រាជធានីភ្នំពេញ ៖ ទំហំពាណិជ្ជកម្មទ្វេភាគីក្នុងឆ្នាំ ២០២១ និងទំនាក់ទំនងសហប្រតិបត្តិការ ស៊ីជម្រៅកម្ពុជា-ចិន បានធ្វើឱ្យអ្នកជំនាញខាងសេដ្ឋកិច្ច និងពាណិជ្ជករនៅក្នុងស្រុកបានប្រមើលឃើញថា ទោះក្នុងរយៈពេល ៥…
រាជធានីភ្នំពេញ ៖ ទំហំពាណិជ្ជកម្មទ្វេភាគីក្នុងឆ្នាំ ២០២១ និងទំនាក់ទំនងសហប្រតិបត្តិការ ស៊ីជម្រៅកម្ពុជា-ចិន បានធ្វើឱ្យអ្នកជំនាញខាងសេដ្ឋកិច្ច និងពាណិជ្ជករនៅក្នុងស្រុកបានប្រមើលឃើញថា ទោះក្នុងរយៈពេល ៥ ឆ្នាំ ឬលើសពីនេះទៀតអ្នកវិនិយោគជនជាតិចិននឹងនៅតែជាអ្នកបោះទុនវិនិយោគឈានមុខគេនៅកម្ពុជាក្នុងចំណោមអ្នកវិនិយោគមកពីបណ្តាប្រទេសផ្សេងទៀត ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិតកម្ពុជា បានលើកឡើងថា ក្នុងឆ្នាំ ២០២១ នេះសន្ទុះទំហំពាណិជ្ជកម្មកម្ពុជា-ចិន មានការកើនឡើងហើយការកើនឡើងនេះដោយសារតែនៅតាមបណ្តាប្រទេសនានាដែលត្រូវនាំផលិតផលទៅប្រទេសចិន ក៏ជួបវិបត្តិជំងឺកូវីដ ១៩ និងដោយសារតែការចុះកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន បានរួមចំណែកនៅក្នុងជំរុញផលិតកម្ម និងពាណិជ្ជកម្មរវាងប្រទេសទាំងពីរ ។ លោកបានបញ្ជាក់ថា ក្នុងរយៈពេល ៥ ឆ្នាំទៅមុខទៀត បើតាមអ្វីដែលខ្ញុំមើលវិនិយោគិនជនជាតិចិន នឹងនៅតែនាំមុខគេក្នុងការវិនិយោគនៅកម្ពុជា ។ លោកបណ្ឌិតលើកឡើងថា ជាកិច្ចខិតខំរបស់រាជរដ្ឋាភិបាល គឺជំរុញឱ្យពាណិជ្ជកម្មរវាងកម្ពុជា និងចិន នេះកាន់តែប្រសើរ និងមានទំហំធំជាបន្តទៅទៀត ដោយផ្អែកលើកិច្ចព្រមព្រៀងពាណិជ្ជកម្មសេរីទ្វេភាគី និងការខិតខំចរចារទៅលើរបាំងមិនមែនពន្ធគយ ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាយល់ឃើញថា អ្នកវិនិយោ គមកពីប្រទេសចិន គឺនៅតែជាអ្នកវិនិយោគឈានមុខបណ្តាប្រទេសផ្សេងៗទៀតដដែល ព្រោះចាប់ពីឆ្នាំ ២០២២ តទៅ កម្ពុជា-ចិន នឹងចាប់ផ្តើមអនុវត្តកិច្ចព្រមព្រៀងពាណិជ្ជកម្មសេរី ទ្វេភាគីបន្ថែមទៀត ។ ដូច្នេះកំណើនវិនិយោគមកពីចិននឹងមានការកើនឡើងនៅប្រទេសកម្ពុជា ដើម្បីផលិត និងកែច្នៃផលិតផលនាំចេញទៅប្រទេសចិនវិញ ក៏ដូចនាំទៅសហរដ្ឋអាមេរិក ខណៈសង្គ្រាមពាណិជ្ជកម្មរវាងចិន និងអាមេរិកនៅតែតានតឹង ។
លោកឧកញ៉ា គូសបញ្ជាក់ថា អ្វីដែលយើងរំពឹងនោះ គឺកម្ពុជាជាមិត្តដែកថែបរបស់ចិន ដែលអាចទាក់ទាញអ្នកវិនិយោគចិនបានកាន់តែច្រើននៅពេលដែលកម្ពុជាមានច្បាប់វិនិយោគថ្មី។ដូចនេះក្នុងការដណ្តើមអ្នកវិនិយោគដូចគ្នានេះកម្ពុជាយើងមានភាពអនុគ្រោះ និងអាទិ ភាពច្រើនជាងបណ្តាប្រទេសនៅក្នុងតំបន់ ។ យើងបានឃើញហើយវិនិយោគនៅឡាវ ផ្លូវ រថភ្លើងល្បឿនលឿនកំពុងតែតភ្ជាប់ទៅគម្រោងផ្លូវខ្សែក្រវាត់មួយ ដែលអាចទៅថៃ ឬមកកាន់ កម្ពុជា ។ យើងសង្ឃឹមថា ផ្លូវរថភ្លើងល្បឿនលឿននេះអាចនឹងតភ្ជាប់មកកាន់កម្ពុជា បានកាន់តែឆាប់ ដើម្បីយើងភ្ជាប់ការដឹកជញ្ជូនពីកម្ពុជាទៅចិនដោយផ្ទាល់ដោយឆ្លងកាត់ប្រទេសឡាវនេះ ។
ក្រៅពីអ្នកវិនិយោគក្នុងស្រុក និងអ្នកវិនិយោគចិនឈានមុខនៅកម្ពុជានោះ អ្នកវិនិ យោគនៅតាមបណ្តាប្រទេសជិតខាងដូចជា ៖ វៀតណាម, ថៃ, ជប៉ុន និងកូរ៉េខាងត្បូង ក៏ជាប្រទេសដែលមានគម្រោងវិនិយោគច្រើននៅកម្ពុជាផងដែរ នេះបើតាមការបញ្ជាក់ពីលោកឧកញ៉ា លឹម ហេង ។
ក្រសួងពាណិជ្ជកម្មបានបង្ហាញថា គិតត្រឹមរយៈពេល ៩ ខែ ឆ្នាំ ២០២១ នេះ ទំហំ ពាណិជ្ជកម្មសរុបរវាងកម្ពុជា-ចិន មានទឹកប្រាក់ជាង ៧.៩៦៨ លានដុល្លារអាមេរិក បើប្រៀបធៀបទៅនឹងរយៈពេលដូចគ្នា និងឆ្នាំ ២០២០ មានជាង ៥.៧៥៩ លានដុល្លារអាមេរិក ពោល គឺមានការកើនឡើងជាង ៣៨% ៕
ចែករំលែកព័តមាននេះ