ហួសថ្លែង ! គ្រាន់តែរឿងបត់ជើងតូចមិនចាក់ទឹក ចង់ដុតផ្ទះចោល
រាជធានីភ្នំពេញ ៖ បុរសម្នាក់បន្ទាប់ពីបត់ជើងតូចមិនចាក់ទឹករួច ត្រូវបានឪពុកនិងបងស្រីបង្កើតស្តីបន្ទោស ស្រាប់តែបុរសរូបនោះខឹងច្រឡោត ស្រែកឡូឡាពេញផ្ទះ …
រាជធានីភ្នំពេញ ៖ បុរសម្នាក់បន្ទាប់ពីបត់ជើងតូចមិនចាក់ទឹករួច ត្រូវបានឪពុកនិងបងស្រីបង្កើតស្តីបន្ទោស ស្រាប់តែបុរសរូបនោះខឹងច្រឡោត ស្រែកឡូឡាពេញផ្ទះ …
រាជធានីភ្នំពេញ ៖ បុរសម្នាក់បន្ទាប់ពីបត់ជើងតូចមិនចាក់ទឹករួច ត្រូវបានឪពុកនិងបងស្រីបង្កើតស្តីបន្ទោស ស្រាប់តែបុរសរូបនោះខឹងច្រឡោត ស្រែកឡូឡាពេញផ្ទះ និងគំរាមប្រុងដុតផ្ទះចោលទៀត ក៏ត្រូវឪពុក និងបងស្រីបង្កើតប្តឹងសមត្ថកិច្ចឲ្យចាប់ខ្លួនកាលពីវេលាម៉ោង៨ និង៣០នាទីយប់ ថ្ងៃទី១៩ ខែវិច្ឆិកា ឆ្នាំ២០១៦ នៅចំណុចផ្ទះលេខ៩៥០ ផ្លូវលំ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ ។
បុរសចិត្តខ្លាំងរូបនោះឈ្មោះ ឈុំ ម៉ៅ អាយុ២៦ឆ្នាំ មុខរបរមិនពិតប្រាកដ ធ្លាប់ប្រើប្រាស់ថ្នាំញៀន១០ឆ្នាំហើយ និងធ្លាប់ជាប់ពន្ធនាគាររយៈពេលជាង១ឆ្នាំពីបទលួចទ្រព្យសម្បត្តិម្តាយមីង ។ ចំណែកឪពុកឈ្មោះ មាស ចន្ថា អាយុ៥៧ឆ្នាំ មុខរបររត់ម៉ូតូឌុប រីឯបងស្រីឈ្មោះ ឈុំ ស្រីនាង អាយុ២៩ឆ្នាំ មុខរបរលក់ដូរ ។ អ្នកទាំងអស់គ្នារស់នៅភូមិ-សង្កាត់កើតហេតុខាងលើ ។
សមត្ថកិច្ចបានឱ្យដឹងថា មុនពេលកើតហេតុ ជនសង្ស័យបានផឹកស៊ីជាមួយអ្នកជិតខាងមានគ្នា៥នាក់ ដោយទិញស្រាបៀរកន្លះកេសមកផឹកជុំគ្នា ខណៈពេលផឹកអស់ម្នាក់៣កំប៉ុង ជនសង្ស័យបានដើរទៅបត់ជើងតូចនៅក្នុងបន្ទប់ទឹកក្នុងផ្ទះរបស់ខ្លួន បន្ទាប់ពីបត់ជើងរួច បងស្រីបង្កើតបានស្រែកប្រាប់ទៅជនសង្ស័យថា បើបត់ជើងតូចហើយចាក់ទឹកផងឆ្អេះខ្លាំងណាស់ ។ ពេលឮបងស្រីបង្កើត និងឪពុកប្រាប់បែបនេះ ជនសង្ស័យស្រាប់តែខឹងច្រឡោត ស្រែកឡូឡាពេញផ្ទះ និងគំរាមរកដុតផ្ទះចោលទៀត ទើបឪពុក និងបងស្រីបង្កើតទ្រាំមិនបាន ក៏រត់ទៅប្តឹងសមត្ថកិច្ចឱ្យចាប់ខ្លួនតែម្តង ។
បច្ចុប្បន្ន ជនសង្ស័យបានកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌឫស្សីកែវធ្វើការសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការតាមនីតិវិធី ៕
ចែករំលែកព័តមាននេះ