រាជធានីភ្នំពេញ ៖ នៅពេលដែលមនុស្សកំពុងវក់វីលេងទូរស័ព្ទ ឬក៏ប្រើកុំព្យូទ័រនោះវាបានកំពុងតែបំផ្លាញភ្នែកប្រជាជនកម្ពុជាជាច្រើននាក់។ បញ្ហាភ្នែកខ្លះរហូតដល់ខ្វាក់ភ្នែកទាមទារអោយមានការយកចិត្តទុកដាក់ជាសំខាន់ផងដែរ។កុំធ្វេសប្រហែសរឿងសុខភាពភ្នែក ជាពិសេសអាណាព្យាបាលកុមារានិងកុមារីនានាដែលបច្ចុប្បន្ននេះកំណើននៃការប្រើប្រាស់ឧបករណ៍អេឡិចត្រូនិចកំពុងតែបង្កើន និងដាក់សម្ពាធបញ្ហាសុខភាពភ្នែកពួកគេ។
តាមទិដ្ឋភាពទូទៅ និងការសិក្សាដែលគេធ្លាប់បានធ្វើពីមុនមកបញ្ហាភ្នែកនេះពិតជាបញ្ហាមួយដែលយើងគួរតែយកចិត្តទុកដាក់
តាមការសិក្សាមួយ ដែលគេធ្លាប់បានធ្វើហើយត្រូវបានផ្សព្វផ្សាយកាលពីឆ្នាំ២០២១ បានអះអាងថា ប្រជាជនកម្ពុជាចំនួនប្រមាណជា ៥៧.៥០០នាក់បានក្លាយជាអ្នកពិការភ្នែកជារៀងរាល់ឆ្នាំខណៈដែលកាលពីឆ្នាំ២០០០ គឺមានត្រឹមតែប្រមាណជា២៨.៨០០នាក់ក្នុង១ឆ្នាំ។ ជំងឺភ្នែកឡើងបាយត្រូវបានគេកំណត់ថា ជាមូលហេតុចម្បងនៃពិការភ្នែកនៅក្នុងប្រទេសកម្ពុជា។ របាយការណ៍ឆ្នាំ២០១៩ នៃការវា.យតម្លៃរហ័ស ថ្នាក់ជាតិរបស់កម្ពុជាស្តីពីពិការភាពភ្នែកដែលអាចជៀសបាន បានរកឃើញថា ៩២,២ ភាគរយនៃមូលហេតុទាំងអស់នៃភាពពិការភ្នែក គឺអាចបញ្ចៀសបាន ហើយ៨០,៩ភាគរយអាចព្យាបាលបាន និង ៥,៩ ភាគរយអាចការពារបានជាមួយនឹងការថែទាំភ្នែកបឋម។
ដូច្នេះហើយ សូមកុំប្រហែស ហើយសូមយកចិត្តទុកដាក់លើការថែទាំភ្នែករបស់យើងទាំងអស់គ្នា ហើយសម្រាប់កុមារាកុមារី ដែលគាត់មិនទាន់ដឹងរឿងនេះអាណាព្យាបាល គឺជាអ្នកដែលគួរតែជួយយកចិត្តទុកដាក់ចំពោះបុត្រធីតារបស់ខ្លួន។តើមូលហេតុអ្វីបានជាភ្នែកមនុស្សមានកើតជំងឺឡើងបាយ ? ឯកសារវេជ្ជសាស្ត្របាន បញ្ជាក់ថា ជំងឺភ្នែកឡើងបាយ គឺបណ្តាលមកពីការប្រមូលផ្តុំប្រូតេអ៊ីននៅក្នុងភ្នែក ហើយជាធម្មតាវិវត្តន៍ទៅជាជំងឺនេះគឺដោយសារតែអាយុតែប៉ុណ្ណោះ។ ប៉ុន្តែទោះជាយ៉ាងណាក៏ដោយ ជំងឺនេះក៏អាចលេចឡើងលើមនុស្សទូទៅដោយសារតែការរងរបួសភ្នែកដែលបណ្តាលមកពីកត្តាផ្សេងៗដោយនៅក្នុងនោះករណីប្រើប្រាស់ភ្នែកជ្រុលដោយគ្មានសម្រាកក៏ជាកត្តាមួយ ឬបន្ទាប់ពីការវះកាត់ភ្នែកដោយបញ្ហាផ្សេងទៀត។
