ផែទេសចរណ៍អន្តរជាតិនៅកំពត បញ្ចប់ការសាងសង់នៅខែមីនា អាចទទួលអ្នកទេសចរបាន ១លាននាក់ ១ ឆ្នាំ
- ភ្នំពេញ
រាជធានីភ្នំពេញ ៖ កំពង់ផែទេសចរណ៍អន្តរជាតិនៅខេត្តកំពត នឹងត្រូវបញ្ចប់ការសាងសង់ត្រឹមថ្ងៃទី ៣១ ខែមីនា ឆ្នាំ ២០២២ នេះ ។…
រាជធានីភ្នំពេញ ៖ កំពង់ផែទេសចរណ៍អន្តរជាតិនៅខេត្តកំពត នឹងត្រូវបញ្ចប់ការសាងសង់ត្រឹមថ្ងៃទី ៣១ ខែមីនា ឆ្នាំ ២០២២ នេះ ។ តាមការរំពឹងទុករបស់ក្រសួងទេសចរណ៍ កំពង់ផែនេះអាចមានសមត្ថភាពទទួលអ្នកដំណើរ និងអ្នកទេសចរបានប្រមាណ ១លាននាក់ក្នុងមួយឆ្នាំ ។ កំពង់ផែនេះនឹងលើកស្ទួយវិស័យទេសចរណ៍របស់កម្ពុជា បន្ថែមទៀត ជាពិសេសរមណីយដ្ឋាននានាក្នុងខេត្តកំពត និងទិសដៅតំបន់ឆ្នេរផ្សេងទៀត ។
លោក សុខ សុគុណ អគ្គនាយករងអភិវឌ្ឍន៍ទេសចរណ៍ នៃក្រសួងទេសចរណ៍ និយាយថា កំពង់ផែនេះនឹងក្លាយជាច្រកទ្វារអន្តរ ជាតិផ្លូវសមុទ្រយ៉ាងសំខាន់ តភ្ជាប់ការដឹកជញ្ជូនភ្ញៀវទេសចរទៅកាន់បណ្តាកោះនានានៅភាគខាងត្បូង និងតភ្ជាប់ខេត្តកំពត នៃប្រទេសកម្ពុជា ទៅកាន់ពិភពលោក ។ តាមរយៈកំពង់ផែនេះ នឹងជួយជំរុញបន្ថែមការអភិវឌ្ឍទេសចរណ៍ និងផ្នែកពាក់ព័ន្ធនានានៅខេត្តកំពត រមណីយដ្ឋានភ្នំបូកគោ និងគោលដៅទេសចរណ៍តំបន់ឆ្នេរសមុទ្ររបស់កម្ពុជា ។
ការស្ថាបនាកំពង់ផែទេសចរណ៍អន្តរជាតិកំពត ស្ថិតក្រោមហិរញ្ញប្បទានរបស់ធនាគារ ADB ដែលជាផ្នែកមួយនៃគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់ការរីកចម្រើនប្រកបដោយចីរភាពនៅក្នុងមហាអនុតំបន់មេគង្គ (GMS) ។
គម្រោងនេះបានចាប់ផ្តើមបើកការដ្ឋានសាងសង់នៅថ្ងៃទី ៨ ខែសីហា ឆ្នាំ ២០១៨ អនុវត្តដោយអង្គភាពគ្រប់គ្រងគម្រោងរបស់ក្រសួងសាធារណការ និងដឹកជញ្ជូន ហើយគ្រោងបញ្ចប់នៅពាក់កណ្តាលខែវិច្ឆិកា ឆ្នាំ ២០២១ ប៉ុន្តែដោយសារវិបត្តិជំងឺកូវីដ-១៩ និងការឆ្លងក្នុងសហគមន៍ បញ្ហាអាកាសធាតុធ្វើឱ្យដំណើរកាសាងសង់់មានការយឺតយ៉ាវបន្តិច ។
លោក សុខ សុគុណ បានបញ្ជាក់ថា បច្ចុប្បន្នធនាគារអភិវឌ្ឍន៍អាស៊ី បានឯកភាពពន្យារការអនុវត្តគម្រោងនេះ រហូតដល់ថ្ងៃទី៣០ ខែមិថុនា ឆ្នាំ ២០២២ ដោយឡែកការសាងសង់កំពង់ផែត្រូវបញ្ចប់ត្រឹមថ្ងៃទី ៣១ ខែមីនា ឆ្នាំ ២០២២ នេះ ខណៈដែលបច្ចុប្បន្នគម្រោងទាំងមូលសម្រេចបានប្រមាណ ៩០% ៕
ចែករំលែកព័តមាននេះ