ADផ្ទាំងផ្សព្វផ្សាយពាណិជ្ជកម្ម

Picture

សុះ ម៉ាច សម្រេច​ក្តី​ស្រមៃ​ក្នុង​ការ​ថត​បទ​ចម្រៀង​ស្នាដៃ​ឪពុក​ជាង​៦០​បទ​ឡើង​វិញ

1 ឆ្នាំ មុន
  • ភ្នំពេញ

នៅ​ទីបំផុត​តារាចម្រៀង​លោក សុះ ម៉ាច បាន​សម្រេច​នូវ​គោលដៅ​របស់​ខ្លួន​ក្នុង​ការ​ថត​បទ​ចម្រៀង​ដែល​ជា​មរតក​របស់​ឪពុក​លោក

រាជធានី​ភ្នំពេញ ៖ នៅ​ទីបំផុត​តារាចម្រៀង​លោក សុះ ម៉ាច បាន​សម្រេច​នូវ​គោលដៅ​របស់​ខ្លួន​ក្នុង​ការ​ថត​បទ​ចម្រៀង​ដែល​ជា​មរតក​របស់​ឪពុក​លោក គឺ​លោក សុះ ម៉ាត់ ចំនួន​ប្រមាណ​៦៦​បទ​ឡើង​វិញ បន្ទាប់​ពី​លោក​បាន​សិក្សា​ស្រាវជ្រាវ​រក​ឯកសារ​អស់​ជា​ច្រើន​ឆ្នាំ​មកនេះ​។

អតីត​ប្រធាន​សមាគម​សិល្បៈ​ខ្មែរ​រូប​នេះ បាន​លើក​ឡើង​ថា ក្តី​ស្រ​ម៉ៃ​របស់​លោក​ក្នុង​ការ​ថត​រាល់​បទ​ចម្រៀង​របស់​ពុក ទុកជា​ស្នាដៃ​បន្ត​ដើម្បី​ថែរក្សា ឥឡូវ​ពេល​នេះ​ណា​បទ​ចម្រៀង​ដែល​មាន​ឯកសារ និង​ពុំ​បន្សល់​នូវ​ឯកសារ​របស់​ឪពុក​លោក​ទាំង​៦៦​បទ​បាន​ដល់​ស្ទី​ទ​យោ​(studio) រួចរាល់​ហើយ ដោយ​សហការ​ជាមួយ​ផលិតករ លោក (​លី យ៉ាំ​ង​) ដោយនៅ​ក្នុង​នោះ​បទ​ខ្លះ​ក៏​ថត​រួចរាល់​ហើយ នៅឡើយ​តែ​លោក​ទៅ​ច្រៀង​បញ្ចូល​សំឡេង​តែ​ប៉ុណ្ណោះ​។

លោក​ថា ខ្ញុំ​សែន​រីករាយ​ណាស់ ចំពោះ​ក្តី​បំណង​ដែល​បាន​ដល់​ចំណុច​នេះ ហើយ​ខ្ញុំ​ក៏​បាន​ត្រៀមខ្លួន​រួចរាល់​ផង​ដែរ ហើយ​ចាប់ពី​ពេល​នេះ​តទៅ ចម្រៀង​របស់ខ្ញុំ​ចាស់​ថ្មី​នឹង​ចាប់ផ្តើម​បម្រើ​អារម្មណ៍​អ្នកគាំទ្រ និង​អ្នក​ស្តាប់​ទាំងឡាយ​ឡើង​វិញ​ហើយ សង្ឃឹមថា​ប្រិ​យ​មិត្ត មិត្តភក្តិ បងប្អូន​ជួយ​លើកទឹកចិត្ត និង​គាំទ្រ​ដល់​រូប​ខ្ញុំ​មិន​ខាន​។

លោក សុះ ម៉ាច បាន​បន្ថែម​ថា រាល់​បទ​ចម្រៀង​ឪពុក​លោក​ទាំងអស់ គឺ​លោក​នៅ​រក្សា​ទម្រង់​ដើម​ដដែល ប៉ុន្តែ​សម្រាប់​បទ​ខ្លះ​ដែល​បាន​បាត់​ទំនុកភ្លេង និង​ទំនុកច្រៀង​នោះ គឺ​លោក​ត្រូវ​ស្រាវជ្រាវ​រក​អ្នក​ដែល​នៅ​ចេះ​ចាំ ហើយ​ឲ្យ​គាត់​ច្រៀង​អោយ​យើង​ស្តាប់ រួច​យើង​យក​មក​ច្រៀង​ដោយ​មានការ​រៀបចំ​សាច់ភ្លេង​ឲ្យ​ត្រូវ​ទៅ​នឹង​ទំនុកច្រៀង​នោះ​។