ជំងឺទាំងនេះក៏អាចមានវត្តមានតាំងពីកំណើតផងដែរ នៅក្នុងប្រទេសក្រីក្រជាច្រើន ដែលការថែទាំសុខភាព និងការព្យាបាលនៅមានកម្រិត ហើយជំងឺភ្នែកឡើងបាយដែលកើតមានចំពោះមនុស្សវ័យកុមារអាចជាមូលហេតុចម្បងនៃភាពងងឹតភ្នែករបស់ពួកគេតែម្តង។
តាមការសិក្សាស្រាវជ្រាវដែលយើងបានធ្វើលើឯកសារផ្សេងៗបានបង្ហាញថា រហូតមកដល់ពេលនេះជំងឺដែលពាក់ព័ន្ធនឹងភ្នែក គឺមានប្រមាណជា១៩ប្រភេទ ប៉ុន្តែជាទូទៅនៅក្នុងពេលដែលពិភពលោកស្ថិតនៅក្នុងចរន្តនៃឌីជីថលនីយកម្មខ្លាំងពេកភ្នែករបស់មនុស្សជាតិកាន់តែរងសម្ពាធកាន់តែខ្លាំងជាងសម័យកាលមុនៗពីព្រោះតាំងពីក្រោកពីដំណេករហូតចូលដំណេកវិញ គឺភ្នែករបស់មនុស្សសឹងតែស្ថិតនៅជាប់នឹងឧបករណ៍អេឡិចត្រូនិចរាប់តាំងពីសកម្មភាពទំនាក់ទំនងសង្គមការងារការកម្សាន្តការទទួលចំណេះដឹងការស្វែងរកម្ហូបអាហារទទួលទានតាមទូរស័ព្ទជាដើម។
ក្រុមវេជ្ជបណ្ឌិតខាងចក្ខុបានអះអាងថា អ្នកណាក៏ដោយដែលប្រើប្រាស់ភ្នែកច្រើនម៉ោង ដោយមិនបានសម្រាក ឬប្រើប្រាស់វាមិនត្រឹមត្រូវដូចជាការធ្វើការនៅកុំព្យូទ័រ ការលេងកម្សាន្ត នឹងឧបករណ៍អេឡិចត្រូនិចយូរ ឬការបើកបរផ្លូវឆ្ងាយ គឺដឹងតែនឹងធ្វើឲ្យភ្នែកមានបញ្ហា ដោយ អាការៈ ដំបូងស្រវាំង ឬធ្វើឲ្យរបកគំហើញរបស់ភ្នែកមានការធ្លាក់ចុះ ឈឺក្រហម ចុករោយ …។ល។
សរុបមកវិញ ដើម្បីសុខភាពភ្នែក យើងទាំងអស់គ្នាគួរតែចាប់ផ្តើមរកម្មវិធី ឬក៏លៃលកពេលវេលាណាមួយ ដើម្បីកាត់បន្ថយការប្រើប្រាស់ភ្នែកខ្លាំងហួសប្រមាណ ជាពិសេស គឺការប្រាស័យនឹងពពួកឧបករណ៍អេឡិចត្រូនិច។
តាមឯកសារវេជ្ជសាស្ត្រចំណីដ៏ត្រជាក់របស់ចក្ខុប្រាសាទ និងប្រសើរភ្នែក គឺទេសភាពបៃតង។មិនតែប៉ុណ្ណោះ ពួកគេក៏បានផ្តល់ជាមតិយោបល់ថា រាល់ការប្រើប្រាស់ភ្នែកយើងទាំងអស់គ្នាគួរលៃលកបិទភ្នែក ឬធ្មេចភ្នែកឲ្យបានញឹកញាប់តាមដែលអាចធ្វើបាន ហើយប្រការដែលគួរជៀសវាង គឺកុំសម្លឹងឬក៏ប្រើប្រាស់ភ្នែកដោយមិនបិទ ឬធ្មេញនៅក្នុងរយៈពេលយូរ៕ដោយៈ ហេង ចេស្តារ
ចែករំលែកព័តមាននេះ