ខេត្តកំពត ៖ ករណីជីតាបង្កើតចាប់ចៅស្រីរុំភួយចាក់សាំងដុតទាំងរស់ ដែលជំហានដំបូងត្រូវបានគេអះអាងថាមកពីជីតាស្រវឹង និងមានសតិមិនគ្រប់ ប៉ុន្តែក្រោយពីស្តាប់ …
ខេត្តកំពត ៖ ករណីជីតាបង្កើតចាប់ចៅស្រីរុំភួយចាក់សាំងដុតទាំងរស់ ដែលជំហានដំបូងត្រូវបានគេអះអាងថាមកពីជីតាស្រវឹង និងមានសតិមិនគ្រប់ ប៉ុន្តែក្រោយពីស្តាប់ចម្លើយសារភាពរបស់ជនសង្ស័យជាជីតា ទើបដឹងថា មានមូលហេតុផ្សេងដែលបណ្ដាលឲ្យជីតាចាប់ចៅដុតទាំងរស់បែបនេះ ។
សូមបញ្ជាក់ថា កាលពីវេលាម៉ោង០៨ព្រឹកថ្ងៃទី១៩ ខែវិច្ឆិកា ឆ្នាំ២០១៦ បុរសម្នាក់ឈ្មោះ សុខ សន អាយុ៥៤ឆ្នាំ រស់នៅភូមិភ្នំដំរី ឃុំដំណាក់កន្ទួតខាងជើង ស្រុកកំពង់ត្រាច ខេត្តកំពត បានចាប់ចៅស្រីបង្កើតខ្លួនឯងអាយុជាង១ខែរុំភួយដុតទាំងរស់បណ្តាលឱ្យស្លាប់យ៉ាងអាណោចអាធ័ម ។
ក្រោយពេលទទួលបានដំណឹងឃោរឃៅនេះ សមត្ថកិច្ចនគរបាលប៉ុស្តិ៍ ស្រុក និងកម្លាំងអន្តរាគមន៍ខេត្តចុះទៅកន្លែងកើតហេតុ ប៉ុន្តែជួយមិនទាន់ឡើយ គឺទារកនោះបានឆេះឡើងខ្លោចស្លាប់ក្នុងភ្នក់ភ្លើងបាត់ទៅហើយ ។
លោកវរសេនីយ៍ត្រី លក ញ៉ាវ នាយការិយាល័យព្រហ្មទណ្ឌកម្រិតស្រាលខេត្ត បានឲ្យដឹងថា ជនសង្ស័យបានត្រៀមកាំបិត ពូថៅ ញញួរ ដែកត្បែង ដើម្បីទប់ទល់នឹងអ្នកខាងក្រៅ ហើយកម្លាំងរបស់លោកបានប្រើវិធីគំរាម ឬប្រើវិធីលួងលោមយ៉ាងណាក៏ជននោះមិនខ្វល់ដែរ ទើបលោកឧត្ដមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត បានបញ្ជាឲ្យកម្លាំងគាស់ជញ្ជាំងផ្ទះជាច្រើនកន្លែង និងប្រើកម្លាំងប្រដាប់ដោយខែលជាច្រើននាក់ ដោយប្រើអស់រយៈពេលជាង៣ម៉ោង រហូតដល់ម៉ោង១១និង៣០នាទីព្រឹកថ្ងៃដដែល ទើបកម្លាំងសមត្ថកិច្ចព័ទ្ធចាប់ខ្លួនជនសង្ស័យនេះបាន ។
នៅចំពោះមុខសមត្ថកិច្ច ជនសង្ស័យបានសារភាពថា មូលហេតុដែលជនសង្ស័យចាប់ចៅស្រីបង្កើតរបស់ខ្លួនដុតទាំងរស់នេះគឺដោយសារតែជនសង្ស័យខឹង និងគុំគួនជាមួយកូនស្រីបង្កើតដែលមានកូនអត់ប្តី ទើបថ្ងៃកើតហេតុជនសង្ស័យផឹកស្រាស្រវឹងរករឿងឈ្លោះជាមួយប្រពន្ធនិងកូន ហើយយកកាំបិត និងពូថៅដេញកាប់រត់បាត់អស់ ។ ក្រោយមកទើបជនសង្ស័យចូលទៅក្នុងផ្ទះចាប់ចៅរុំភួយរួចយកសាំងស្រោចពីលើហើយយកដែកកេះកេះដុតសម្លាប់ចោលតែម្តង ៕
ចែករំលែកព័តមាននេះ