ក្រុមអាជីវកម្មជីរណ្តៅដីយកអាចម៍ដីលក់ បានជីករណ្តៅដីជ្រៅរហូតដល់ក្បាលប្រេត ដែលមានជម្រៅជាង១០ម៉ែត្រ បង្កឲ្យបាក់ដីលំនៅឋាន និងដីស្រែរបស់ប្រជាពលរដ្ឋអស់ចំនួន០៨គ្រួសារ ស្ថិតនៅភូមិតារាងបាល់ ក្នុងសង្កាត់គយត្របែក ក្រុងស្វាយរៀង។ហើយប្រជាពលរដ្ឋក៏បានសំណូមពរ សូមឲ្យអាជ្ញាធរក្រុងស្វាយរៀង មេត្តាចុះពិនិត្យ
ខេត្តស្វាយរៀង ៖ ក្រុមអាជីវកម្មជីរណ្តៅដីយកអាចម៍ដីលក់ បានជីករណ្តៅដីជ្រៅរហូតដល់ក្បាលប្រេត ដែលមានជម្រៅជាង១០ម៉ែត្រ បង្កឲ្យបាក់ដីលំនៅឋាន និងដីស្រែរបស់ប្រជាពលរដ្ឋអស់ចំនួន០៨គ្រួសារ ស្ថិតនៅភូមិតារាងបាល់ ក្នុងសង្កាត់គយត្របែក ក្រុងស្វាយរៀង។ហើយប្រជាពលរដ្ឋក៏បានសំណូមពរ សូមឲ្យអាជ្ញាធរក្រុងស្វាយរៀង មេត្តាចុះពិនិត្យដោះស្រាយដល់ប្រជាពលរដ្ឋចំនួន៨គ្រួសារ ដោយចោទក្រុមអាជីវកម្មជីករណ្តៅដីយកអាចម៍ដីលក់ ដែលជីកជម្រៅជាង១០ម៉ែត្រ បង្កឲ្យបាក់ដីលំនៅឋាន និងដីស្រែរបស់ពួកគាត់ទាំង៨គ្រួសារ។ ការសំណូមពរនេះ កើតឡើងនៅព្រឹកថ្ងៃទី១៧ ខែមករា ឆ្នាំ២០២៣ ស្ថិតនៅភូមិតារាងបាល់ សង្កាត់គយត្របែក ក្រុងស្វាយរៀង។
បើតាមក្រុមប្រឹក្សាសង្កាត់គយត្របែក បានឲ្យដឹងថា ម្ចាស់អាជីវកម្មជីករណ្តៅដី យកអាចម៍ដីលក់នេះ មានឈ្មោះ តូ ភេទប្រុស ហើយនៅក្នុងកិច្ចសន្យានៃច្បាប់ធ្វើអាជីវកម្ម គឺជីករណ្តៅ ជម្រៅ០៥ម៉ែត្រ និងទុកចំណីរណ្តៅទំហំ០៥ម៉ែត្រ បើមានផលប៉ះពាល់ត្រូវសងសំណងជូនប្រជាពលរដ្ឋ។ ក៏ប៉ុន្តែជាក់ស្តែង ឈ្មោះតូ ម្ចាស់អាជីវកម្មនោះ អនុវត្តខុសកិច្ចសន្យា ដោយជីករណ្តៅដីជ្រៅជម្រៅ១០ម៉ែត្រ ហើយទុកចិញ្ចើមចំណីរណ្តៅដីតែ២ម៉ែត្រ បង្កឲ្យបាក់ដីលំនៅឋាន និងដីស្រែរបស់ប្រជាពលរដ្ឋ ហើយដឹកដីលើសទ្រុងបង្កឲ្យធ្លាក់អាចម៍ដីលើផ្លូវក្រាលកៅស៊ូ បង្កឲ្យមានការហុយ និងរអិលពិបាកក្នុងការធ្វើដំណើររបស់ប្រជាពលរដ្ឋទៀតផង។
ប្រជាពលរដ្ឋដែលរងផលប៉ះពាល់ខាងលើនេះ រួមមាន ៖ ១- ឈ្មោះ សុខ ចន្នី ភេទស្រី អាយុ៥១ឆ្នាំ បានបាក់ដីលំនៅឋាន ដែលមានបណ្តោយប្រមាណ២០ម៉ែត្រ និងបាក់ដីស្រែ និងគ្រួសារលោកយាយឡូ បូ អាយុ៦១ឆ្នាំ ដែលមានចំនួន០៣គ្រួសារទៀត។ ២- ឈ្មោះ គង់ សាវឿន ភេទប្រុស អាយុ៣៨ឆ្នាំ មុខរបរជាគ្រូបង្រៀន ប៉ះពាល់បណ្តោយ១៥ម៉ែត្រ ៣- ឈ្មោះ បិន ធុង ភេទស្រី អាយុ៣៤ឆ្នាំ ប៉ះពាល់បណ្តោយ១៥ម៉ែត្រ៣ និងឈ្មោះ បិន ឡា ភេទប្រុស អាយុ៣៦ឆ្នាំ ប៉ះពាល់បណ្តោយ១៥ម៉ែត្រ។
