ខេត្តកំពង់ស្ពឺ ៖ មានករណីគ្រោះថ្នាក់ចរាចរណ៍ បង្កដោយរថយន្តធុនធំមួយគ្រឿង ដឹកខ្សាច់ថ្មធ្ងន់ ហើយបានដាច់ហ្វាំង រេចង្កូតបុកដើមឈើ បណ្តាលធ្លាយប្រេងម៉ាស៊ីន និងម៉ាស៊ូត ហូរហៀរពេញផ្លូវ…
ខេត្តកំពង់ស្ពឺ ៖ មានករណីគ្រោះថ្នាក់ចរាចរណ៍ បង្កដោយរថយន្តធុនធំមួយគ្រឿង ដឹកខ្សាច់ថ្មធ្ងន់ ហើយបានដាច់ហ្វាំង រេចង្កូតបុកដើមឈើ បណ្តាលធ្លាយប្រេងម៉ាស៊ីន និងម៉ាស៊ូត ហូរហៀរពេញផ្លូវ នៅលើផ្លូវជាតិលេខ៤ ចន្លោះគីឡូម៉ែតលេខ១០៣-១០៤ ក្នុងភូមិទី៦ ឃុំយាយម៉ៅពេជ្រនិល (អតីតឃុំត្រែងត្រយឹង) ស្រុកភ្នំស្រួច ខេត្តកំពង់ស្ពឺ នាវេលាម៉ោង១៥និង២០នាទី ថ្ងៃទី១៩ ខែតុលា ឆ្នាំ២០២១នេះ ។
រថយន្តបង្កម៉ាក HINO ពណ៌ស ពាក់ស្លាកលេខកំពង់ស្ពឺ 3A-1446 សណ្តោងសឺមី រ៉ឺម៉ក ពាក់ស្លាកលេខ ព្រះសីហនុ 4A-3743 បើកបរដោយឈ្មោះ ឆិល សុខឡាយ ភេទប្រុស អាយុ៤០ឆ្នាំ រស់នៅភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច ខេត្តកំពង់ស្ពឺ ។
មុនពេលកើតហេតុ រថយន្តខាងលើ បានធ្វើដំណើរក្នុងទិសដៅពីកើតទៅលិច លុះដល់ចំណុចខាងលើ ស្រាប់តែបែកទុយោខ្យល់ បណ្តាលរថយន្តរេចង្កូតទៅខាងស្តាំដៃ បុកដើមឈើ ហៀរប្រេងម៉ាស៊ីនពេញផ្លូវ តែម្តង ។
តាមការបញ្ជាក់ពីមន្ត្រីនគរបាលខេត្តកំពង់ស្ពឺ បានអោយដឹងថា ករណីខាងលើនេះ ពុំបានអោយមានគ្រោះថ្នាក់ដល់មនុស្សទេ ។ ចំណែកការកកស្ទះ មន្ត្រីនគរបាលចរាចរណ៍ បានចុះអន្តរាគមន៍ សម្រួលឲ្យរថយន្តអាចធ្វើដំណើរទៅមកបានម្ខាងម្នាក់ ។ យ៉ាងណាសូមបងប្អូនប្រជាពលរដ្ឋ និងអ្នកបើកបរឆ្លងកាត់ផ្លូវជាតិលេខ៤ ជិតកន្លែងកើតហេតុ មេត្ដាជ្រាបនិងប្រុងប្រយ័ត្នខ្ពស់បំផុត ដើម្បីសុវត្ថិភាព៕
ចែករំលែកព័តមាននេះ