រាជធានីភ្នំពេញ ៖ បើទោះបីកម្ពុជាបានប្រកាសបើកប្រទេសគ្រប់វិស័យឡើងវិញ តែវិស័យអចលនទ្រព្យត្រូវបានគេមើលឃើញថាមិនងាយនឹងងើបឡើងវិញក្នុងពេលឆាប់ៗនេះទេ ។ វិស័យនេះងើបឡើងវិញលុះត្រាមានវិនិយោគិនបរទេសចូលមកបណ្តាក់ទុននៅកម្ពុជា ដែលអ្នកជំនាញរំពឹងថា នឹងអាចនៅពាក់កណ្ដាលឆ្នាំ ២០២២ ។…
រាជធានីភ្នំពេញ ៖ បើទោះបីកម្ពុជាបានប្រកាសបើកប្រទេសគ្រប់វិស័យឡើងវិញ តែវិស័យអចលនទ្រព្យត្រូវបានគេមើលឃើញថាមិនងាយនឹងងើបឡើងវិញក្នុងពេលឆាប់ៗនេះទេ ។ វិស័យនេះងើបឡើងវិញលុះត្រាមានវិនិយោគិនបរទេសចូលមកបណ្តាក់ទុននៅកម្ពុជា ដែលអ្នកជំនាញរំពឹងថា នឹងអាចនៅពាក់កណ្ដាលឆ្នាំ ២០២២ ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជាបាននិយាយថា ភ្លាមៗបន្ទាប់ពីរាជរដ្ឋាភិបាលកម្ពុជាបានប្រកាសបើកប្រទេសឡើងវិញនោះ ឃើញថាសកម្មភាពអាជីវកម្ម សកម្មភាពសេដ្ឋកិច្ចរបស់កម្ពុជាដែលបានស្ងប់ស្ងាត់អស់រយៈពេលជាយូរមកហើយនោះចាប់ផ្ដើមកម្រើកឡើងវិញ ប៉ុន្តែនៅក្នុងកំលុងពេលនេះរហូតដល់ដាច់ឆ្នាំ ២០២១ គេរំពឹងថា វិនិយោគិនដែលបន្តដាក់ទុនវិនិយោគនៅក្នុងប្រទេសកម្ពុជា ជាពិសេសវិស័យអចលនទ្រព្យ គឺជាអ្នកវិនិយោគក្នុងស្រុក មិនទាន់មានអ្នកមកពីបរទេសទេ ។
លោកបានបញ្ជាក់ថា ការចូលរួមពីសំណាក់វិនិយោគិនក្នុងស្រុក មិនទាន់អាចគ្រប់គ្រាន់ក្នុងការរុញច្រានកំណើននៃវិស័យអចលនទ្រព្យឱ្យមានសន្ទុះប៉ុន្មានទេ គឺត្រូវការមានការចូលរួមពីវិនិយោគិនបរទេសបន្ថែមទៀត ។ ថ្លែងនៅក្នុងសន្និសីទមួយកាលពីព្រឹកថ្ងៃទី ០៣ វិច្ឆិកា ២០២១ លោក ច្រឹក សុខនីម បន្តថា សម្រាប់វិនិយោគិនបរទេសវិញគេរំពឹងថា នឹងចាប់ផ្ដើមចូលមកកម្ពុជានៅអំឡុងពេលក្រោយពិធីបុណ្យចូលឆ្នាំចិនរួច ។ ពេលនោះវិនិយោគិនចិននៅតែបន្តនាំមុខគេ ហើយក៏មានវិនិយោគិនជនជាតិជប៉ុននិងជនជាតិផ្សេងទៀតផងដែរ ។ កំណើនវិនិយោគិនបរទេសចូលមកក្នុងប្រទេសកម្ពុជានឹងនាំមកនូវធនធានមនុស្ស ហិរញ្ញវត្ថុ ដែលនឹងធ្វើឱ្យកំណើន GDP របស់កម្ពុជាមានសន្ទុះមួយកម្រិតថែមទៀត ។
លោក ឌឹត ចណ្ណា អគ្គនាយកក្រុមហ៊ុនអចលនទ្រព្យឡាក់គី រៀលធី បានមើលឃើញផងដែរថា វិនិយោគិនបរទេសនឹងចាប់ផ្ដើមចូលមកស្វែងរកឱកាសវិនិយោគនៅក្នុងប្រទេសកម្ពុជានៅដើមឆ្នាំ ២០២២ ពីព្រោះថា នៅពេលនេះបើទោះបីជាកម្ពុជាបើកប្រទេសឡើងវិញអនុញ្ញាតឱ្យវិនិយោគិនបរទេសនិងទេសចរចូលមកមែន ប៉ុន្តែលក្ខខណ្ឌនៃប្រទេសមួយចំនួននៅបន្តរឹតបន្តឹងចំពោះអ្នកចូលប្រទេសវិញ ដូច្នេះនៅពេលប្រជាជនរបស់គេចេញក្រៅប្រទេស ហើយចូលវិញគឺតម្រូវឱ្យធ្វើចត្តាឡីស័ករយៈពេលណាមួយ ។
លោកបន្តថា យ៉ាងណាក្ដីនៅពេលរដ្ឋាភិបាលប្រកាសពីការបើកប្រទេសឡើងវិញ វាគឺជារឿងល្អណាស់ដែលវិនិយោគិនធុរជន និងអាជីវករទន្ទឹងរង់ចាំ ពីព្រោះរយៈពេលជិត ១ ឆ្នាំទៅហើយដែលពួកគេអាក់ខានក្នុងការបញ្ចេញសកម្មភាពវិនិយោគ អាជីវកម្មនិងធុរកិច្ច ។
បើតាមអ្នកជំនាញក្នុងវិស័យអចលនទ្រព្យជាច្រើនក៏បានមើលឃើញថា វិស័យនេះ នៅតែពឹងលើការវិនិយោគពីបរទេស នៅក្នុងនោះគេឃើញថា វិនិយោគិនជនជាតិចិនជាអ្នកដាក់ទុនវិនិយោគច្រើនជាងគេនៅក្នុងគម្រោងធំៗ អគារខ្ពស់នៅតាមដងផ្លូវសំខាន់ៗក្នុងរាជធានីភ្នំពេញជាដើមនោះ ៕
ចែករំលែកព័តមាននេះ