រាជធានីភ្នំពេញ ៖ ទំហំពាណិជ្ជកម្មកម្ពុជា និងកូរ៉េខាងត្បូងរំពឹងថា នឹងកើនឡើងនៅស្របពេលដែលកម្ពុជាច្បាប់វិនិយោគថ្មី កិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសនេះ នឹងចូលជាធរមាននាពេលខាងមុននោះ ។ លោក Park Heung-Kyeong ឯកអគ្គរដ្ឋទូតកូរ៉េប្រចាំកម្ពុជា នៅក្នុងវេទិកាធុរកិច្ចកម្ពុជា កូរ៉េ កាលពីពេលថ្មីៗបានលើកឡើងថា ទំហំពាណិជ្ជកម្មទ្វេភាគីរវាងប្រទេសទាំងពីរបានឈានដល់កម្រិតមួយខ្ពស់គួរឱ្យកត់សម្គាល់ ក្នុងទំហំជាង ១ ពាន់ដុល្លារអាមេរិកនៅឆ្នាំ ២០១៩ ខណៈដែលសាធារណរដ្ឋកូរ៉េជាអ្នកវិនិយោគធំជាងគេនៅកម្ពុជា ដែលបានបណ្តាក់ទុនសរុបជិត ៧ ពាន់លានដុល្លារអាមេរិក គិតចាប់ពីឆ្នាំ១៩៩៧ មកដល់បច្ចុប្បន្ន ។
លោទូត បានមានប្រសាសន៍ថា ច្បាប់វិនិយោគថ្មីរបស់កម្ពុជា និងកិច្ចព្រមព្រៀងពាណិជ្ជកម្មសេរីរវាងកម្ពុជា និងសាធារណរដ្ឋកូរ៉េ រួមជាមួយនឹងការចូលរួមជាធរមាននៃកិច្ចព្រមព្រៀងស្តីពីការលុបបំបាត់ការយកពន្ធត្រួតគ្នាពាក់ព័ន្ធ និងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធនោះ លោករំពឹងថា ទំហំពាណិជ្ជកម្ម និងវិនិយោគរវាងប្រទេសទាំងពីរពិតជាមានកំណើនកាន់តែខ្ពស់ជាក់ស្តែងមិនខាននៅពេលខាងមុខនេះ ។
លោក ជ្រឹង បុទុមរង្សី ឯកអគ្គរដ្ឋទូតកម្ពុជា ប្រចាំសាធារណរដ្ឋកូរ៉េ វិញបានឲ្យដឹងថា នៅពេលទំហំពាណិជ្ជកម្មកម្ពុជា និងកូរ៉េកើនឡើងនោះនឹងចូលរួមលើកកម្ពស់ការស្តារសេដ្ឋកិច្ច សង្គមឡើងវិញក្រោយវិបត្តិនៃជំងឺកូវីដ ១៩ ។
លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា ការចូលរួមយ៉ាងសកម្មពីសហគមធុរកិច្ចកូរ៉េនៅកម្ពុជាតាមរយៈស្ថានទូតសាធារណរដ្ឋកូរ៉េ ប្រចាំកម្ពុជា ភ្នាក់ងារជំរុញវិនិយោគ និងពាណិជ្ជកម្មកូរ៉េ សភាពាណិជ្ជកម្មកូរ៉េប្រចាំកម្ពុជា ព្រមទាំងតួអង្គពាក់ព័ន្ធដទៃទៀត បានបង្ហាញពីការយកចិត្តទុកដាក់ដល់ច្បាប់វិនិយោគថ្មីរបស់កម្ពុជា និងជួយជ្រោមជ្រែងក្នុងការផ្សព្វផ្សាយច្បាប់នេះ ឱ្យបានទូលំទូលាយ ។ លោកថា កូរ៉េបានវិនិយោគនៅកម្ពុជា ក្នុងវិស័យជាច្រើនដូចជា កសិកម្ម វាយនភណ្ឌ ដំឡើងរថយន្ត ធនាគារ ផ្សារមូលបត្រ ជាដើម ។
សូមជម្រាបថា ច្បាប់វិនិយោគថ្មីនេះត្រូវបានតាក់តែងឡើងស្របតាមការចង្អុលបង្ហាញរបស់គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥- ២០២៥ ដោយបានឆ្លងកាត់ការសិក្សាស្រាវជ្រាវ និងកិច្ចពិគ្រោះយោបល់ជាច្រើនលើកជាមួយស្ថាប័នរដ្ឋនិងផ្នែកឯកជន ដើម្បីឆ្លើយតបទៅនិងការប្រែប្រួលនៃភូមិសាស្ត្រនយោបាយនិងសេដ្ឋកិច្ច បដិវត្តន៍ឧស្សាហកម្ម ៤.០ បរិវត្តកម្មឌីជីថល និងការរអាក់រអួលនៃខ្សែច្រវាក់តម្លៃសកលដែលបណ្តាលមកពីការរាតត្បាតនៃជំងឺកូវីដ ១៩ សំដៅច្បាមយកកាលានុវត្តភាពជាអតីបរមាពីនិម្មាបនកម្មសេដ្ឋកិច្ចក្នុងតំបន់ដែលកំពុងវិវត្តយ៉ាងរហ័ស ក៏ដូចជាទាញយកផលប្រយោជន៍ពីកិច្ចព្រមព្រៀងពាណិជ្ជកម្មសេរីពហុភាគី និងទ្វេភាគីនានា ។
ទំហំពាណិជ្ជកម្មទ្វេភាគីរវាងកម្ពុជានិងកូរ៉េខាងត្បូងគិតត្រឹមរយៈពេល ៩ ខែដើមឆ្នាំ ២០២១ នេះមានទឹកប្រាក់សរុបជាង ៥៧៨លានដុល្លារអាមេរិក កើនឡើងប្រមាណជាង ១១% បើប្រៀបធៀបទៅនឹងរយៈពេលដូចគ្នាឆ្នាំ ២០២០ មានទឹកប្រាក់ជាង ៥២០ លានដុល្លារអាមេរិក ៕
ចែករំលែកព័តមាននេះ