្នកស្រីឌី សាវ៉េតមិនបានរស់នៅក្នុងស្រុកខ្មែរទេ ពោលគឺអ្នកស្រីបានផ្ញើខ្លួនក្នុងជីវភាពថ្មីនាទឹកដីប្រទេសបារាំង មុនពេលដែលអ្នកស្រីវិលមកកាន់ស្រុកកំណើតវិញនាឆ្នាំ១៩៩៣ ។
បើតាមការរៀបរាប់របស់អ្នកស្រីឌី សាវ៉េត នៅអំឡុងឆ្នាំ១៩៧៥ អ្នកស្រីបានចេញទៅមើលកូនដែលបានផ្ញើមិត្តភក្តិនៅក្នុងប្រទសថៃមុនពេលដែលខ្មែរក្រហមវាយដណ្តើមយកទីក្រុងភ្នំពេញ ។ អ្នកស្រីបញ្ជាក់ថា នៅក្នុងពេលនោះមានគ្រាប់បែកបានធ្លាក់មកជិតអាកាសយានដ្ឋានពោធិចិនតុង ហើយអ្នកស្រី និងអ្នកដំណើរជាច្រើនទៀតបាននាំគ្នារត់រកកន្លែងសុវត្ថិភាព ។ ជាសំណាងល្អយន្តហោះមិនបានចេញចោលអ្នកស្រីឡើយ ទើបអ្នកស្រីបានទៅដល់ប្រទេសថៃដោយសុវត្ថិភាព ដោយមិនបានដឹងពីហេតុការណ៍ខ្មែរក្រហមវាយចូលទីក្រុងភ្នំពេញឡើយ ។
លុះពេលបានសម្រាក និងមើកកូនបានប្រហែលមួយសប្តាហ៍ អ្នកស្រីឌី សាវ៉េត មានបំណងចង់វិលមកស្រុកខ្មែរវិញ ប៉ុន្តែមិត្តភក្តិនៅទីនោះបានហាមឃាត់មិនឲ្យអ្នកស្រីមកឡើយ ព្រោះនៅស្រុកខ្មែរពុំមានសុវត្ថិភាព ។ ប៉ុន្តែអ្នកស្រីនៅតែមានះវិលមកស្រុកខ្មែរវិញឲ្យខាងតែបាន ទើបអ្នកស្រីលួចទៅទិញសំបុត្រយន្តហោះដោយមិនឲ្យអ្នកណាដឹងឡើយ តែអ្នកលក់សំបុត្រនិយាយថា សំបុត្រយន្តហោះទៅស្រុកខ្មែរមិនមានឡើយ ដោយគេប្រាប់ថា ស្រុកខ្មែរមានគ្រាប់ផ្លោងច្រើនណាស់ មិនមានយន្តហោះណាហ៊ានហោះទៅទេ ។
លុះពេលក្រោយមកអ្នកស្រីឌី សាវ៉េត ក៏បានរត់ទៅស្ថានទូតខ្មែរប្រចាំប្រទេសថៃ ក៏មន្ត្រីស្ថានទូតមិនឲ្យអ្នកស្រីទៅវិញដែរ ព្រោះមិនមានជើងហោះហើរទៅកាន់ស្រុកខ្មែរឡើយ ។
អ្នកស្រីឌី សាវ៉េត អស់សង្ឃឹមជាខ្លាំង ហើយក៏បានបន្តស្នាក់នៅស្រុកថៃទៀត ។ មានមិត្តភក្តិម្នាក់បានបបួលអ្នកស្រីទៅរស់នៅស្រុកបារាំង តែពេលនោះអ្នកស្រីមិនមានអ្នកធានាឡើយ ។ ប៉ុន្តែជាសំណាងល្អអ្នកស្រីបានជួបនឹងមិត្តភក្តិហើយគេបានជួយទាក់ទងអ្នកដែលនៅបារាំងដើម្បីធានាអ្នកស្រី ទើបអ្នកស្រីមានឱកាសបានចេញទៅរស់នៅប្រទេសបារាំងក្នុងអំឡុងពេលដែលខ្មែរក្រហមកំពុងកាន់កាប់ប្រទេសកម្ពុជា ។