លោក​ថា បើ​ទោះបីជា​ការ​លេង​សាច់ភ្លេង​នោះ មិន​អាច​ដូច​ទាំងស្រុង​ទៅ​នឹង​មរតក​ដើម​ក៏​ដោយ ប៉ុន្តែ​យើង​អាច​លេង​ត្រូវ​តាម​លំនាំ​បទ​នឹង ហើយ​វា​អាច​នឹង​ដូច​ទៅ​បទ​ដើម​ប្រហែល​៦០​ទៅ​៧០​ភាគរយ​ផង​ដែរ​។

លោក​បញ្ជាក់​ថា រាល់​បទ​ចម្រៀង​ទាំងអស់ ដែល​លោក​នឹង​ថត​រួចរាល់​ហើយ​នោះ លោក​នឹង​ស្នើ​សុំ​ទៅ​ក្រសួង​វប្បធម៌ ដើម្បី​ធ្វើ​សន្និសីទ​សារព័ត៌មាន​មួយ ក្នុង​គោលបំណង​រក្សា​កម្មសិទ្ធិបញ្ញា កុំ​ឲ្យ​បទ​ចម្រៀង​ដែល​ជា​ស្នាដៃ​ឪពុក​របស់​លោក​ត្រូវ​គេ​យក​ទៅ​ច្រៀង​កែ​ច្នៃ​ខុស​ពី​ទម្រង់​ដើម​។

លោក​បន្ត​ថា ការ​ដែល​លោក​ចង់​អភិរក្ស​ស្នាដៃ​បទ​ចម្រៀង​ឪពុក​របស់​លោក​នា​ពេល​នេះ គឺ​ដោយសារ​លោក​ចង់​ឲ្យ​ប្អូន​ៗ​សិល្បករ​ជំនាន់​ក្រោយ​ដែល​លើកយក​បទ​ចម្រៀង​ឪពុក​របស់​លោក​មក​ច្រៀង ហើយ​យល់​ច្រឡំ​ជា​សំនៀង​ដើម​អ្នក​ផ្សេង​ទៅ​វិញ​។

លោក សុះ ម៉ាច បាន​លើក​ឡើង​បន្ថែម​ថា បទ​ចម្រៀង​ឪពុក​របស់​លោក​ភាគច្រើន គឺ​មិនសូវ​នៅ​សល់​ឯកសារ​សម្រាប់​យោង​ឡើយ ដោយពេល​ខ្លះ​គឺ​ដឹង​ដោយសារ​ការ​ច្រៀង​.​ត​គ្នា ហេតុនេះ​នាំ​ឲ្យ​បទ​ចម្រៀង​ខ្លះ​មានការ​យល់​ច្រឡំ​ថា ជា​សំនៀង​របស់​អ្នក​នេះ ឬ​អ្នក​នោះ​ទៅ​វិញ​។

លោក​បាន​លើក​ជា​ឧទាហរណ៍​ថា ដូច​ជា​បទ​ចម្រៀង «ព្រែក​ឆ្លូង​» និង​បទ «​កំពង់ចាម​កំពង់​ចិត្ត​» ជាដើម ភាគច្រើន​គេ​យល់​ច្រឡំ​ថា ជា​សំនៀង​លោក ស៊ិ​ន ស៊ី​សា​មុត ឬ​លោក កែវ សា​រ៉ាត់ ដោយ​មិន​គិត​ថា ជា​សំនៀង​ឪពុក​លោក គឺ​លោក សុះ ម៉ាត់ នោះ​ឡើយ​។ ចំណុច​នេះ យើង​មិន​បន្ទោស​ពួក​គេ​ឡើយ ព្រោះ​ដោយសារ​មិនដឹង ចឹ​ង​បាន​លោក​ព្យាយាម​អភិរក្ស​បទ​ចម្រៀង​ទាំង​ជាង​៦០​បទ​នេះ​ថា គឺជា​ស្នាដៃ​និពន្ធ និង​ច្រៀង​ដោយ​លោក សុះ ម៉ាត់​។

