រាជធានីភ្នំពេញ ៖ លោកឡុង សំណាង ក្នុងវ័យ១៩ឆ្នាំ រស់នៅជាមួយម្ដាយជាស្ដ្រីមេម៉ាយមានបងប្អូន៦នាក់ សុទ្ធតែប្រុសទាំងអស់ ហើយលោកជាកូនទី៥នៅក្នុងគ្រួសារក្រីក្រ រស់នៅភូមិសន្សំកុសលទី២ សង្កាត់ បឹងទំពុន ខណ្ឌមានជ័យ រាជធានីភ្នំពេញ។
លោកឡុង សំណាង បានក្លាយជាវិចិត្រករដ៏ចំណានម្នាក់មានជំនាញខាងគូរគំនូរច្រើនប្រភេទដូចជាគំនូរ ស-ខ្មៅ គំនូរប្រើទឹក ថ្នាំពណ៌រលោង និងទឹកថ្នាំពណ៌បៀកជាដើម។ រាល់ស្នាដៃគំនូររបស់លោកមានលក្ខណៈរស់រវើកគួរឱ្យចាប់ចិត្ដដិតអារម្មណ៍។ លោកឡុង សំណាង និយាយឱ្យដឹងថា ដោយសារតែលោកមាននិស្ស័យស្រលាញ់សិល្បៈគំនូរតាំងពីកំណើតមក ពេលដឹងក្ដីលោកតែងតែគូរលេងនៅលើក្រដាសសៀវភៅ ផ្ទាំងថ្ម ឬជញ្ជាំងរបងនៅពេលទំនេរ។ ពេលលោកមានអាយុ១៤ឆ្នាំបានទៅសុំគេរៀនគូរគំនូរតាមនិស្ស័យរបស់លោកនៅសមាគមរៃយំជាមួយលោកគ្រូចាន់ នឹង វិន រយៈពេល៤ឆ្នាំ ។ លោករៀនគូរគំនូរតាមក្បួនខ្នាតត្រឹមត្រូវជាប់ចំណាត់ថ្នាក់លេខ១រាល់ខែ រាល់ឆ្នាំក្នុងជំនាញគំនូរមើលឃើញ គូរលឿន គំនូរតាមការស្រមើស្រមៃ គំនូរ តាមរូបថត គំនូរទេសភាពជាដើម។
លោកឡុង សំណាងឱ្យដឹងថា សព្វថ្ងៃ ក្រៅពីសិក្សានៅវិទ្យាល័យ ហ៊ុន សែន ប៊ុន រ៉ានី ផ្សារដើមថ្កូវ ថ្នាក់ទី១០ លោកឆ្លៀតពេលទំនេរនៅផ្ទះគូរគំនូរឱ្យគេតាមការចង់បានរបស់អតិថិជន ។ រាល់ចុងសបា្ដហ៍ រាល់រាត្រីថ្ងៃសុក្រ សៅរ៍ អាទិត្យ លោកបានទៅគូរគំនូរនៅផ្សាររាត្រី ក្បែរផ្សារចាស់ ។ រាល់សបា្ដហ៍តែងតែមានគេផ្ដល់ឱកាសឱ្យលោកគូរមិនដាច់ទេ ហើយថវិកាដែលបាន ពីគូរគំនូរមួយផ្នែកលោកជួយដល់ម្ដាយជា ស្ដ្រីមេម៉ាយចិញ្ចឹមកូន៦នាក់ រួមទាំងលោកផង និងមួយផ្នែកទៀតយកទៅទិញសំភារគូរបន្ដ ។ សល់កំរៃបន្ដិចបន្ដួច លោកសន្សំទុកសំរាប់ត្រៀមបន្ដការសិក្សានៅមហាវិទ្យាល័យ ព្រោះលោកចង់សិក្សាឱ្យបានខ្ពង់ខ្ពស់។
លោកសំណាង និយាយថា ម្ដាយរបស់លោកឈ្មោះសាយ វន្ថា អាយុជាង៥០ឆ្នាំ ជាកម្មការិនីកាត់ដេរ ចំណែកឪពុករបស់លោកបានស្លាប់ជាច្រើនឆ្នាំមកហើយ ដោយសារតែគាត់រត់ម៉ូតូឌុបត្រូវចោរប្លន់សំលាប់ ។ លោក ឡុង សំណាង និយាយថា បើលោកមានលទ្ធភាព លោកនឹងបន្ដសិក្សាផ្នែកសិល្បៈគំនូរឱ្យកាន់តែខ្ពស់ជាងនេះ និងចង់រៀនសិល្បៈចំលាក់មួយផ្នែកទៀត ។ នៅពេលសន្សំប្រាក់បានគ្រប់គ្រាន់នោះលោក មានបំណងចង់បើកកន្លែងគូរគំនូរតូចមួយ ដើម្បីរកប្រាក់ជួយផ្គត់ផ្គង់ដល់ម្ដាយវ័យចំណាស់ដែលមានការខ្វះខាតក្នុងជីវភាពគ្រួសារ និងសំរាប់បន្ដការសិក្សា។ ម្យ៉ាងវិញទៀត បើមានលទ្ធភាព លោកចង់បើកក្លឹបតូចមួយសំរាប់ផ្ទេរចំណេះដឹងបណ្ដុះបណ្ដាលដល់កុមារកំព្រាក្រីក្រដែលមាននិស្ស័យស្រលាញ់សិល្បៈគំនូរដើម្បីឱ្យពួកគេរួចផុតពីការដើរលេងភ្លើតភ្លើន សេពថ្នាំញៀននាំឱ្យប៉ះពាល់ដល់សង្គមជាតិ និងខូចអនាគតខ្លួនឯងទៀតផង។
វិចិត្រករវ័យក្មេងរូបនេះពិតជាគូរគំនូរបានល្អស្អាត ហើយបើគូររូបមនុស្ស គឺដូចបេះ បិទ ដូចជាសព្វថ្ងៃនេះមានគេឱ្យលោកគូរ រូបលោក ព្រាប សុវត្ថិ លោកឆន សុវណ្ណរាជ លោក ខេមរៈ សេរីមន្ដ និងកញា សុខ ពិសី ជាដើមមើលទៅដូចរូបថត ៕
ចែករំលែកព័តមាននេះ