រាជធានីភ្នំពេញ ៖ កញ្ញាដេនី ខ្វាន់ បានរៀបចំខួបកំណើតជូនប្អូនប្រុស លោកគីម សាន ដោយមានការចូលរួមពីអ្នកសិល្បៈជាច្រើនដួង។ ការរៀបចំខួបកំណើតគម្រប់វ័យ២១ឆ្នាំនេះ ដើម្បីសម្តែងក្តីរីករាយក្រោយពេលលោកគីម សាន ចូលពិភពសិល្បៈមានអ្នកគាំទ្រជាលំដាប់ ។
ពិធីខួបកំណើតនេះរៀបចំឡើងកាលពីរាត្រីថ្ងៃទី៥ ឧសភា ឆ្នាំ២០១៦ នៅភោជនីយដ្ឋានវីហ្វ្រែន ជិតផ្សារដេប៉ូ រាជធានីភ្នំពេញ ។ ប្អូនប្រុសរបស់កញ្ញាដេនី ខ្វាន់ ជាអ្នកសិល្បៈថ្មី ដោយបានចាប់អាជីពសម្តែងដូចបងស្រីរបស់ខ្លួន កញ្ញាដេនី ខ្វាន់ ដែរ ។ ក្រៅពីសម្តែងភាពយន្ត តារាថ្មីរូបនេះបានថតស្ប៉តអប់រំ និងបង្ហាញម៉ូដផងដែរ ។
លោកគីម សាន បានទិញឈុតសម្លៀកបំពាក់ពីប្រទេសបារាំងអស់ជាង២ពាន់ដុល្លារមកគ្រងនៅថ្ងៃពិសេសរបស់ខ្លួននោះ ។ គីម សាន ឱ្យដឹងថា បងស្រីទាំងអស់របស់លោក ក្នុងនោះមានដេនី ខ្វាន់ម្នាក់ដែរ បានចំណាយប្រាក់ជាង៥ពាន់ដុល្លារ រៀបចំកម្មវិធីខួបកំណើតឱ្យលោក។ ភ្ញៀវកិត្តិយសជិត៣០០នាក់ ត្រូវបានអញ្ជើញឱ្យចូលរួមសប្បាយរីករាយ និងលើករាសីរបស់លោកគីម សាន ក្រោយពេលអាជីពសិល្បៈរីកចម្រើន ។
លោកគីម សាន ធ្លាប់ថតខារា៉អូខេឱ្យផលិតកម្មសាន់ដេ ថោន និងធ្លាប់ថតខ្សែភាពយន្តរឿង «ចំណារព្រហ្មលិខិត» របស់ទូរទស្សន៍ប៉ុស្តិ៍លេខ៩ និងត្រៀមថតឱ្យស្ថានីយទូរទស្សន៍មួយចំនួនទៀត ។ ក្រៅពីនេះត្រៀមចេញថតស្ប៉តអប់រំ និងភាពយន្តសម្រាប់បញ្ចាំងតាមរោងកុន ។
លោកគីម សាន ជាកូនពៅក្នុងចំណោមបងប្អូន៥នាក់ ក្នុងនោះដេនី ខ្វាន់ ជាកូនទី៤ ។
កញ្ញាដេនី ខ្វាន់ និយាយថា រៀបចំខួបកំណើតនេះចង់ឱ្យប្អូនប្រុសសប្បាយរីករាយ ។ ម្យ៉ាងបើនិយាយពីរឿងខាតចំណេញមិនគិតទេ តែចង់ជួបជុំមិត្តភក្តិសប្បាយរីករាយ ។
អ្នកសិល្បៈចូលរួមក្នុងឱកាសនោះ មានអ្នកនាងចន ច័ន្ទលក្ខិណា លោកសាយ សៀរ៉ា នាងខ្ញុង លោកអឹុម ជីវ៉ា លោកឃ្វីន លោកមា៉ដូណា កញ្ញាឯក សុវណ្ណារ័ត្ន លោកនៅ ស៊ីនឿន លោកលាង ឧត្តម កញ្ញាដួង ម៉ានិច និងលោកសុខ វិបុល ជាដើម ៕
ចែករំលែកព័តមាននេះ