រាជធានីភ្នំពេញ ៖ លោក ឡា មូ (La Mo) បានមានប្រសាសន៍ថា៖ «អ្វីដែលខ្ញុំរំភើបនៅពេលនេះ គឺមានសណ្ឋាគារលំដាប់ផ្កាយ…
រាជធានីភ្នំពេញ ៖ លោក ឡា មូ (La Mo) បានមានប្រសាសន៍ថា៖ «អ្វីដែលខ្ញុំរំភើបនៅពេលនេះ គឺមានសណ្ឋាគារលំដាប់ផ្កាយ ៥ ដែលគាត់អញ្ចើញខ្ញុំមកដើម្បីបង្ហាញស្នាដៃរបស់ខ្ញុំ ខ្ញុំមានអារម្មណ៍ថា វាជាពេលមួយដែលវិស័យថតរូបនៅប្រទេសកម្ពុជាយើងបានឈានទៅមុខមួយកម្រិតទៀត» ។ លោក La Mo ជាអ្នកថតរូបឯករាជ មិនចំណុះស្ថាប័នណាមួយឡើយ ហើយស្នាដៃដែលកំពុងដាក់តាំងនេះ គឺមាន ៤៤ រូប ក្រោមប្រធានបទ “In Focus” ។
យោងតាមកិច្ចសម្ភាសលោក La Mo បានបញ្ជាក់អត្ថន័យ In Focus បែបនេះថា ៖ « In Focus វាមិនមែនសំដៅទៅលើការដែលយើងយកកាម៉េរាមក Focus អោយច្បាស់នោះទេ តែសម្រាប់ខ្លួនខ្ញុំផ្ទាល់ គឺមានអត្ថន័យផ្សេងទៀត In Focus នៅពេលនេះ គឺខ្ញុំចង់បង្ហាញអំពីការដែលយើងប្រមូលអារម្មណ៍អោយស្ងប់ស្ងាត់ ដើម្បីយកទៅផលិតរូបភាពមួយអោយបានល្អឥតខ្ចោះ នោះគឺវាទាមទាអោយយើងយកបេះដូងទៅដាក់ចិត្តដាក់កាយ ហើយប្រមូលអោយវាមូល បានយើងផ្តោតអារម្មណ៍ទៅលើអ្វីមួយបានវាមានភាពទាក់ទាញ មានភាពស្រស់ស្រាយ ដើម្បីជាទស្សនីយភាព សម្រាប់អ្នកទស្សនា» ។
ក្នុងកំឡុងពេលកូវីដ ១៩ ដូចគ្រប់គ្នាបានដឹងហើយ យើងម្នាក់សុទ្ធតែមានបញ្ហាសឹងតែដូចគ្នាទាំងស្រុង យ៉ាងណាមិញក្នុងវិស័យគំនូរ វិស័យថតរូប ការតាំងពិពរណ៌នានា នឹងក៏មិនសូវខុសគ្នាប៉ុន្មានដែរ រកចំណូលមិនសូវបានទេ រហូតខាងវិស័យសិល្បៈខ្លះត្រូវបានបិទទ្វាតែម្តង ។
លោក La Mo បានបន្តថា សម្រាប់ខ្ញុំ ខ្ញុំគិតថា ប្រសិនបើកូវីដ ១៩ ស្រាកស្រាន្តបន្តិច ហើយប្រទេសអាចដំណើរការវិស័យផ្សេងៗបានវិញនោះ វិស័យទាំងអស់នឹងមកវិញជាមួយនឹងការរីកចម្រើនជាងមុន ក្នុងនោះដែរ ខ្ញុំក៏ដូចជាមិត្តភ័ក្តរបស់ខ្ញុំក្នុងវិស័យថតរូប សង្កេតឃើញថាវិស័យនេះកំពុងដំណើរការបានល្អ ប្រជាជនយើងយល់ដឹងអំពី កម្មសិទ្ធិបញ្ញានៃរូបថត ចឹងមុនពេលគេយករូបនឹងទៅតាំងនៅកន្លែងណាមួយដូចជា សណ្ឋាគារ ភោជនីយដ្ឋាន រីស៊ត ។ល។ ពួកគាត់តែទិញពីអ្នកថតរូប ដូចនេះហើយការងារដែលលក់រូបថតនឹងកំពុងតែដំណើរការ អ្នកថតរូបកំពុងតែលក់បាននូវរូបថតរបស់គាត់។ ហើយប្រជាជនយើងខ្លះគាត់មានមោទនភាពដែលអ្នកថតរូបជាជនជាតិខ្មែរថតរូបដើមលក់អោយប្រជាជនក្នុងស្រុកខ្លួនឯង មានន័យថាប្រជាជនយើងបច្ចុប្បន្នគាំទ្រស្នាដៃក្នុងស្រុក» ។
លោក ក៏បានសង្តត់ធ្ងន់ផងដែរថា កន្លងមកនៅក្នុងសណ្ឋាគារ ឬរីស៊តខ្លះ គាត់បានយករូបរបស់ អ្នកថតរូបយើងនឹងយកដាក់តាំងក្នុងកន្លែងរបស់គាត់ ដោយមិនមានការទិញលក់ជាមួយអ្នកថតរូបនោះទេ ដូចនេះម្ចាស់សណ្ឋាគារ ឬរីស៊តនោះគួរយល់ដឹងអោយបានច្បាស់ពីកម្មសិទ្ធបញ្ញារបស់គេ ។
លោក La Mo បានចែករំលែកដល់យុវជនខ្មែរគ្រប់រូបដូចនេះថា ៖ «ខ្ញុំលើកទឹកចិត្តអោយយុវវ័យជំនាន់ក្រោយអោយបង្កើតស្នាដៃមួយដោយខ្លួនឯង ព្រោះថា បច្ចុប្បន្នយើងមានទីផ្សារហើយ ប្រជាជនជួយគាំទ្រហើយ ដូចនេះធ្វើយ៉ាងណាព្យាយាមផលិតស្នាដៃរបស់យើងអោយបានល្អ នៅពេលណាមួយគេនឹងទទួលស្គាល់នូវស្នាដៃរបស់យើង ហើយអ្វីដែលសំខាន់បំផុតនោះ គឺយើងត្រូវផលិតនិងធ្វើចេញពីបេះដូង យើងមានចិត្តបរិសុទ្ធមួយធ្វើវាចេញមក នោះរូបភាពរបស់យើងនឹងមានភាពស្រស់ស្រាយបរិសុទ្ធទៅតាមនឹងដែរ» ។
គួរបញ្ជាក់ផងដែរថា ការតាំងពិព័រណ៍របស់លោក បានចាប់ផ្តើមបើកដំណើរការជាសាធារណៈចាប់ពីថ្ងៃទី ៦ ខែវិច្ឆកា ឆ្នាំ ២០២១ រហូតដល់ថ្ងៃទី ៣១ ខែមករា ឆ្នាំ ២០២២ នៅសណ្ឋាគារ Sofitel Phnom Penh Pokeethra ហើយនៅរយៈពេលប៉ុន្មានថ្ងៃនេះ យើងឃើញមានភ្ញៀវជាតិ និងអន្តរជាតិជាច្រើនបានមកទស្សនាការតាំងពិព័រណ៍នេះផងដែរ ៕
ចែករំលែកព័តមាននេះ