រាជធានីភ្នំពេញ ៖ ដើម្បីជំរុញទំហំពាណិជ្ជកម្មពិសេសស្វែងរកទីផ្សារលក់កសិផល កម្ពុជាគ្រោងចរចាបង្កើតកិច្ចព្រមព្រៀងពាណិជ្ជ កម្មសេរី ជាមួយប្រទេសនានាយ៉ាងហោចណាស់ចំនួន ៧ នៅក្រោយពីកិច្ចព្រមព្រៀងពាណិជ្ជកម្មសេរី ជាមួយចិនបានចូលជាធរមាន និងជាមួយកូរ៉េខាងត្បូងបានចុះហត្ថលេខាហើយនោះ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅក្នុងកិច្ចពិភាក្សាជាមួយវិស័យឯកជន លើឯកសារយុទ្ធសាស្ត្រទាញយកអត្ថប្រយោជន៍ជាអតិបរមាពីការអនុវត្តកិច្ចព្រមព្រៀងពាណិជ្ជកម្មកថ្មីៗនេះគូសបញ្ជាក់ថា កម្ពុជាមានទិសដៅបន្តចរចាបង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសមួយចំនួនទៀត ក្នុងនោះមានដូចជា សហភាពសេដ្ឋកិច្ចអឺរ៉ុបអាស៊ី, រុស្សី អង់គ្លេស សហរដ្ឋអាមេរិក ជប៉ុន ម៉ុងហ្គោលី និងឥណ្ឌា ជាដើម ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានលើកឡើងថា ដើម្បីឱ្យប្រទេសកម្ពុជាមានកំណើនសេដ្ឋកិច្ចរឹងមាំទាន់ រកទីផ្សារឱ្យបានកាន់តែច្រើនគឺការបង្កើតកិច្ចព្រមព្រៀងពាណិជ្ជកម្មសេរីនេះ ។ លោកថា តាមរយៈកិច្ចព្រមព្រៀងពាណិជ្ ជកម្មសេរីនេះ គឺជាការរកទីផ្សារថ្មីឱ្យផលិតផលក៏ដូចជាវត្ថុធាតុដើមរបស់កម្ពុជាអាចធ្វើការកែច្នៃនាំចេញ ។
លោកឧកញ៉ា លឹម ហេង បានបញ្ជាក់ថា “យើងរំពឹងថា កិច្ចព្រមព្រៀពាណិជ្ជកម្មសេរី នឹងចូលមកជំនួសឱ្យការនាំចេញផលិតផលរបស់កម្ពុជាដោយរួចពន្ធនេះ នឹងធ្វើឱ្យអ្នកវិនិយោគិនផ្សេងៗ ចូលមកវិនិយោគនៅកម្ពុជា ធ្វើការកែច្នៃឱ្យលទ្ធភាព បង្កើតតម្លៃបន្ថែម បង្កើតទីផ្សារឱ្យរឹងមាំ» ។
អនុប្រធានសភាពាណិជ្ជកម្មកម្ពុជា បានគូសបញ្ជាក់ថា បើកម្ពុជាមិនមានកិច្ចព្រមព្រៀងពាណិជ្ជកម្មសេរី កម្ពុជាអាចទាក់ទាញអ្នកវិនិយោគនៅមានកម្រិត តែបើកម្ពុជាមានកិច្ចព្រមព្រៀងពាណិជ្ជកម្មសេរី ឧទាហរណ៍អនុវត្តជាមួយចិនទន្ទឹមនឹងសង្គ្រាមពាណិជ្ជកម្មរវាងអាមេរិកនិងចិនតម្លើងពន្ធដាក់គ្នានេះ និងអាចទាក់ទាញក្រុមហ៊ុនអាមេរិកជាច្រើនមកកាន់ប្រទេសកម្ពុជា ដើម្បីផលិតនាំចេញទៅប្រទេសចិន។លើសពីនេះស្របពេលកម្ពុជាមាន GSP ជាមួយអាមេរិកថែមទៀតទៀតនោះ កម្ពុជាកាន់តែទាក់ទាញក្រុមហ៊ុនចិនជាច្រើនមកវិនិយោគនៅកម្ពុជាដើម្បីនាំចេញទៅអាមេរិកដោយរួចពន្ធ ។
តាមរដ្ឋមន្ត្រីក្រសួងពាណិជ្ជកម្ម ថាក្រសួងលោកបានបង្កើតក្រុមការងារមួយ សម្រាប់ធ្វើការសិក្សាស្រាវជ្រាវ ប្រមូលធាតុចូលពីផ្នែកពាក់ព័ន្ធ និងវិស័យឯកជន ដើម្បីរៀបចំយុទ្ធសាស្ត្រទាញយកផលប្រយោជន៍ជាអតិបរមាពីការអនុវត្តកិច្ចព្រមព្រៀងពាណិជ្ជកម្មសេរី ដែលកម្ពុជាជាហត្ថលេខី ។ ដោយផ្អែកលើការសិក្សាស្រាវជ្រាវនេះ ក្រុមការងារបានកំណត់មុខទំនិញសក្ដានុពលចំនួន ១០ មុខ ដែលត្រូវជំរុញផលិតកម្ម និងជំរុញការនាំចេញ មានដូចជា ស្រូវ-អង្ករ ដំឡូងមី ចេក, មៀនប៉ៃលិន ស្វាយ, ស្វាយចន្ទី, សាច់សត្វ, ជ័រកៅស៊ូ, ម្នាស់ និងម្រេច ៕
ចែករំលែកព័តមាននេះ