ទីបំផុតជាប់ខ្នោះ ! ថាខ្ចីនិយាយមួយភ្លែត បែរជាយករត់បាត់
ខេត្តបន្ទាយមានជ័យ ៖ បុរសម្នាក់ត្រូវបានប្រជាការពារភូមិប៉ោយប៉ែតទូរស័ព្ទហៅមករួចចាប់ខ្លួនប្រគល់ឲ្យនគរបាលសង្កាត់ប៉ោយប៉ែត បន្ទាប់ពីបុរសរូបនេះបានខ្ចីទូរស័ព្ទ …
ខេត្តបន្ទាយមានជ័យ ៖ បុរសម្នាក់ត្រូវបានប្រជាការពារភូមិប៉ោយប៉ែតទូរស័ព្ទហៅមករួចចាប់ខ្លួនប្រគល់ឲ្យនគរបាលសង្កាត់ប៉ោយប៉ែត បន្ទាប់ពីបុរសរូបនេះបានខ្ចីទូរស័ព្ទបុរសម្នាក់ថានិយាយមួយភ្លែត តែបែរជាយករត់ម៉ូតូគេចខ្លួន ។
ហេតុការណ៍ឃាត់ខ្លួនជនសង្ស័យខាងលើធ្វើឡើងកាលពីវេលាម៉ោងជាង១រំលងអាធ្រាត្រឈានចូលថ្ងៃទី២០ ខែវិច្ឆិកា ឆ្នាំ២០១៦ នៅចំណុចផ្លូវចូលដើមពោធិ៍លាងឡាន ព្រំប្រទល់ភូមិក្បាលកោះ និងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ។
ជនសង្ស័យឈ្មោះ ព្រំ ជាយដែន ភេទប្រុស អាយុ២៥ឆ្នាំ ស្នាក់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ។
តាមការឲ្យដឹងពីកម្លាំងប្រជាការពារភូមិប៉ោយប៉ែតបានប្រាប់ឲ្យដឹងថា ដំបូងជនសង្ស័យបានខ្ចីទូរស័ព្ទម៉ាកអាយហ្វូន៥ពណ៌ស១គ្រឿងពីជនរងគ្រោះឈ្មោះ សាំង ម៉ារ៉ាឌី ភេទប្រុស អាយុ២២ឆ្នាំ ស្នាក់នៅភូមិប្រជាធម្ម សង្កាត់ផ្សារកណ្តាល ក្រុងប៉ោយប៉ែត ថាសុំនិយាយមួយភ្លែត ដឹងអីឆ្លៀតឱកាសល្អស្រាប់តែរត់ឡើងម៉ូតូជិះរត់ទៅទិសខាងកើតតបាត់ ។ ក្រុមប្រជាការពារបន្តថា ដោយសារជនរងគ្រោះស្គាល់លេខទូរស័ព្ទជនសង្ស័យ និងប្រាប់ថា ជាមុខសញ្ញាប្រើប្រាស់ និងជួញដូរថ្នាំញៀន ប្រជាការពារភូមិក៏ទូរស័ព្ទទាក់ទងដោយកុហកថា រកទិញថ្នាំញៀន ភ្លាមនោះជនសង្ស័យក៏មកជួបតាមការណាត់ទើបចាប់ខ្លួនជនសង្ស័យបានហើយពេលឆែកឆេររកឃើញថ្នាំញៀនប្រភេទម្សៅក្រាមពណ៌ថ្លា(ខេទឹកកក)មួយកញ្ចប់តូច និងរកឃើញទូរស័ព្ទរបស់ជនរងគ្រោះមកវិញដែរ ។
លោក អ៊ឹម សុភារៈ មេប៉ុស្តិ៍ប៉ោយប៉ែត ប្រាប់ថា ករណីខាងលើពិតជាកើតមានមែន ហើយថា ជនសង្ស័យ និងវត្ថុតាងនឹងបញ្ជូនទៅអធិការដ្ឋានគរបាលក្រុងប៉ោយប៉ែតដើម្បីចាត់ការបន្តនៅរសៀលថ្ងៃទី២០ ខែវិច្ឆិកានេះ ៕
ចែករំលែកព័តមាននេះ