គ្រាន់តែពោលដល់ពាក្យថា «ខ្លាញ់ក្តាមអាំង» គឺស្រក់ទឹកមាត់បាត់ទៅហើយ។ សំខាន់រសជាតិខ្លាញ់ក្តាមអាំង គឺពិតជាមិនធម្មតានោះទេ ហេតុដូច្នេះហើយទើបភ្ញៀវទេសចរទាំងខ្មែរ និងបរទេស ទៅកម្សាន្តនៅភ្នំព្រះរាជទ្រព្យ ឬភ្នំឧត្តុង្គ ដែលជា
ខេត្តកណ្តាល ៖ គ្រាន់តែពោលដល់ពាក្យថា «ខ្លាញ់ក្តាមអាំង» គឺស្រក់ទឹកមាត់បាត់ទៅហើយ។ សំខាន់រសជាតិខ្លាញ់ក្តាមអាំង គឺពិតជាមិនធម្មតានោះទេ ហេតុដូច្នេះហើយទើបភ្ញៀវទេសចរទាំងខ្មែរ និងបរទេស ទៅកម្សាន្តនៅភ្នំព្រះរាជទ្រព្យ ឬភ្នំឧត្តុង្គ ដែលជារមណីយដ្ឋានទេសចរណ៍បែបប្រវត្តិសាស្ត្រមួយរបស់កម្ពុជា តែងតែជាវ «ខ្លាញ់ក្តាមអាំង» មកទទួលទាន។
អ្នកស្រី ណៃ ពិសី ដែលជាអ្នកលក់ខ្លាញ់ក្តាមអាំង ស្ថិតនៅតំបន់ភ្នំព្រះរាជទ្រព្យ ឬភ្នំឧត្តុង្គ នៃស្រុកពញ្ញាឮ ខេត្តកណ្តាល បានប្រាប់សារព័ត៌មានកោះសន្តិភាពថា ការប្រកបរបបលក់ «ខ្លាញ់ក្តាមអាំង» គឺអ្នកស្រីទើបតែចាប់ផ្តើមលក់ដូរក្នុងរយៈពេលពីរទៅបីខែនេះតែប៉ុណ្ណោះ តែគាត់ទទួលបានការគាំទ្រយ៉ាងខ្លាំងពីសំណាក់ភ្លៀវទេសចរដែលបានមកលេងកម្សាន្តនៅរមណីយដ្ឋានទេសចរណ៍បែបប្រវត្តិសាស្ត្រមួយនេះ។
ពិសី បានពោលបន្តថា កាលពីដំបូង គាត់លក់តែនំនេកបន្តិចបន្ទួចប៉ុណ្ណោះ ដូចជា នំជើងឆ្នាំង នំខ្មួញ និងនំក្រៀបជាដើម។ ប៉ុន្តែក្រោយមក ដោយមើលឃើញថា «ខ្លាញ់ក្តាមអាំង» ជាមុខម្ហូបដែលពេញនិយម ទើបអ្នកស្រីបានសម្រេចធ្វើការលក់ «ខ្លាញ់ក្តាមអាំង» បន្ថែមទៀត ដើម្បីរកចំណូលផ្គត់ផ្គង់ជីវភាពឱ្យកាន់តែប្រសើរឡើង។
ជាការពិត អ្នកស្រី ណៃ ពិសី លក់ដាច់ខ្លាំងណាស់ពីមួយថ្ងៃទៅមួយថ្ងៃ ជាពិសេសរាល់ថ្ងៃចុងសប្តាហ៍តែម្តង ខ្លាញ់ក្តាមអាំង ដែលគាត់លក់មួយថ្ងៃបានរហូតដល់ ៣០០ស្នូកឯណោះ។ ពោលប្រាប់មកកាន់អ្នកយកព័ត៌មានបណ្តើរ ឆ្លៀតលក់ដូរបណ្តើរ និងដៃលុញនំខ្មួញបណ្តើរ អ្នកស្រី ណៃ ពិសី ពោលរៀបរាប់ដោយទឹកមុខញញឹមថា សម្រាប់ប្រភេទនំខ្មួញវិញ គឺគាត់លក់នំប្រភេទនេះអស់រយៈពេល១០ឆ្នាំមកហើយ រីឯការលក់ឆាគ្រឿងខ្យង និងក្តាម ទើបតែលក់បានក្នុងរយៈពេលថ្មីៗនេះប៉ុណ្តោះ។