បើ​តាម​លោក សុះ ម៉ាច ថា មាន​បទ​ចម្រៀង​ជា​ច្រើន​ទៀត ដែល​លោក​បាន​ស្រាវជ្រាវ​ពី​លោក សេង ដា​រ៉ា ដែល​ជា​អ្នក​ស្រាវជ្រាវ​បទ​ចម្រៀង​មរតក​ដើម​នោះ បទ​របស់​ឪពុក​លោក​ខ្លះ គឺ​នៅ​សល់​តែ​ទំនុកច្រៀង ខ្លះ​នៅ​សល់​តែ​ណោ​ត​ភ្លេង ហើយ​ណោ​ត​ភ្លេង​នោះ គឺ​សម័យ​ពី​ដើម ហេតុនេះ ទាល់តែ​តន្ត្រីករ​ជើង​ចាស់​ប៉ុណ្ណោះ ដែល​អាច​យល់ និង​សម្រាយ​យើង​បាន​។

លោក​បញ្ជាក់​ថា បទ​ចម្រៀង​ឪពុក​លោក​ភាគច្រើន គឺ​ថត​សម្រាប់​តែ​ចាក់​ផ្សាយ​តាម​វិទ្យុជាតិ​ប៉ុណ្ណោះ ហើយ​ថា ចម្រៀង​ដែល​ថត​នោះ​ត្រូវ​បាន​គេ​កំទេច​ចោល​ស្ទើរ​ទាំងស្រុង​តាម​សម័យកាល​នៃ​បរិបទ​សង្គម​នា​ពេល​កន្លង​មក​។ កត្តា​នេះ ជា​ហេតុ​ធ្វើ​ឲ្យ​លោក​មានការ​លំបាក​ច្រើន​នៅ​ក្នុង​ការ​ស្រាវជ្រាវ​រក ដោយ​លោក​ត្រូវ​សហការ​ជាមួយនឹង​លោក សេង ដា​រ៉ា និង​ស្វែងរក​បងប្អូន​ណា​ដែល​នៅ​អាច​ចេះ​ចាំ​ចម្រៀង​ឪពុក​របស់​លោក​។

លោក​ថា រយ់ពេល​នៃ​ការ​ស្រាវជ្រាវ​នោះ គឺ​លោក​បាន​ប្រើ​ពេល​ប្រមាណ​ជា​២០​ឆ្នាំ​មក​ហើយ ហើយ​លោក​បាន​ចងក្រង​ជា​ឯកសារ​បាន​ខ្លះ ខណៈ​ពេល​បទ​ចម្រៀង​ឪពុក​លោក​មួយ​ចំនួន​ក៏​លោក​បាន​ថត​ឡើង​វិញ​នៅ​ក្នុង​ផលិតកម្ម​មរតក សុះ ម៉ាត់ វ៉ុល​១​ផង​ដែរ​។

លោក សុះ ម៉ាច បន្ថែម​ថា រាល់​បទ​ចម្រៀង​ឪពុក​លោក​ដែល​លោក​នឹង​ច្រៀង ផលិត​ឡើង​វិញ​នោះ គឺ​លោក​នឹង​ច្រៀង​ថត​ជា​ឌី​ស​ផង និង​បង្ហោះ​តាម​បណ្តាញ​សង្គម​យូ​ធូប​ផង ដើម្បី​ទុកជា​ការ​អភិរក្ស​។

យ៉ាងណា បើ​តាម​លោក សុះ ម៉ាច ថា លោក​ពិតជា​មានការ​សប្បាយ​រីករាយ​យ៉ាង​ខ្លាំង ក្នុង​ពេល​ដែល​លោក​អាច​សម្រេច​បាន​នូវ​អ្វី​ដែល​ជា​មរតក​របស់​ឪពុក ក៏​ដូច​ជា​ភាព​ក​ក្តញ្ញូ​សម្រាប់​ឪពុក​ដែល​លោក​បាន​បន្តវេន ហើយ​លោក​នឹង​រក្សា​នូវ​អ្វី​ដែល​ល្អ​សម្រាប់​កូនចៅ​របស់​លោក ក៏​ដូច​ជា​ប្អូន​ៗ​សិល្បៈ​ជំនាន់​ក្រោយ​ផង​ដែរ​៕

អត្ថបទសរសេរ ដោយ

កែសម្រួលដោយ