បើទោះបីជាស្ថិតក្នុងបរិបទនៃសម័យកាលកូវីដ១៩នាពេលនេះក៏ដោយ ប៉ុន្តែមហោស្រពភាពខ្នាតខ្លីសម្រាប់ឆ្នាំ២០២១នេះ នៅតែអាចឆក់យកទស្សនិកជនអោយចូលទស្សនាតាមរយៈអនឡាញបានប្រមាណជាង២ម៉ឺននាក់
រាជធានីភ្នំពេញ ៖ បើទោះបីជាស្ថិតក្នុងបរិបទនៃសម័យកាលកូវីដ១៩នាពេលនេះក៏ដោយ ប៉ុន្តែមហោស្រពភាពខ្នាតខ្លីសម្រាប់ឆ្នាំ២០២១នេះ នៅតែអាចឆក់យកទស្សនិកជនអោយចូលទស្សនាតាមរយៈអនឡាញបានប្រមាណជាង២ម៉ឺននាក់ផងដែរ។ កាលពីថ្ងៃពុធ ទី២៧ ខែតុលា ឆ្នាំ២០២១ មហោស្រពភាពយន្តខ្លីចតុមុខ (CSFF) បានប្រកាសបិទការចាក់បញ្ចាំងភាពយន្តខ្លីរបស់ខ្លួន ក្រោមវត្តមានរបស់លោករដ្ឋលេខាធិការក្រសួងព័ត៌មាន ជា ចាន់បរិបូណ៍។
នាឱកាសនេះ លោកបានលើកឡើងថា ៖ «ក្រសួងព័ត៌មានតែងតែចូលរួមចំណែកនៅក្នុងការលើកស្ទួយវិស័យភាពយន្តនៅក្នុងប្រទេសកម្ពុជា។ ក្រសួងបានជម្រាបជូនស្ថានីយទូរទស្សន៍ឱ្យសូមចាក់ភាពយន្តកម្ពុជានៅម៉ោងមាស ដែលជាម៉ោងមានទស្សនិកជនច្រើន»។ លោកបានសម្តែងនូវភាពសោមនស្សរបស់លោក និងបានកោតសរសើរទៅលើស្មារតីដឹកនាំរបស់ ក្រុមការងារមហោស្រពភាពយន្តខ្លីចតុមុខ ដែលបានរៀបចំកម្មវិធីនេះឡើង ដើម្បីវិស័យភាពយន្តនៅក្នុងប្រទេសកម្ពុជា។
លោកបញ្ជាក់ថា នៅក្នុងកំឡុងពេលការចាក់បញ្ចាំងភាពយន្តខ្លីតាមរយៈអនឡាញនៅឆ្នាំនេះ មហោស្រពភាពយន្តខ្លី នៅតែបន្តទទួលការចូលរួមពីទស្សនិកជនដែលមានចំណាប់អារម្មណ៍នៅក្នុងវិស័យភាពយន្តនេះ។
លោក ស៊ុំ ស៊ីថែន ប្រធានមហោស្រពភាពយន្តខ្លីចតុមុខឆ្នាំ ២០២១ នេះ បានថ្លែងក្នុងពិធីបិទការចាក់បញ្ចាំងនេះថា «នៅឆ្នាំនេះ កម្មវិធីត្រូវបានប្រព្រឹត្តរយៈពេល៥ថ្ងៃ តាមរយៈគេហទំព័រហ្វេសប៊ុកផ្លូវការរបស់មហោស្រព «Chaktomuk Short Film Festival»។
