រាជធានីភ្នំពេញ ៖ អ្នកដឹកនាំកម្មវិធីកំសាន្ត និងកំប្លែងរបស់ស្ថានីយទូរទស្សន៍ CTN លោក សុវណ្ណ រិទ្ធី ហៅតាវ៉ិចទ័រ បានសម្រេចជ្រើសរើសបន្ថែមតារាកំប្លែង២រូប ដើម្បីចូលរួមសម្តែងនៅក្នុងកម្មវិធី២គ្រួសារ និងកម្មវិធីមួយចំនួនទៀត ដែលបានគ្រោងទុក ខណៈពេលវត្តមានរបស់អ្នកនាង ខ្ញុង អាចបន្តសម្តែងទៀត ឬយ៉ាងណានោះ នៅមិនទាន់ច្បាស់នៅឡើយ?។
តារាកំប្លែង២រូប ដែលលោកតា វ៉ិចទ័រ សម្រេចជ្រើសរើសតាមគោលការណ៍ពីថ្នាក់ដឹកនាំ CTN នោះ គឺមានតារាកំប្លែងជើងចាស់នាយ ចាបចៀន និងតារាកំប្លែងស្ងួតជើងថ្មី ដែលល្បីតាមបណ្តាញសង្គម មានរហ័សនាម ពូណុយ ដែលអ្នកទាំងពីរនឹងនាំអោយទស្សនិកជនផ្ទុះសំណើចកាន់តែខ្លាំង។
យ៉ាងណា សម្រាប់ការជ្រើសរើសតារាកំប្លែងចូលមកក្នុងកម្មវិធីខាងលើនេះ ត្រូវបានមហាជនមួយចំនួនដាក់ការសង្ស័យថា អ្នករៀបចំទំនងជាជ្រើសរើសជំនួស ឬដោះដូរតួអ្នកនាង ខ្ញុង ដែលកំពុងមានបញ្ហាមិនអាចវិលមកការសម្តែងវិញបាន ក្នុងពេលដែលអនាគតរបស់នាងនៅស្ថានីយទូរទស្សន៍ CTN ហាក់នៅមានភាពស្រពិចស្រពិលនៅឡើយ។
ឆ្លើយតបបញ្ហានេះ លោក សុវណ្ណ រិទ្ធី ហៅតាម វ៉ិចទ័រ បានអះអាងប្រាប់កោះសន្តិភាពថា រហូតមកទល់ពេលនេះ ថ្នាក់ដឹកនាំរបស់ស្ថានីយទូរទស្សន៍ CTN មិនទាន់បានចេញលិខិតជាផ្លូវការណ៍ណាមួយបញ្ជាក់ពីការផ្អាក និងបញ្ឈប់ការងាររបស់តារាកំប្លែងនាង ខ្ញុង នោះឡើយ។
លោកថា សម្រាប់លោក និងអ្នកគ្រប់គ្រង់ស្ថានីយតែងតែមានការយោគយល់ និងផ្តល់ឱកាសជាបន្តបន្ទាប់សម្រាប់បុគ្គលិកខ្លួននៅពេលមានបញ្ហា ប៉ុន្តែសម្រាប់ទៅថ្ងៃខាងមុខទៀតនោះ លោកក៏មិនច្បាស់ និងប្រាកដពីអនាគតរបស់អ្នកនាង ខ្ញុង យ៉ាងណានោះឡើយ។
ទោះជាយ៉ាងណា បើតាមលោកតា វ៉ិចទ័រ ការសម្រេចជ្រើសរើសតួថ្មីមកសម្តែងនៅក្នុងកម្មវិធី២គ្រួសាររបស់លោកនាពេលនេះ មិនមែនជាការដោះដូរ ឬជំនួសតំណែងអ្នកនាង ខ្ញុង អ្វីនោះឡើយ ពោលគឺនេះគ្រាន់តែជាគោលការណ៍របស់ថ្នាក់ដឹកនាំ CTN ដែលមានបំណងធ្វើអ្វីដែលថ្មី និងប្លែកសម្រាប់ទស្សនិកជនតែប៉ុណ្ណោះ។
ជាការកត់សម្គាល់ ចាប់តាំងពីតារាកំប្លែងនាង ស្រេង សុកាន់ដា ហៅ ខ្ញុង បានជួបបញ្ហាជំពាក់គេជាង៥០ម៉ឺនដុល្លារ និងបានលើកដៃសុំជំនួយពីមហាជនម្នាក់១ដុល្លារ ដែលទទួលបានការរិះគន់ដូចទឹកបាក់ទំនប់នោះមក តារារូបនេះនៅមិនទាន់បង្ហាញវត្តមានសម្តែងថ្មីៗបន្តទៀតនៅស្ថានីយទូរទស្សន៍ CTN នៅឡើយទេ។
បញ្ហានេះ លោកតា វ៉ិចទ័រ ធ្លាប់បានលើកឡើងថា នៅក្នុងកាលៈទេសៈបែបនេះ លោកជឿថា ប្រសិនបើហៅអ្នកនាង ខ្ញុង មកសម្តែងឡើងវិញនោះ ក៏នាងមិនមកដែល ព្រោះកំពុងតែមានរឿងធំបែបនេះ ប៉ុន្តែសម្រាប់លោក គឺលោកនៅតែផ្តល់ឱកាសអោយរូបនាងដដែល តែសម្រាប់វត្តមាននាងបានសម្តែងនៅ CTN ទៀតឬយ៉ាងណានោះ? លោកមិនមែនជាអ្នកសម្រេចឡើយ ពោលគឺនេះជាសិទ្ធិរបស់អ្នកដឹកនាំស្ថានីយ៍។
ទោះជាយ៉ាងណា លោកតា វ៉ិចទ័រ ក៏បានសម្តែងការសោកស្តាយចំពោះរឿងរ៉ាវដែលបានកើតឡើងសម្រាប់អ្នកនាង ខ្ញុង នាពេលនេះដែរ ខណៈពេលលោកក៏មិននឹកស្មានដល់ថា នាងមានរឿងរ៉ាវដល់ថ្នាក់នេះ ក្នុងពេលដែលលោកតែងតែគិតថា នាង ខ្ញុង គួរតែរស់យ៉ាងសមរម្យនៅក្នុងអាជីពសិល្បៈរបស់នាងនាពេលបច្ចុប្បន្ននេះ៕
ចែករំលែកព័តមាននេះ