រកឃើញហើយម្ចាស់ប្រាក់លានប្រដាល់សាកលនៃកម្មវិធីUltimae Boxing Championship 2021
- ភ្នំពេញ
រាជធានីភ្នំពេញ ៖ ទីបំផុត រកឃើញហើយម្ចាស់ប្រាក់៣លានរៀលប្រដាល់នៃកម្មវិធីUltimate Boxing Championship2021 បានទៅ
រាជធានីភ្នំពេញ ៖ ទីបំផុត រកឃើញហើយម្ចាស់ប្រាក់៣លានរៀលប្រដាល់នៃកម្មវិធីUltimate Boxing Championship2021 បានទៅលើកីឡាករវី សុភ័ស ក្រោយពីបានយកឈ្នះកីឡាករទូច ដេវីត ដោយពិន្ទុនៅវគ្គប្រកួតផ្ដាច់ព្រ័ត្រកាលពីយប់ថ្ងៃអាទិត្យ ទី២៨ វិច្ឆិកា នៅលើសង្វៀននាយកដ្ឋានអង្គរក្ស។
សម្រាប់ការប្រកួតនៅវគ្គផ្ដាច់ព្រ័ត្រនេះផងដែរ កីឡាករវី សុភ័ស បានឱ្យដឹងថា ទោះបីជាគេបានត្រៀមខ្លួនទុកមុនរួចហើយក្ដីក៏គេនៅតែគិតថា ទូច ដេវីត គឺជាអ្នកប្រដាល់ជើងខ្លាំងមួយរូបដែលពិបាកទប់ទល់បំផុត ។ ម្យ៉ាងវិញទៀតគេមានកណ្ដាប់ដៃធ្ងន់វាយចេញបានរហ័ស ដូច្នេះត្រូវតែប្ដូរល្បិចប្រយុទ្ធពីការប្រើកម្លាំងមកប្រើបច្ចេកទេសទប់ទល់វិញ ។ ជាពិសេសនៅត្រឹមទឹកទី២ទូច ដេវីត សម្រុកខ្លាំងធ្វើឱ្យមានការពិបាកទប់ទល់យ៉ាងខ្លាំង ។ ប៉ុន្តែដោយសាតែគេធ្លាប់ស្គាល់ច្បាស់ពីល្បិចប្រកួតរបស់ទូច ដេវីត ហើយថែមទាំងធ្លាប់យកឈ្នះកាលពីវគ្គប្រកួតជម្រុះរួចម្ដងមកហើយនោះ ទើបធ្វើឱ្យគេមានឱកាសយកឈ្នះបានទាំងប្រផិតប្រផើយ ។ ទោះជាយ៉ាងណា បើតាមការពិនិត្យមើលការប្រកួតជាក់ស្ដែង ការប៉ះគ្នារវាងគេទាំងពីរនៅវគ្គផ្ដាច់ព្រ័ត្រនេះពិតជាកក្រើកមែនទែនធ្វើឱ្យអ្នកតាមដានការប្រកួតមានការចាប់អារម្មណ៍ខ្លាំងបំផុត ។ កីឡាករវី សុភ័ស ឈ្នះការប្រកួតលើកនេះទទួលបាន៣លានរៀលខណៈទូច ដេវីតទទួលបាន១លានរៀល។
លោកប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សាកលកម្ពុជាបានឱ្យដឹងថា បន្ទាប់ពីឆ្លងកាត់ការប្រកួតអស់រយៈពេល៦សប្ដាហ៍នេះទៅគឺយើងទទួលបានជោគជ័យយ៉ាងខ្លាំង ហើយក៏ជាបទពិសោធសម្រាប់ឈានទៅប្រកួតជើងឯកថ្នាក់ជាតិដែលគ្រោងនឹងធ្វើឡើងនៅខែក្រោយនេះ ចាប់ពីថ្ងៃទី២៣ ដល់២៦ ខែធ្នូ ។ ប៉ុន្តែអ្វីដែលសំខាន់ជានេះទៅទៀតនោះធ្វើឱ្យកីឡាករប្រដាល់សាកលរបស់យើងមានសមត្ថភាពបច្ចេកទេសគ្រប់គ្រាន់ដើម្បីឈានទៅប្រកួតកីឡាស៊ីហ្គេមនៅប្រទេសវៀតណាមឧសភាខាងមុខ ហើយក៏ជាបទពិសោធន៍សម្រាប់ឈានទៅប្រកួតនៅលើឆាកអន្តរជាតិទៀតផង ។ ហើយអ្វីដែលពិសេសជាងនេះទៅទៀតនោះក៏ទទួលបានការគាំទ្រយ៉ាងខ្លាំងពីសំណាក់ប្រជាពលរដ្ឋដែលស្រឡាញ់វិស័យកីឡាប្រដាល់សាកលទៀតផង។
មិនតែប៉ុណ្ណោះ យើងក៏មានក្ដីរំភើបផងដែរ ដោយមួយរយៈចុងក្រោយនេះកីឡាប្រដាល់សាកលមានឱកាសបានបញ្ជូលទៅប្រកួតនៅតាមស្ថានីយទូរទស្សន៍មួយចំនួនដែលជាហេតុធ្វើឱ្យការផ្សព្វផ្សាយសកម្មភាព វិស័យកីឡាប្រដាល់កាន់តែទូលំទូលាយជាងមុន។
សហព័ន្ធកីឡាប្រដាល់សាកលកម្ពុជាក៏មានគម្រោងរៀបចំការប្រកួតបែបនេះនៅឆ្នាំក្រោយ បើសិនជាមានការជួយឧបត្ថម្ភពីខាងក្រៅកាន់តែច្រើន។ហើយនៅដើមឆ្នាំ២០២២ក៏មានការប្រកួតអបអរថ្ងៃជ័យជម្នះ៧មករា ដោយមានកីឡាករថៃ និងវៀតណាមមកចូលរួមផងដែរ ៕
ចែករំលែកព័តមាននេះ