លោក ស៊ីថែន បានបន្តថា៖ «ការប្រព្រឹត្តិតាមរយៈអនឡាញនេះ ជាចំណាត់ការថ្មីបំផុតក្នុងប្រវត្តិសាស្ត្រ របស់មហោស្រពយើង។ ដូច្នេះខ្ញុំជឿថា បទពិសោធន៍ដែលប្រិយមិត្តគាំទ្រមានមិនដូចជាអ្នកប្រើបណ្តាញសង្គមធម្មតានោះឡើយ។ បានន័យថា ប្រិយមិត្តយើង ដាក់ចិត្តក្នុងការទស្សនារឿងដែល មហោស្រពយើងជ្រើសមក ហើយរឿងទាំងនោះក៏រើសទស្សនិកជនដែរ» ។ ប្រធានមហោស្រពឆ្នាំនេះ បានធ្វើការបូកសរុបចំនួនទស្សនិកជនដែលបានចូលរួម មកមើលភាពយន្តខ្លីៗ នៅលើ ទំព័រហ្វេសបុក «Chaktomuk Short Film Festival» ដែលមហោស្រពបានចាក់បញ្ចាំងភាពយន្តខ្លីទាំង៦៦រឿង ដែលត្រូវបានជ្រើសរើសរួចហើយ គឺចំនួនអ្នកទស្សនាសរុបមាន ២៤ ០០០ នាក់ និងការផ្សព្វផ្សាយតាមរយៈបណ្តាញសង្គមដែលទទួលបានការចូលចិត្ត (likes) បន្ថែម ៥០០ នាក់, អ្នកចាប់អារម្មណ៍ (reaches) ២៦០០០ នាក់ នេះគិតចាប់ពីថ្ងៃទី២៣ រហូតដល់ថ្ងៃទី២៧ ខែតុលា ។
លោកបញ្ជាក់ថា មហោស្រពឆ្នាំនេះ បានធ្វើការប្រគល់នូវរង្វាន់ជាសាច់ប្រាក់ និងលិខិតសរសើរទៅតាមប្រភេទនៃចំណាត់ថ្នាក់ជាច្រើន ដែលរួមមាន៖ ជ័យលាភីរឿងខ្លីឆ្នើមប្រចាំឆ្នាំ បានទៅលើរឿង «ប៉ាន់ក្រហម» ទទួលបានទឹកប្រាក់៤លានរៀល ពី «SEA Junction» ។ ជ័យលាភីរឿងខ្លីឆ្នើម បន្ទាប់ប្រចាំឆ្នាំ បានទៅលើរឿង «Origami Girl» ទទួលបានទឹកប្រាក់២លានរៀល ពី «Reading Film Club»។ ជ័យលាភីទស្សនិកជនក្នុងស្រុក បានទៅលើរឿង «Dream Catcher» ទទួលបានទឹកប្រាក់ ១,២លានរៀល ពី «Alien Express»។ ជ័យលាភីទស្សិកជនអន្តរជាតិ បានទៅលើរឿង« Return to Toyama» ទទួលបានទឹកប្រាក់ ២លានរៀល។ ជ័យលាភីភាពយន្តឯកសារខ្លីពី «អង្គការ WeWorld-GVC» ក្រោមគម្រោង «ជម្រើសដែល មានសុវត្ថិភាព» បានទៅលើរឿង «ការចំណាកស្រុកតាមរយៈមេខ្យល់» ទទួលបានកាមេរ៉ាឌីជីថល ១ឈុត។
តាំងនាមអ្នករៀបចំកម្មវិធីមហាស្រពភាពយន្តខ្លីចតុមុខ លើកទី១០ ឆ្នាំ២០២១ នេះ ពួកយើងសូមថ្លែងអំណរគុណយ៉ាងជ្រាលជ្រៅទៅដល់បណ្តាដៃគូទាំងអស់ និងសាធារណជន ដែលបានគាំទ្រពួកយើង ហើយធ្វើឱ្យព្រឹត្តិការណ៍មួយនេះ ក្លាយជាវេទិកាមួយដែលជួយលើកទឹកចិត្តដល់ផលិតករ សមិទ្ធិករជំនាន់ក្រោយ និងជួយជម្រុញឱ្យភាពយន្តខ្មែរមានសន្ទុះកើនឡើង និងការគាំទ្រកាន់តែខ្លាំងពីមហាជន។
