រាជធានីភ្នំពេញ ៖ ការដាក់ប្រាក់បញ្ញើរបស់ប្រជាពលរដ្ឋនៅតាមគ្រឹះស្ថានហិរញ្ញវត្ថុ មានការកើនឡើងប្រមាណ ១៩០ លានដុល្លារអាមេរិក ខណៈការផ្តល់ឥណទានជូនអតិថិជនបានឡើងជាង ៦០០ លានដុល្លារអាមេរិក ។ លោក កាំង តុងងី ប្រធាននាយកដ្ឋានទំនាក់ទំនង នៃសមាគមមីក្រូហិរញ្ញវត្ថុកម្ពុជា បានឱ្យដឹងថា តាមរយៈទិន្នន័យពីសមាជិករបស់សមាគមមីក្រូហិរញ្ញវត្ថុកម្ពុជា ដែលមានគ្រឹះស្ថានមីក្រូហិរញ្ញវត្ថុ គ្រឹះស្ថានភតិសន្យាហិរញ្ញវត្ថុ និងគ្រឹះស្ថានឥណទានជនបទ ដែលមិនរាប់បញ្ចូលទិន្នន័យធនាគារនោះ វិស័យមីក្រូហិរញ្ញវត្ថុមានការកើនឡើងទាំងប្រាក់បញ្ញើ និងឥណទានក្នុងត្រីមាសទី ៣ ឆ្នាំ ២០២១ ។
លោកគូសបញ្ជាក់ថា គិតត្រឹមដំណាច់ខែកញ្ញា ឆ្នាំ ២០២១ ចំនួនអតិថិជនដែលដាក់ប្រាក់បញ្ញើបានកើនឡើងដល់ជាង ២,៨ លាននាក់ ពោលគឺកើនឡើងចំនួន ៣៣.៦៨៦ នាក់ ធៀបនឹងត្រីមាសមុន ខណៈបរិមាណប្រាក់បញ្ញើបានកើនឡើងដល់ ៤.០៧៣ លានដុល្លាសហរដ្ឋអាមេរិក ពោលគឺកើនឡើងចំនួន ១៩០ លានដុល្លាសហរដ្ឋអាមេរិកធៀបនឹងត្រីទី ២ ។ ចំពោះឥណទានក៏បានកើនឡើងរហូតដល់ ៨.២១៨ លានដុល្លាសហរដ្ឋអាមេរិក ដោយកើនឡើងប្រមាណ ៦០០ លានដុល្លាសហរដ្ឋអាមេរិកបើធៀបនឹងត្រីមាសមុន ខណៈចំនួនអតិថិជនកម្ចីបានកើនឡើងដល់ ២,០២ លាននាក់ ដោយកើនឡើង ៥១.១១៦ នាក់បើធៀបនឹងត្រីមាសទី ២ ក្នុងឆ្នាំ ២០២១ ។
«ការកើនឡើងនេះអាចជាសញ្ញាណបង្ហាញការងើបឡើងវិញនៃសេដ្ឋកិច្ចកម្ពុជា ដោយសារតម្រូវការឥណទានក្នុងការចាប់ផ្តើម ឬ ពង្រីកអាជីវកម្ម ។ យ៉ាងណាក្តីសមាគមមីក្រូហិរញ្ញវត្ថុ នឹងបន្តតាមដានដោយយកចិត្តទុកដាក់នូវនិនាការណ៍ផ្សេងៗក្នុងវិស័យ ដើម្បីការពារផលប៉ះពាល់ណាមួយដែលអាចនឹងកើតឡើងជាយថាហេតុ» នេះជាការគូសបញ្ជាក់របស់លោក កាំង តុងងី ។
លោកប្រធាននាយកដ្ឋានទំនាក់ទំនង នៃសមាគមមីក្រូហិរញ្ញវត្ថុកម្ពុជាបានបញ្ជាក់បន្ថែមថា ជាទូទៅគ្រប់គ្រឹះស្ថានមីក្រូហិរញ្ញវត្ថុឬគ្រឹះស្ថានធនាគារផ្សេងៗ មានប្រាក់ត្រៀមផ្តល់ជូនអតិថិជនគ្រប់ពេល តែសំខាន់គេត្រូវពិនិត្យមើលលើលក្ខណ្ឌអតិថិជននីមួយៗមុខផ្តល់កម្ចី ។ «អ៊ីចឹងសម្រាប់វិស័យហិរញ្ញវត្ថុទាំងមូលយើងមិនមានបញ្ហាកង្វះដើមទុននោះទេ ។ យើងមិនមានកង្វះសាច់ប្រាក់ក្នុងការផ្តល់ជូនអតិថិជនរបស់យើងនោះទេ បើសិនជាអតិថិជនត្រូវការ ហើយមានលក្ខខណ្ឌត្រឹមត្រូវ និងសមស្របនោះយើងនឹងផ្តល់ឥណទានជូនពួកគាត់» ៕
ចែករំលែកព័តមាននេះ