ក្រោយពេលដែលប្រមុខរាជរដ្ឋាភិបាល បានប្រកាសពីការបើកប្រទេស និងបើកវិស័យផ្សេងៗឡើងវិញកាលពីម្សិលមិញនេះ គេសង្កេតឃើញមានអ្នកសិល្បៈជាច្រើនបានសម្តែងការអបអរ និងសប្បាយរីករាយ ត្បិតពួកគេយល់ថា
រាជធានីភ្នំពេញ ៖ ក្រោយពេលដែលប្រមុខរាជរដ្ឋាភិបាល បានប្រកាសពីការបើកប្រទេស និងបើកវិស័យផ្សេងៗឡើងវិញកាលពីម្សិលមិញនេះ គេសង្កេតឃើញមានអ្នកសិល្បៈជាច្រើនបានសម្តែងការអបអរ និងសប្បាយរីករាយ ត្បិតពួកគេយល់ថា អាជីពសិល្បៈអាចនឹងមានទឹកមាត់លេបឡើងវិញ ក្រោយស្ងប់ស្ងាត់ប្រមាណ២ឆ្នាំមកនេះ។
ទាំងសិល្បករ និងផលិតករភាពយន្តបានសម្តែងនូវអារម្មណ៍រីករាយ នៅពេលការងារផ្សេងៗពាក់ព័ន្ធនឹងវិស័យសិល្បៈបានចាប់ផ្តើមកម្រើកឡើងវិញ បើទោះបីផ្នែកខ្លះនៅបន្តរឹតបណ្តឹងនៅឡើយក្តី។ អ្វីជាការកត់សម្គាល់នោះ អ្នកសិល្បៈដែលមានជំនាញកាត់សក់ និងការសម្តែងច្រៀងផ្សេងៗនៅក្នុងពិធីមង្គលការនោះ ក៏បានចាប់ផ្តើមផ្សព្វផ្សាយទទួលការជួលឡើងវិញផងដែរ។
រោងកុន និងរោងសិល្បៈនានាកាលប៉ុន្មានថ្ងៃ ក៏គេសង្កេតឃើញមានការមមាញឹកផងដែរ សម្រាប់ការបោះសម្អាត និងរៀបចំជាថ្មី សម្រាប់ទទួលទស្សនិកចូលទស្សនា និងការសម្តែងសិល្បៈរបស់ខ្លួន។ អ្វីជាការកត់សម្គាល់ទៀតនោះ បន្ទាប់ពីប្រមុខរាជរដ្ឋាភិបាលប្រកាសបើកអោយមានរៀបចំអាពាហ៍ពិពាហ៍ដែលមានលក្ខណៈតូចតាចនោះ អ្នកសិល្បៈមួយចំនួនដែលគ្រោងនឹងរៀបការនោះក៏បានបង្ហាញអារម្មណ៍រីករាយផងដែរ ត្បិតពួកគេអាចរៀបចំពិធីបានពេញមុខពេញមាត់។
ដោយឡែកសម្រាប់តារាចម្រៀងវិញ ពួកគេខ្លះក៏បានសម្តែងក្តីសង្ឃឹមក្នុងចិត្តថា ពួកគេនឹងបានជួបដោយផ្ទាល់ឡើងវិញជាមួយប្រិយមិត្តគាំទ្រ ត្បិតការរៀបចំខន់សឺតនានាអាចនឹងផ្តល់ឱកាសអោយទស្សនិកជនចូលទស្សនា ទោះជាមិនបានច្រើនក្តី។
សម្រាប់អ្នកសិល្បៈដែលមានវង្សតន្ត្រីសម្រាប់ជួលក្នុងពិធីមង្គលការវិញ គេក៏សង្កេតឃើញដែរថា ពួកគេក៏ចាប់ផ្តើមទួលបានការកក់ពីអតិថិជនជាបណ្តើរឡើងវិញហើយដែរ។ ទាំងអស់នេះបញ្ជាក់ថា អ្នកសិល្បៈកំពុងមានទឹកមាត់លេបឡើងវិញ ក្រោយពីស្ងប់ស្ងាត់ឡើងស្ងួតកអស់រយៈពេលប្រមាណ២ឆ្នាំមកនេះ ដោយសារតែជំងឺកូវីដ១៩៕
ចែករំលែកព័តមាននេះ