បើតាមអ្នស្រីឌី សាវ៉េត នៅប្រទេសបារាំងអ្នកស្រីមិនមានការលំបាកអ្វីឡើយ ដោយអ្នកស្រីមានការងារធ្វើ និងរស់នៅដោយមានសេចក្តីសុខជាមួយបងប្អូនខ្មែរដែលរស់នៅទីនោះ ។
ត្រឡប់មកស្រុកខ្មែរវិញ
នៅអំឡុងឆ្នាំដែលអ្នកស្រីឌី សាវ៉េត បានដឹងដំណឹងថា ព្រះករុណាព្រះបាទនរោត្តម សីហនុ និងសម្តេចអគ្គមហាសេនាបតីតេជោហ៊ុន សែន ទៅប្រទេសបារាំងនាទីក្រុងប៉ារីសក្នុងកិច្ចចរចាដើម្បីបង្រួបបង្រួមជាតិ អ្នកស្រីក៏ធ្វើដំណើរប្រមាណជា៧ទៅ៨ម៉ោង ដើម្បីទៅសុំជួបសម្តេចទាំងពីរ ។ អ្នកស្រីបានប្រាប់ពីគោលបំណងចង់វិលមកកាន់ស្រុកខ្មែរវិញ ហើយសម្តេចបានប្រាប់អ្នកស្រីថា កុំបារម្ភយើងកំពុងធ្វើកិច្ចការងារដើម្បីឲ្យបងប្អូនខ្មែរយើងបានជួបជុំគ្នាវិញ ។
អ្នកស្រីឌី សាវ៉េត បញ្ជាក់ថា ពេលអ្នកស្រីបានវិលមកស្រុកខ្មែរវិញ គឺអ្នកស្រីមានការរំភើបយ៉ាងខ្លាំង ព្រោះពេលនៅស្រុកបារាំង អ្នកស្រីតែងតែអង្គុយយំនឹកស្រុកពេលដែលសម្លឹងមើលព្រះចន្ទរះ ។ ចំណែកពេលដែលអ្នកស្រីនៅស្រុកថៃវិញ គឺតែងតែមើលសំដៅមកភ្នំពេញ ហើយសម្លឹងមើលឃើញដើមត្នោតបានធ្វើឲ្យទឹកភ្នែកអ្នកស្រីហូរមក ។
អ្នកស្រី ឌី សាវ៉េត បានបញ្ជាក់ថា រហូតមកដល់ពេលនេះអ្នកស្រីបានចាត់ទុកខ្លួនឯងជាមនុស្សដែលមានសំណាងបំផុតមួយដែលអាចគេចផុតពីរបបខ្មែរក្រហម និងបានមករស់នៅស្រុកបារាំង ។
ហេតុនេះហើយទើបអ្នកស្រីយល់ថា អ្នកស្រីហាក់មានទេវតាតាមជួយដើម្បីឲ្យអ្នកស្រីមានជីវិតរស់ ដើម្បីមកជួយដល់វិស័យសិល្បៈខ្មែរបន្តទៀត ដូច្នេះហើយក្រៅពីការខិតខំធ្វើបុណ្យ និងចូលរួមសម្តែងខ្សែភាពយន្តវិញ អ្នកស្រីនឹងបើកការបង្ហាត់បង្រៀនសម្តែងដល់ ក្មេងៗជំនាន់ក្រោយដោយមិនយកកម្រៃឡើយ ។
ស្នាដៃខ្សែភាពយន្តរបស់អ្នកស្រីឌី សាវ៉េតដូចជារឿង៖
១-រឿងក្បូនជីវិត ឆ្នាំ១៩៦២,២-រឿងកុំភ្លេចគុណម្ដាយកុំណាយប្រពន្ធស្មោះត្រង់ឆ្នាំ១៩៦២,៣-រឿងរលកជីវិត ឆ្នាំ១៩៦២,៤-រឿងត្រើយជីវិត ១៩៦៣,៥-រឿងជីវិតខ្ញុំ ១៩៦៣,៦-រឿងហួសហើយជាតិនេះ ១៩៦៣,៧-រឿងកុលាបប៉ៃលិន ១៩៦៣,៨-រឿងបុប្ផាទល់ដែន ១៩៦៣,៩-រឿងវាសនាបុប្ផាភួងថ្មី ១៩៦៣,១០-រឿងវាសនាផ្ការំដួល ១៩៦៣,។ ១១-រឿងអូនជាទេវី ១៩៦៤,១២-រឿងកុំបំភ្លេចខ្ញុំ ១៩៦៤,១៣-រឿងក្រុងសុភមិត្រ ១៩៦៤,១៤-រឿងមាយើង ១៩៦៤,១៥-រឿងលាហើយដួងតារា ១៩៦៤,១៦-រឿងអន្លង់វាសនា ១៩៦៤,១៧-រឿងនាងបដាចារ ១៩៦៤,១៨-រឿងមរណមាតា ១៩៦៤,១៩-រឿងទុំទាវ ១៩៦៤,២០-រឿងនរណាប្ដីអូន ១៩៦៤ ។ ២១-រឿងសំណើចសើចចំអកព្រហ្មលិខិត ១៩៦៤,២២-រឿងទឹកហូរមិនត្រឡប់ ១៩៦៤,២៣-រឿងប្រុសអប្រិយស្រីរងកម្ម ១៩៦៥,២៤-រឿងជីវិតតែមួយ ១៩៦៥,២៥-រឿងខ្យងស័ង្ខ ១៩៦៥,២៦-រឿងលលកញីឈ្មោល ១៩៦៥,២៧-រឿងសាយ័ណ្ហទោចយំ ១៩៦៥,២៨-រឿងកាត់ត្រើយមហាស្រណោះ ១៩៦៦,២៩-រឿងនាងវិមានច័ន្ទ ១៩៦៦,៣០-រឿងព្រោះតែស្រឡាញ់ ១៩៦៦ ។ ៣១-រឿងស្អប់ណាស់ស្រឡាញ់ណាស់ ១៩៦៦,៣២-រឿងវិលវិញណាបង ១៩៦៦,៣៣-រឿងក្បូនអណ្ដែត ១៩៦៧,៣៤-រឿងពៅឈូកស ១៩៦៧,៣៥-រឿងអកលាទ្រនំ ១៩៦៧,៣៦-រឿងស្អប់ជំពប់លើ ១៩៦៧,៣៧-រឿងនាងកែវណាម៉ា ១៩៦៧,៣៨-រឿងទឹកភ្នែកលើខ្នងភ្នំ ១៩៦៧,៣៩-រឿងវាសនាអកុសល ១៩៦៨,៤០-រឿងក្រៃថោងក្រពើឆារ៉ាវ៉ាន់ ១៩៦៨ ។ ៤១-រឿងស្អែកអូនលាបងហើយ ១៩៦៨,៤២-រឿងបំណុលជីវិត ១៩៦៩,៤៣-រឿងចំប៉ាថោង ១៩៦៩,៤៤-រឿងសុរិយ័នកុមារនិងព្រះនាងទេពធីតា ១៩៦៩, ៤៥-រឿងស្រីគ្រប់លក្ខណ៍ ១៩៧០,៤៦-រឿងពស់កេងកងភាគ១ ១៩៧០,៤៧-រឿងបុត្រាព្រះអាទិត្យសងឈាមម្ដាយ ១៩៧០,៤៨-រឿងស្ដេចដំរីស ១៩៧០,៤៩-រឿងជីវិតផ្សងព្រេង ១៩៧០.៥០-រឿងវង្វេងព្រោះស្នេហ៍ ១៩៧២ ។ ៥១-រឿងពស់កេងកងភាគ២ ១៩៧២,៥២-រឿងបុប្ផាអង្គរ ១៩៧២,៥៣-រឿងជីវិតថ្មី ១៩៧២,៥៤-រឿងម៉ាក់ថឺង ១៩៧៣,៥៥-រឿងភីសាវង់អូនអើយ ១៩៧៣,៥៦-រឿងដៃដែក៣២ ១៩៧៣,៥៧-រឿងផ្ញើកងចងដៃ ១៩៧៤,៥៨-រឿងក្រពើលោកនេន ១៩៧៤,៥៩-រឿងធីតាសក់ពស់ ១៩៧៤,៦០-រឿងថ្ងៃលិចអូនស្រណោះ ១៩៧៥ ។ ៦១-រឿងឆាយាលើអង្គរ ,៦២-រឿងសន្ធិប្រកាស,៦៣-រឿងឈប់ស្រឡាញ់អូនទៅ (មិនទាន់បានបញ្ចាំង),៦៤-រឿងធីតាសក់ពស់ភាគ២ (មិនទាន់បានបញ្ចាំង),៦៥-រឿងទុំទាវ (Version 1975) (មិនទាន់បានបញ្ចាំង) ។
ក្រៅពីនោះមានស្នាដៃដែលអ្នកស្រីឌី សាវ៉េតបានចូលរួមសម្តែងនាពេលបច្ចុប្បន្នមួយចំនួនទៀត ៕
ចែករំលែកព័តមាននេះ