ខេត្ត5នៅភាគពាយព្យធ្វើពិធីដុតកម្ទេចគ្រឿងញៀ.នជាង16គ.ក្រ
ខេត្តបាត់ដំបង ៖ ខេត្តចំនួន៥នៅភាគពាយព្យនៃប្រទេសកម្ពុជា ក្នុងឆ្នាំនេះបានរួមគ្នារៀបចំពិធីដុតបំផ្លាញគ្រឿងញៀ.នជាង១៦គីឡូក្រាម
ខេត្តបាត់ដំបង ៖ ខេត្តចំនួន៥នៅភាគពាយព្យនៃប្រទេសកម្ពុជា ក្នុងឆ្នាំនេះបានរួមគ្នារៀបចំពិធីដុតបំផ្លាញគ្រឿងញៀនជាង១៦គីឡូក្រាម តាមអំណាចសាលក្រមស្ថាពររបស់តុលាការ ដែលធ្វើឡើងនៅទីលានបាល់ទាត់ ក្នុងទីរួមខេត្តបាត់ដំបង នាព្រឹកថ្ងៃទី១ មេសា ក្រោមអធិបតីភាពលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ដែលមានមន្ត្រីរាជការ សមត្ថកិច្ចគ្រប់ស្ថាប័នមកពីតាមបណ្ដាខេត្តទាំង៥ សិស្ស និស្សិត និងពលរដ្ឋចូលរួមប្រមាណជាង៥ពាន់នាក់ ។
អយ្យការអមសាលាដំបូងខេត្តបាត់ដំបង លោក នួន សាន បានថ្លែងថា ខេត្តទាំង៥ដែលបានរៀបចំពិធីដុតបំផ្លាញគ្រឿងញៀនរួមគ្នានៅក្នុងឆ្នាំនេះមាន ខេត្តបាត់ដំបង ខេត្តបន្ទាយមានជ័យ ខេត្តប៉ៃលិន ខេត្តពោធិ៍សាត់ និងខេត្តកំពង់ឆ្នាំង ។ លោកប្រាប់ថា ថ្នាំញៀនដែលត្រូវដុតបំផ្លាញចោលនេះសរុបមានចំនួន១៦៥៨៧,៦៣ក្រាម និង១៨កញ្ចប់ ដែលជាថ្នាំញៀនប្រភេទមេតំហ្វេតាមីនWy(យ៉ាម៉ា) និងប្រភេទមេតំហ្វេតាមីនICE(ម៉ាទឹកកក) និងម្សៅសម្រាប់ផលិតគ្រឿងញៀនចំនួន៧៥៩,១ក្រាមផងដែរ ។ លោក នួន សាន បានបញ្ជាក់ថា វត្ថុតាងដែលសម្រេចរឹបអូស និងដុតបំផ្លាញចោលនៅថ្ងៃនេះ គឺយោងតាមអំណាចសាលក្រមស្ថាពរនៃសាលាដំបូងខេត្តទាំង៥ ដែលមានចំនួនសរុប២២៦សាលក្រម ដែលបានបិទបញ្ចប់ក្នុងរយៈពេលមួយឆ្នាំកន្លងទៅនេះ ។
លោក ច័ន្ទ សុផល អភិបាលខេត្តបាត់ដំបង ដែលតំណាងឲ្យអភិបាលខេត្តទាំង៥ បានថ្លែងថា ក្រសួងយុត្តិធម៌បានកំណត់យកខេត្តបាត់ដំបង ជាទីតាំងសម្រាប់រៀបចំពិធីដុតបំផ្លាញវត្ថុតាងគ្រឿងញៀន តាមអំណាចសាលក្រមស្ថាពររបស់សាលាដំបូងខេត្តចំនួន៥នេះ ក្នុងគោលបំណងបង្ហាញពីស្នាដៃសម្រេចបាន ក្នុងការចូលរួមអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនរបស់ខ្លួន ក្នុងរយៈពេលមួយឆ្នាំកន្លងទៅនេះ ដែលបានអនុវត្តផែនការរបស់រាជរដ្ឋាភិបាលក្នុងយុទ្ធនាការប្រយុទ្ធប្រឆាំងគ្រឿងញៀន ។
