រាជធានីភ្នំពេញ ៖ ប្រធានសមាគមអ្នកចិញ្ចឹមសត្វកម្ពុជា បាននិយាយឲ្យដឹងថា នៅក្នុងដំណាក់កាលដំបូងៗនៃការបើកប្រទេសឡើងវិញនេះ តម្រូវការសាច់ជ្រូកមិនទាន់កើនឡើងទេ តែសកម្មភាពចិញ្ចឹមជ្រូកនៅពេលកូវីដ ១៩ នេះបានកើនឡើងដែលជាក្តីសង្ឃឹមមួយឈានដល់កម្ពុជាបានផ្គត់ផ្គង់តម្រូវការក្នុងស្រុកបាន និងអាចធ្វើការនាំចេញទៀតនៅពេលខាងមុខនោះ…
រាជធានីភ្នំពេញ ៖ ប្រធានសមាគមអ្នកចិញ្ចឹមសត្វកម្ពុជា បាននិយាយឲ្យដឹងថា នៅក្នុងដំណាក់កាលដំបូងៗនៃការបើកប្រទេសឡើងវិញនេះ តម្រូវការសាច់ជ្រូកមិនទាន់កើនឡើងទេ តែសកម្មភាពចិញ្ចឹមជ្រូកនៅពេលកូវីដ ១៩ នេះបានកើនឡើងដែលជាក្តីសង្ឃឹមមួយឈានដល់កម្ពុជាបានផ្គត់ផ្គង់តម្រូវការក្នុងស្រុកបាន និងអាចធ្វើការនាំចេញទៀតនៅពេលខាងមុខនោះ ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បាននិយាយថា តាំងពីរដ្ឋាភិបាលជំរុញនៅក្នុងវិស័យចិញ្ចឹមសត្វនៅកម្ពុជាមកការចិញ្ចឹមជ្រូកមានការរីកចម្រើនខ្លាំង ។ លោកជឿជាក់ថា មិនយូរទេកម្ពុជាមានលទ្ធភាពអាចសត្វជ្រូកចេញទៀតផង ។
«សព្វថ្ងៃនេះវិស័យចិញ្ចឹមជ្រូកនៅក្នុងប្រទេសកម្ពុជាកើនឡើងស្ទើរគ្រប់ទីផ្សារហើយមកដល់ឥលូវនេះមានក្រសួងពាក់ព័ន្ធបានយកចិត្តទុកដាក់ថែមទៀត ខ្ញុំជឿជាក់ថា វិស័យចិញ្ចឹមសត្វនឹងកាន់តែរីកចម្រើន ហើយនៅរយៈពេល ២ ឆ្នាំទៅមុខទៀតជ្រូករបស់កម្ពុជាអាចនឹងចាល់បើសិនជាគ្រប់ស្ថាប័នពាក់ព័ន្ធទាំងអស់គាត់យកចិត្តទុកដាក់មកលើវិស័យចិញ្ចឹមជ្រូកនេះ ។ ខ្ញុំជឿជាក់ថា នឹងឈានទៅដល់ការនាំចេញនៅថ្ងៃអនាគតខាងមុខដ៏ខ្លីនេះ» នេះជាការបញ្ជាក់របស់លោក ស្រ៊ុន ពៅ ។
តាមប្រធានសមាគមអ្នកចិញ្ចឹមសត្វកម្ពុជាថា ការបើកដំណើរការប្រទេសឡើងវិញបានប៉ុន្មានថ្ងៃមកនេះ តម្លៃជ្រូករស់មិនទាន់មានការប្រែប្រួលប៉ុន្មាននោះទេ ដោយសារចំនួនភ្ញៀវទេសចរមិនទាន់មានការចូលមកកម្ពុជាច្រើនហើយពិធីការបុណ្យទាននៅក្នុងស្រុកមិនទាន់មានសកម្មភាពពេញទំហឹងនៅឡើយ ។ ជាពិសេសប្រជាពលរដ្ឋនៅទូទាំងប្រទេសជួបបញ្ហា និងប្រាក់ចំណូល ធ្វើការតម្រូវការបរិភោគនៅក្នុងគ្រួសារកាត់បន្ថយទៅតាមលទ្ធភាពជាក់ស្តែង ។
លោក ស្រ៊ុន ពៅ បានឲ្យដឹងថា នៅប៉ុន្មានថ្ងៃមកនេះ តម្លៃជ្រូករស់នៅតាមក្រុមហ៊ុនលក់បានថ្លៃ ១ ម៉ឺនរៀលក្នុងមួយគីឡូក្រាម ។ តែដោយឡែកសម្រាប់ជ្រូករស់ដែលចិញ្ចឹមដោយកសិករនៅតាមបណ្តាខេត្តមួយចំនួន លក់បានតែប្រមាណ ៩០០០ រៀល ខណៈពេលមុនលក់បានតែ ៨០០០ រៀលក្នុងមួយគីឡូក្រាម ។ «ទន្ទឹមនិងតម្លៃជ្រូករស់ងើបឡើងវិញខ្លះនេះយើងការពារនៅតាមច្រកព្រំដែនកុំឱ្យមានការនាំជ្រូកដោយគ្មានច្បាប់ចូលមកក្នុងស្រុកធ្វើឱ្យប៉ះពាល់ទៅដល់តម្លៃជ្រូក និងអ្នកបរិភោគ» ។
ពាក់ព័ន្ធ និងវិស័យចិញ្ចឹមជ្រូកនៅកម្ពុជានេះ ក្រសួងពាណិជ្ជកម្មកាលពីថ្ងៃទី ៨ វិច្ឆិកា ២០២១ បានដឹកនាំកិច្ចប្រជុំពិភាក្សាលើការវិភាគថ្លៃដើមនៃផលិតកម្មជ្រូកនៅប្រទេសកម្ពុជា តាមរយៈប្រព័ន្ធវីដេអូ ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម រុក្ខាប្រមាញ់ និងនេសាទរួម និងដៃគូពាក់ព័ន្ធ ដែលមានគោលបំណងស្វែងយល់ស៊ីជម្រៅអំពីផលិតកម្ម និងថ្លៃជ្រូកនៅកម្ពុជា ជាពិសេសកត្តាសំខាន់ៗដែលជះឥទ្ធិពលដល់ថ្លៃដើម និងបញ្ហាប្រឈម សំដៅលើកកម្ពស់ភាពប្រកួតប្រជែងរបស់កម្ពុជាក្នុងវិស័យផលិតកម្មជ្រូក កម្រិតជីវភាពប្រជាកសិករ និងសេដ្ឋកិច្ច ។
ការផ្អាកកម្មវិធីបុណ្យទាន ពិធីមង្គលការ និងការជួបជុំប្រមាណ ២ ឆ្នាំមកនេះ ដើម្បីទប់ស្កាត់ជំងឺកូវីដ ១៩ នោះ បានធ្វើឲ្យទីផ្សារសាច់ជ្រូកក៍ដូចជាត្រីបាត់បង់មួយផ្នែកធំ ធ្វើឲ្យអ្នកចិញ្ចឹម និងផលិតកម្មក្នុងស្រុករងការខាតបង់ផងដែរ ៕
ចែករំលែកព័តមាននេះ