មហោស្រពឆ្នាំនេះផ្ទាល់បានប្រព្រឹត្តទៅរយៈពេល៥ថ្ងៃ ចាប់ពីថ្ងៃទី២៣ ខែតុលា រហូតដល់ថ្ងៃទី២៧ ខែតុលា តាមរយៈការចាក់បញ្ចាំងតាមគេហទំព័រហ្វេសប៊ុករបស់មហោស្រពភាពយន្តខ្លីចតុមុខ ដោយភាពជោគជ័យអាស្រ័យដោយមានការជ្រោមជ្រែងពីស្ថាប័ននានាជាពិសេស ក្រសួងវប្បធម៌ និងវិចិត្រសិល្បៈ ។
ក្រុមភាពពយន្តឈូករ័ត្ន ឬ Sunflower Film Alliance ដំណើរការតាំងពីចុងឆ្នាំ២០១៧មក ចាត់ទុកជាក្រុមយុវជនក្រោម ការគ្រប់គ្រង ដោយអង្គការភាពយន្តឈូករ័ត្ន – Sunflower Film Organization – SFO ដែលចូលរួមដោយអ្នកស្ម័គ្រចិត្តជាច្រើនរូបទូទាំងប្រទេស កម្ពុជាដែលស្រឡាញ់ជំនាញភាពយន្ត អាយុចន្លោះពី១៥ឆ្នាំដល់៤០ឆ្នាំ។ អង្គការនេះផ្ទាល់បានចុះឈ្មោះជាផ្លូវការនៅក្រសួងមហាផ្ទៃ ជាអង្គការមិនរកប្រាក់ចំណេញ ចុះថ្ងៃទី១៣ ខែមីនា ឆ្នាំ២០១៩ តាមសេចក្តីប្រកាស លេខ ១៣៩៤ ប្រ.ក។
ក្រុមភាពយន្តឈូករ័ត្ន បានផលិតគម្រោងខ្លួនឯង និងសហផលិតតាំងពីចុងឆ្នាំ២០១៧ ដែលរួមមានកម្មវិធី «កុនខ្ញុំ» សម្រាប់ទូរទស្សន៍ជាតិកម្ពុជា (ទទក) កម្រងរឿងពី «គ្រួសារ» និងភាពយន្តខ្លីៗដូចជារឿង «akumu» និងរឿងខ្លីៗមួយចំនួនទៀត។ តាំងពីឆ្នាំ ២០១៩ ក្រុមនេះក៏បានរៀបចំកម្មវិធី «តោះថតភាពយន្តឯកសារនៅកម្ពុជា» (Let’s Document Cambodia) ដោយបានបណ្តុះបណ្តាលយុវជន នៅភ្នំពេញ និងតាមខេត្តនានាបានមិនតិចជាង២០០នាក់ទេ។
ក្រុមភាពយន្តឈូករ័ត្ន មានគោលដៅដ៏ចម្បង គឺចង់ឱ្យមានការយល់ដឹង កាន់តែទូលំទូលាយអំពីការផលិតភាពយន្ត ដើម្បីកសាងឧស្សាហកម្មភាពយន្តកម្ពុជា ឱ្យរឹងមានដោយរៀបចំវគ្គបណ្តុះបណ្តាលខ្លីៗ និងចាក់បង្ហាញស្នាដៃ តាមប្រព័ន្ធផ្សព្វផ្សាយនានា និងរោងភាពយន្ត ឬមហោស្រពនានា រួមទាំង មហោស្រពភាពយន្ត ខ្លីចតុមុខជា កម្មវិធីប្រចាំក្រុមដែរ ជាមួយសម្ព័ន្ធមិត្ត តាមបណ្តាខេត្តនៅកម្ពុជា ក៏ដូចជាដៃគូនៅ ក្រៅស្រុក ដើម្បីនាំស្នាដៃ យុវជនខ្មែរ ឱ្យមាន ការទទួលស្គាល់នៅលើឆាកអន្តរជាតិ៕
ចែករំលែកព័តមាននេះ