គ្រឿងញៀនបានបង្កឲ្យមានបញ្ហាប្រឈមជាច្រើនដល់អ្នកប្រើប្រាស់ផ្ទាល់ ក្រុមគ្រូសារ និងសង្គមជាតិ ។ លោកអភិបាលខេត្ត មានប្រសាសន៍ថា បើទោះជាយើងមិនបានប្រើប្រាស់ថ្នាំញៀន តែបើនៅក្នុងសហគមន៍មានសមាជិកគ្រួសាណាមួយពាក់ព័ន្ធគ្រឿងញៀន ពិតជាធ្វើឲ្យប៉ះពាល់ដោយផ្ទាល់ដល់គ្រួសារ និងដល់សហគមន៍។ ដូច្នេះយើងទាំងអស់គ្នាត្រូវរួមគ្នាទទូលខុសត្រូវ និងរួមគ្នាដោះស្រាយ ធ្វើយ៉ាងណាឲ្យសហគមន៍យើងចៀសឲ្យផុតពីឥទ្ធិពលគ្រឿងញៀន និងធ្វើយ៉ាងណាឲ្យ«ជីវិតយើង សហគមន៍យើងគ្មានគ្រឿងញៀន» ។
នៅក្នុងពិធីដុតបំផ្លាញគ្រឿងញៀននេះ រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា បានថ្លែងទៅកាន់អ្នកចូលរួមថា កន្លងមកនេះ ព្រះរាជាណាចក្រកម្ពុជាយើង បានទទួលរងគ្រោះនូវការចរាចរ និងប្រើប្រាស់គ្រឿងញៀនខុសច្បាប់ជាហូរហែ ។ ក្នុងរយៈពេលប៉ុន្មានឆ្នាំចុងក្រោយនេះ មានការកើតចេញនូវសកម្មភាពជាច្រើន ដែលជនសង្គមងងឹតប៉ុនប៉ងយកកម្ពុជាជាគោលដៅផលិត និងកែច្នៃគ្រឿងញៀន។
លោកបានថ្លែងថា បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បច្ចុប្បន្ននេះអ្នកប្រើប្រាស់គ្រឿងញៀនមានការកើនឡើង ជាពិសេសស្រទាប់យុវវ័យ ដែលកំពុងរីករាលដាលតាំងពីទីប្រជុំជន ដល់ទីជនបទ។ របាយការណ៍បញ្ជាក់ថា ក្នុងឆ្នាំ២០១៦កន្លងទៅនេះ អ្នកប្រើប្រាស់គ្រឿងញៀនមានការកើនឡើងរហូតដល់ចំនួន២០.៦២៦នាក់ឯណោះ ។
នៅចំពោះមុខមហាជនរាប់ពាន់នាក់ លោកអង្គ វង្សវឌ្ឍានា បានមានប្រសាសន៍ថា នៅចុងឆ្នាំ២០១៦ កន្លងទៅនេះ រាជរដ្ឋាភិបាលបានប្រកាសដាច់ចេញនូវផែនការស្ដីពី «យុទ្ធនាការប្រយុទ្ធប្រឆាំងគ្រឿងញៀនខុសច្បាប់» ជាលើកទី១ ដែលមានរយៈពេល៦ខែ ដោយត្រូវផ្ដើមអនុវត្តចាប់ពីថ្ងៃទី១ មករា ឆ្នាំ២០១៧តទៅ ក្រោមការដឹកនាំរបស់សម្ដេចក្រឡាហោម ស ខេង និងលោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ។
លោករដ្ឋមន្ត្រីក្រសួងយុត្តិធម៌បានបញ្ជាក់នៅក្នុងពិធីដុតបំផ្លាញគ្រឿងញៀនថា ការដុតបំផ្លាញថ្នាំញៀនដ៏ច្រើនសន្ធឹកខាងលើនេះ គឺបានឆ្លុះបញ្ចាំងយ៉ាងច្បាស់នូវការខិតខំប្រឹងប្រែងប្រកបដោយស្មារតីទទូលខុសត្រូវខ្ពស់ពីសំណាក់ស្ថាប័នពាក់ព័ន្ធនានា ក្នុងការចូលររួមអនុវត្តច្បាប់ ។ ជាមួយគ្នានេះ លោកក៏សូមអំពាវនាវដល់ប្រជាពលរដ្ឋគ្រប់ទីកន្លែង បណ្ដាភោជនីយដ្ឋាន សណ្ឋាគារ ផ្ទះសំណាក់ និងអាជ្ញាធរមូលដ្ឋាន រួមទាំងស្ថាប័នពាក់ព័ន្ធទាំងអស់ ឲ្យបន្តចូលរួមកាន់តែសកម្មថែមទៀត ក្នុងការប្រយុទ្ធប្រឆាំងគ្រឿងញៀននេះដើម្បីជាប្រយោជន៍ដល់សង្គមជាតិយើង ៕
ចែករំលែកព័តមាននេះ