ចំណែកម្ចាស់ដីចំនួន០៣គ្រួសារកំពុងព្រួយបារម្ភរឿងបាក់ដីលំនៅឋាន និងដីស្រែរបស់គាត់ រួមមាន ទី១- ឈ្មោះ វ៉ាត ភេទប្រុស អាយុ៦២ឆ្នាំ (ដីស្រែ មិនទាន់បាក់ដល់នោះទេ) ទី២- ឈ្មោះ កូវ ផាន់ណា ភេទស្រី អាយុ៦១ឆ្នាំ (ដីលំនៅឋាន មិនទាន់បាក់ដីដល់នោះទេ) និងទី៣-ឈ្មោះ ឡុច វណ្ណី ភេទប្រុស អាយុ៥០ឆ្នាំ (ដីលំនៅឋាន គឺមិនទាន់បាក់ដល់នោះទេ)។
អាជ្ញាធរមូលដ្ឋានបានឲ្យដឹងថា មូលហេតុដែលប្រជាពលរដ្ឋតវ៉ា និងសំណូមពរនេះ ដោយសារតែនៅពេលមានភ្លៀងមក ក៏បានបណ្តាលឱ្យបាក់ដីស្រែ និងដីលំនៅឋានរបស់ពួកគាត់ ហើយនៅពេលប្រជាពលរដ្ឋតវ៉ា ម្ចាស់អាជីវកម្មឈ្មោះតូ បានសន្យាថា ដឹកដីចាក់លុបឲ្យប្រជាពលរដ្ឋវិញ ស្រាប់តែថ្ងៃទី១៦ ខែមករា ឆ្នាំ២០២៣ ឈ្មោះតូ បានដកគ្រឿងចក្រចេញទៅបាត់អស់ ដោយពុំទាន់បានដឹកដីចាក់លុបឲ្យប្រជាពលរដ្ឋនោះឡើយ។ ចំណែកប្រជាពលរដ្ឋ០៤គ្រួសារទៀត ក៏មានការភ័យខ្លាចពេលរដូវភ្លៀងមកដល់ អាចបាក់ដល់ដីលំនៅឋាន និងដីស្រែរបស់ពួកគាត់ទៀត។
ទាក់ទិនករណីខាងលើនេះ លោក បាត់ សាក់ ប្រធានការិយាយល័យធនធានរ៉ែ នៃមន្ទីររ៉ែ និងថានពលខេត្ត បានឲ្យដឹងថា ច្បាប់អនុញ្ញាតិ គឺឲ្យជីកជម្រៅ៥ម៉ែត្រ និងទុកចំណីរណ្តៅ០៥ម៉ែត្រ បើម្ចាស់អាជីវកម្មជីកដល់១០ម៉ែត្រ ចាំលោកចុះទៅពិនិត្យមើល បើមានផលប៉ះពាល់ដីស្រែប្រជាពលរដ្ឋ លោកនឹងសុំគោលការណ៍កោះហៅដោះស្រាយ ហើយថ្ងៃទី១៧ ខែមករា ឆ្នាំ២០២៣នេះ លោកជាប់រវល់ទទួលខាងក្រសួងចុះមកធ្វើសវនៈកម្ម។
ចំណែកឯលោក តូ ម្ចាស់អាជីវកម្មជីករណ្តៅដីយកអាចម៍ដីលក់វិញ ក៏បានប្រាប់ឲ្យដឹងដែរថា លោកមិនគេចវេសទេ គាត់បានប្រាប់ម្ចាស់ដីដែលប៉ះពាល់ហើយថា លោកនឹងចាក់ដីបំពេញកន្លែងដែលបាក់ឲ្យស្មើដូចដើមវិញ ក៏ប៉ុន្តែដោយសារមានភ្លៀង មិនអាចដឹកដីចូលទៅចាក់បាន ទើបខ្លួនដឹកគ្រឿងចក្រចេញ ចាំមើលរាំងភ្លៀង ឬចូលឆ្នាំចិនហើយ ខ្លួននឹងដឹកដីមកចាក់លុបឲ្យស្មើវិញហើយ។
លោក តូ បានបញ្ជាក់ទៀតថា ការជីកជ្រៅ ដោយខ្លួនទិញដីថ្លៃ ១ហិកតា៧ម៉ឺនដុល្លារ បើជីកជម្រៅ៥ម៉ែត្រគឺខាត។ ហើយច្បាប់ឲ្យជីកជម្រៅ៥ម៉ែត្រ ខ្លួនបានបង់សួយសារអាករ រួចហើយ រីឯជីកថែមជម្រៅ៥ម៉ែត្រទៀត (១០ម៉ែត្រ) គឺបង់សួយសារអាករឲ្យមន្ទីររ៉ែ និងថាមពលខេត្តស្វាយរៀងបន្ថែម គឺមិនខុសច្បាប់ទេ មន្ទីរអនុញ្ញាតិ និងបង់សួយសារអាករ រួចហើយ បើមិនបង់ប្រាក់ឲ្យសាកមើល មិនអាចជីករណ្តៅដីបានទេ ទាន គឺជីកដល់ក្បាលប្រេតយកលុយចែកគ្នា ទើបបានសុខ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