ស្ត្រីវ័យក្មេងស្រអែមស្រស់រូបនេះបានបន្តថា ការលក់ខ្លាញ់ក្តាមអាំង និងឆាគ្រឿងខ្យងមួយថ្ងៃ គាត់អាចរកបានកម្រៃប្រមាណជា ៣០ម៉ឺន ចំណែកការលក់នំនេក គាត់លក់បានប្រហែលជា១០ម៉ឺនរៀល ដូចច្នេះជារៀងរាល់ថ្ងៃចុងសប្តាហ៍ និងថ្ងៃបុណ្យទានផ្សេងៗ គាត់រកចំណូលបានចន្លោះពី ៣០ម៉ឺន ទៅ៤០ម៉ឺនរៀលក្នុងមួយថ្ងៃ។
ស្ត្រីវ័យ៣០រូបនេះ ពិតជាមានភាពជឿជាក់លើមុខរបបថ្មីរបស់គាត់ ពីព្រោះការលក់ពីមួយថ្ងៃទៅមួយថ្ងៃចេះតែមានការកើនឡើងជាហូរហែ បងស្រី ពិសី ក៏បានប្រាប់ពីវិធីក្នុងការធ្វើការខ្លាញ់ក្តាមអាំង ឲ្យមានរសជាតិឆ្ងាញ់ ដោយគ្រឿងផ្សំមានដូចជា ៖ ក្តាម ពងទា ស្លឹកខ្ទឹម រួមជាមួយអំបិល ហើយនឹងម្សៅស៊ុប។ បងពិសី មិនដាក់ស្ករ.សឡើយ ប្រសិនប្រើស្ករ.សនោះ នាំឲ្យរសជាតិនៃក្តាមអាំងមានរសជាតិមិនឆ្ងាញ់ និងអ្នកទទួលទានងាយនឹងធុញ ឬទ្រលាន់ជាមួយវា ចំណុចពិសេសនេះហើយ ធ្វើឲ្យការលក់ដូររបស់បងស្រីចេះមានការកើនឡើង ដោយសារតែរូបមន្តគ្រឿងបង្កើតជារសជាតិជាប់មាត់ជាប់ចិត្ត ក្រោយពេលទទួលទានវានោះ។
នាពេលពេលបច្ចុប្បន្ននេះ អ្នកស្រី ពិតជាមមាញឹកជាមួយនឹងការងាររបស់គាត់ ដោយគាត់លក់តាំងពីព្រឹកព្រលឹមស្រាងៗ រហូតដល់ថ្ងៃបាក់រសៀលឯណោះ។ ជាទូទៅ ខ្លាញ់ក្តាមអាំង ១០ស្នូក មានតម្លៃ ១០ ០០០រៀល ប៉ុន្តែបើភ្ញៀវទិញច្រើន គាត់គិតតម្លៃពិសេសជូន ឬអាចថែមក្តាមលើសបានខ្លះៗ ចំណែកក្តាមឆាគ្រឿង និងខ្យងមួយចានតម្លៃមួយ១០០០០រៀល។
ក្រៅពីភ្ញៀវធម្មតា ក៏មានភ្ញៀវបរទេសទិញជាហូរហែផងដែរ គាត់បានបន្តថា ភាគច្រើនភ្ញៀងបរទេសចូលចិត្តខ្លាញ់ក្តាម ពីព្រោះវាមានរសជាតិឆ្ងាញ់ និងចំណុចពិសេសគឺគួរឲ្យទាក់ទាញ។
ពិតណាស់របរនៃការលក់ ខ្លាញ់ក្តាមអាំង គឺទទួលបានការគាំទ្រពីអ្នកបរិភោគ និងបណ្តាជនបរទេស។ អាជីករ ដែលលក់ខ្លាញ់ក្តាមអាំង ពិតជាសប្បាយរីករាយជាមួយការងាររបស់គាត់ ដោយមុខរបរសុចរឹតមួយនេះ ជួយឱ្យគាត់បានចំណូលសម្រាប់គ្រួសារ និងចេះតែមានភាពរីកចម្រើនពីមួយទៅមួយថ្ងៃ៕ ដោយ៖ លីហួ គីមឆាយ
ចែករំលែកព័តមាននេះ