អតីតតារារួមជំនាន់ចំនួនបានឆ្លៀតពេលវេលាមកជួបជុំជាមួយលោក សុវណ្ណ មុន្នី តាមការគ្រោងទុក បន្ទាប់ពីលោកកំពុងមានវត្តមាននៅក្នុងស្រុកខ្មែរ។ អតីតតារាសម្តែងរួមជំនាន់ដែលបានមកជួបលោក សុវណ្ណ មុន្នី នាពេលនេះ មានដូចជា
រាជធានីភ្នំពេញ ៖ អតីតតារារួមជំនាន់ចំនួនបានឆ្លៀតពេលវេលាមកជួបជុំជាមួយលោក សុវណ្ណ មុន្នី តាមការគ្រោងទុក បន្ទាប់ពីលោកកំពុងមានវត្តមាននៅក្នុងស្រុកខ្មែរ។ អតីតតារាសម្តែងរួមជំនាន់ដែលបានមកជួបលោក សុវណ្ណ មុន្នី នាពេលនេះ មានដូចជា លោក ទេព រិន ដារ៉ូ, លោក ហម ឈរ៉ា, លោក យុត្ថារ៉ា ឆានី និងលោក គង់ សុភី, អ្នកស្រី អ៊ឹម សុវណ្ណផល្លា និងអ្នកនាង ឯក អមរា ជាដើម ។ល។ ហើយពិធីជួបជុំនេះ បានធ្វើឡើងកាលពីថ្ងៃទី២៧ ខែធ្នូ ឆ្នាំ២០២២ នៅរមណីយដ្ឋានមួយកន្លែងក្នុងរាជធានីភ្នំពេញ។
តាមរយៈរូបភាពដែលត្រូវបានចែកចាយលើបណ្តាញសង្គមដោយលោក ទេព រិនដារ៉ូ និងលោក ហម ឈរ៉ា នោះបង្ហាញថា ពិធីរបស់សិល្បៈជើងចាស់នាទសវត្សន៍ឆ្នាំ៩០នេះ ពិតជាមានភាពសប្បាយរីករាយ និងស្និទ្ធស្នាល ត្បិតពួកគេម្នាក់ៗរវល់ការងាររៀងខ្លួន ដោយមិនងាយបានជួបជុំគ្នាឡើយ។
ជាមួយរូបភាពជួបជុំនេះដែរ តារាសម្តែងដែលកំពុងបន្តអាជីពសិល្បៈដដែលលោក ទេព រិន ដារ៉ូ បានបង្ហោះភ្ជាប់ជាមួយនឹងសំណេរថា «ជួបបងប្អូនរួមអាជីពម្តង ខានជួបគ្នាយូរឆ្នាំមកហើយ កម្រមានពេលណាស់ រវល់រៀងខ្លួន បានប្អូនប្រុស សុវណ្ណមុន្នី មកពីអាមេរិករៀបចំការជួបជុំនេះ ទោះមិនបានគ្រប់គ្នាក៏ដោយ ..! អរគុណណាស់ចំពោះប្អូនប្រុស ជាអ្នកឧបត្ថម្ភកម្មវិធីនេះ សូមជួបប្រទះតែសេចក្តីសុខសប្បាយ សំណាងល្អ សុខភាពល្អ នឹងជោគជ័យការងារ ទាំងអស់គ្នា»។
ជាការកត់សម្គាល់អតីតតារាសម្តែងនាទសវត្សន៍ឆ្នាំ៩០ លោក សុវណ្ណ មុន្នី បានបង្ហាញវត្តមានមកលេងស្រុកខ្មែរជាថ្មីម្តងទៀត បន្ទាប់លោកបានចាកចេញទៅសាងជីវភាពថ្មីលើទឹកដីអាមេរិកប្រមាណជិត២០ឆ្នាំមកនេះ។ លោកបានមកដល់ស្រុកខ្មែរ នៅវេលាម៉ោង១២យប់ថ្ងៃ ទី២៤ ខែធ្នូ ឆ្នាំ២០២២នេះ ក្នុងដំណើរកំសាន្ត និងស្នាក់នៅទឹកដីកំណើតរយៈពេល៣សប្តាហ៍។
លោក សុវណ្ណ មុន្នី បានអះអាងប្រាប់កោះសន្តិភាពតាមសារអេឡិចត្រូនិចថា ការមកលេងស្រុកខ្មែរនាពេលនេះ គឺជាលើកទី៥ហើយ ខណៈពេលលើកនេះលោកមកតែម្នាក់ឯងប៉ុណ្ណោះ ពោលគឺមិនបានមកទាំងគ្រួសារដូចជាលើកមុនៗឡើយ។ លោកបញ្ជាក់ថា គោលបំណងសំខាន់ដែលលោកមកលេងស្រុកខ្មែរនាពេលនេះ គឺមិនខុសពីលើកមុនៗឡើយ គឺលោកមកលេងគ្រួសារ និងមិត្តភក្តិចាស់ៗ ដោយសារតែលោកមានការនឹករលឹកពួកគេដែលបែកគ្នាយូរមកហើយ។
ក្នុងវ័យ៥៤ឆ្នាំលោក សុវណ្ណ មុន្នី បានលើកឡើងថា លោកបានចេញទៅរស់នៅអាមេរិកប្រមាណជា២០ឆ្នាំហើយ តែលោកនៅតែនឹករលឹកមិត្តភក្តិ និងទឹកដីកំណើតជានិច្ច ហើយលោកតែងតែឆ្លៀតពេលទំនេរមកលេងស្រុកកំណើតជាបន្តបន្ទាប់។ លោកបន្ថែមថា ការមកលេងស្រុកខ្មែរម្តងៗ លោកសង្កេតឃើញពីកាអភិវឌ្ឍន៍របស់ប្រទេសជាតិមានការរីកចម្រើនថ្មីៗជាបន្តបន្ទាប់ ដែលធ្វើអោយលោកស្ទើរលេងស្គាល់ទីកន្លែងចាស់ដែលលោកធ្លាប់នៅ។
យ៉ាងណាបើតាមលោក សុវណ្ណ មុន្នី លោកពិតជាមានអារម្មណ៍រីករាយនៅពេលបានមកលេងស្រុកកំណើតម្តងៗ ហើយបើមានឱកាសលោកនឹងចូលរួមថតភាពយន្តជាថ្មី ប្រសិនបើផលិតកម្មណាមួយចង់អោយលោកចូលរួមសម្តែង។ បច្ចុប្បន្នលោកបានកសាងគ្រួសារនៅលើទឹកដីអាមេរិក និងមានកូនចំនួន២នាក់ហើយ៕
ចែករំលែកព័តមាននេះ