រាជធានីភ្នំពេញ ៖ តារាសម្តែងនាង ឈីវ ហ៊ុយឡេង ហៅ ចែឡេង បានសម្រេចចិត្តរៀបពិធីមង្គលការជាផ្លូវការហើយ បន្ទាប់ពីនាងបានភ្ជាប់ទំនាក់ទំនងស្នេហាជាមួយគូស្នេហ៍ប្រមាណជិត២ឆ្នាំមកនេះ។ យ៉ាងណា ពិធីមង្គលការរបស់តារារូបនេះ មិនត្រូវបានរៀបចំជាលក្ខណៈធំដុំឡើយ ពោលការរៀបចំត្រឹមការជួបជុំចាស់ៗ និងសាច់ញាតិទាំងសងខាងតិចតួចប៉ុណ្ណោះ ព្រោះត្រូវអនុវត្តតាមវិធានការក្រសួងសុខាភិបាល ក្នុងការទប់ស្កាត់ការឆ្លងរាលដាលនៃជំងឺកូវីដ១៩។
បើយោងតាមរូបភាពដែលត្រូវបានបង្ហោះដោយតារាសម្តែងនាង ភិន សុដាលីស ដែលបានចូលរួមពិធីខាងលើនៅថ្ងៃនេះបានបង្ហាញឃើញពីទិដ្ឋភាពការរៀបចំពិធីមង្គលការរបស់ ចែ ឡេង ដោយមានការចូលរួមពីចាស់ទុំទាំងសងខាង។ ពិធីបានរៀបចំជាលក្ខណៈផង និងលក្ខណៈចិនផង ដោយសារភាគីទាំងសងខាងមានជាប់សែសាឡាយចិន ។ ទោះជាយ៉ាងណា ដំណឹងពីការចូលរោងការរបស់ ចែ ឡេង នាពេលនេះក៏ទទួលបានការអបអរសាទរពីទស្សនិកជាច្រើនផងដែរ ។
ជាការកត់សម្គាល់ នៅមុនពេលរៀបចំពិធីមង្គលការនាពេលនេះ កន្លងមក តារាសម្តែងជាតួឯកស្រីក្នុងរឿង«លួចស្នេហ៍អ្នកជិតខាង» នាង ចែ ឡេង ធ្លាប់បានបើកចំហដោយមិលាក់លៀមពីទំនាក់ទំនងស្នេហារបស់ជាសាធារណៈផងដែរ ។ ចែ ឡេង ធ្លាប់អះអាងថា នាងកំពុងការសាងទំនាក់ទំនងស្នេហ៍ជាមួយបុរសម្នាក់ ដែលកំពុងស្វែងយល់ចិត្តគ្នាបានជាងមួយឆ្នាំហើយ ។
ចែ ឡេង គឺជាតារាសម្តែងវ័យក្មេងមួយរូបដែលមានរូបសម្រស់ស្រស់ស្អាត និងមានទេពកោសល្យសម្តែងបានយ៉ាងល្អ ។
ប្រឡូកក្នុងសិល្បៈ ទើបតែបានប៉ុន្មានឆ្នាំចុងក្រោយនេះប៉ុណ្ណោះតារារូបនេះបានបង្ហាញមុខសម្តែងជាតួឯកនៅក្នុងរឿងជាបន្តបន្ទាប់ និងMV ផងដែរ។ ទោះជាយ៉ាងណា គេនៅមិនទាន់ដឹងទេថា ក្រោយពេលដែល ចែ ឡេង បានសម្រេចចូលរោងការកសាងគ្រួសារហើយនោះ តារារូបនេះនឹងបន្តអាជីពសិល្បះរបស់នាងទៀតឬយ៉ាងណា៕
ចែករំលែកព័តមាននេះ