ប្រមុខរាជរដ្ឋាភិបាលអំពាវនាវឱ្យគ្រប់គ្នាថែរក្សាសន្តិភាពនិងស្ថិរភាពជាតិ
រាជធានីភ្នំពេញ ៖ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២១ មេសា ឆ្នាំ២០១៧
រាជធានីភ្នំពេញ ៖ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២១ មេសា ឆ្នាំ២០១៧
រាជធានីភ្នំពេញ ៖ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី២១ មេសា ឆ្នាំ២០១៧ ក្នុងឱកាសអញ្ជើញសំណេះសំណាលជាមួយមន្ត្រីក្រសួង ស្ថាប័នជាសមាជិក សមាជិកាគណបក្សនៅសាលមហោស្រពកោះពេជ្រចំនួនជាង៤ពាន់នាក់ មកពីក្រសួងទេសចរណ៍ ក្រសួងការងារនិងបណ្តុះបណ្តាលវិជ្ជាជីវៈ ក្រសួងវប្បធម៌ និងវិចិត្រសិល្បៈ និងមជ្ឈមណ្ឌលសកម្មភាពកម្ចាត់មីនកម្ពុជា នៅតែរំលឹកដល់មន្ត្រីរាជការនៅតាមស្ថាប័នក្រសួងអំពីអតីតកាលរបស់យើងដែលបានឆ្លងកាត់ពីការបែកបាក់មកកាន់សន្តិភាពមិនធ្លាប់មានក្នុងប្រវត្តិសាស្ត្រ ។
សម្តេចតេជោប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជាបានសម្តែងនូវការរីករាយ ដែលបានមកជួបជុំសំណេះសំណាលជាមួយថ្នាក់ដឹកនាំគណបក្ស មន្ត្រីរាជការដែលជាសមាជិក សមាជិកាមកពីស្ថាប័នទាំង៤ ដោយបានជូនពរសម្តេច ឯកឧត្តម លោកជំទាវ អស់លោក លោកស្រីមន្ត្រីរាជការទាំងអស់សម្រាប់ឆ្នាំថ្មីដែលទើបចូលមកដល់ថ្មីៗនេះ ។ សម្តេចបានមានប្រសាសន៍ថា ការជួបជុំនៅថ្ងៃនេះគឺជាការអញ្ជើញតែសមាជិក សមាជិកាតែប៉ុណ្ណោះដើម្បីឈានទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅពេលខាងមុខ និងការបោះឆ្នោតជ្រើសរើសតំណាងរាស្ត្រឆ្នាំ២០១៨ ។
សម្តេចតេជោក៏បានសម្តែងការកោតសរសើរចំពោះការខិតខំទាំងអស់របស់គណបក្សគ្រប់ថ្នាក់ គ្រប់ស្ថាប័ន មន្ត្រីគណបក្ស និងសមាជិក សមាជិកាបក្សដែលបានខិតខំរួមចំណែកធ្វើឲ្យប្រទេសជាតិរបស់យើងមានការរីកលូតលាស់ពីដំណាក់កាលមួយមកកាន់ដំណាក់កាលមួយ ដែលកិច្ចការទាំងអស់សុទ្ធតែមានតួនាទីរបស់គណបក្សប្រជាជនកម្ពុជា ។
សម្តេចតេជោបានរំលឹកជូនសមាជិកសមាជិកាបក្សទាំងអស់ពីប្រវត្តិសាស្ត្ររបស់ប្រទេសជាតិយើងទាំងភាពរុងរឿង និងការធ្លាក់ចុះនៃការឈឺចាប់ ។ ទាក់ទងនឹងបញ្ហាសន្តិភាពក្នុងរយៈកាលកន្លងទៅនេះ សម្តេចតេជោមានប្រសាសន៍ថា គណបក្សបានបំពេញតួនាទីសំខាន់ខ្លាំងណាស់ ជាពិសេសការសង្គ្រោះប្រទេសឲ្យរួចផុតពីរបបប្រល័យពូជសាសន៍ និងការទប់ស្កាត់មិនឲ្យរបបប្រល័យពូជសាសន៍វិលត្រឡប់មកវិញ ។ ដំណើរការស្វែងរកដំណោះស្រាយសន្តិភាព ហើយរយៈពេលចុងក្រោយជារយៈពេលដ៏សំខាន់ដែលគណបក្សបានដើរតួនាទីធ្វើការបង្រួបបង្រួមប្រទេសដែលធ្លាប់តែជាប្រទេសមួយមានតំបន់ត្រួតត្រាច្រើនមិនតិចជាងពីរក្នុងពេលតែមួយ មកកាន់ប្រទេសកម្ពុជាមួយមានតំបន់ត្រួតត្រាតែមួយ ។
ក្នុងន័យនេះ សម្តេចតេជោចង់បង្ហាញឲ្យឃើញឡើងវិញអំពីគុណតម្លៃនៃសន្តិភាពដែលយើងរកបានទាំងលំបាក ហើយក៏មានបំណងសូមឲ្យប្រជាជាតិយើងទាំងអស់ចូលរួមថែរក្សាឲ្យបាននូវសុខសន្តិភាព ស្ថិរភាពដែលយើងទទួលបានរហូតមកដល់សព្វថ្ងៃនេះដើម្បីភាពសុខដុមរមនានៃប្រជាជាតិយើង ៕
ចែករំលែកព័តមាននេះ