ខេត្តសៀមរាប៖ ជនជាតិអូស្ត្រាលីម្នាក់ជំនាញខាងលួចទ្រព្យសម្បត្តិភ្ញៀវទេសចរណ៍ ពីខេត្តព្រះសីហនុមិនទាន់អស់ចិត្ត ក៏ចូលមកខេត្តសៀមរាប លួចបន្តនៅផ្សាររាត្រីផប់ស្ទ្រីត អស់លក្ខណ៍
ខេត្តសៀមរាប៖ ជនជាតិអូស្ត្រាលីម្នាក់ជំនាញខាងលួចទ្រព្យសម្បត្តិភ្ញៀវទេសចរណ៍ ពីខេត្តព្រះសីហនុមិនទាន់អស់ចិត្ត ក៏ចូលមកខេត្តសៀមរាប លួចបន្តនៅផ្សាររាត្រីផប់ស្ទ្រីត អស់លក្ខណ៍ ជាប់អន្ទាក់ប៉ូលីសទេសចរណ៍ខេត្ត ក្រោមការដឹកនាំបញ្ជាដោយលោកវរសេនីយឯក សំ រស្មី ប្រធានអង្គភាពនគរបាលទេសចរណ៍ប្រចាំខេត្ត និងលោកវរសេនីយទោ សួង សេងគឹម អនុប្រធានអង្គភាពនគរបាលទេសចរណ៍ប្រចាំខេត្ត បានឱ្យកម្លាំងក្រោមឱវាទចុះទៅឃាត់ខ្លួនជនបរទេសម្នាក់តាមពាក្យបណ្តឹង និងការចង្អុលបង្ហាញពីជនរងគ្រោះ ដែលជាភ្ញៀវទេសចរណ៍ ដូចគ្នា រួចនាំយកមកកាន់ការិយាល័យអង្គភាពនគរបាលទេសចរណ៍ប្រចាំខេត្ត ដើម្បីធ្វើការសួរនាំ។
ហេតុការណ៍ឃាត់ខ្លួនជនជាតិអូស្ត្រាលីម្នាក់នោះធ្វើឡើងនៅវេលាម៉ោង៤ទាបភ្លឺថ្ងៃទី១១ ខែកុម្ភៈ ឆ្នាំ២០១៥ ឈានចូលថ្ងៃទី១២ ខែកុម្ភៈ ឆ្នាំ២០១៦ស្ថិតនៅចំណុចម្តុំផ្សាររាត្រីផប់ស្ទ្រីត ក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប។លោកវរសេនីយឯក សំ រស្មី ប្រធានអង្គភាពនគរបាលទេសចរណ៍ប្រចាំខេត្តបានប្រាប់ថា ដោយយោងតាមពាក្យបណ្តឹង របស់ជនរងគ្រោះជាជនជាតិបរទេសចំនួន៣នាក់ ដែលបានបាត់សម្ភារៈមួយចំនួន ទើបលោកបានដាក់កម្លាំងចុះស្រាវជ្រាវតាមផ្សាររាត្រី ក្នុងក្រុងសៀមរាប។ លោកបន្តថា ជនរងគ្រោះជាជនបរទេសចំនួន៣នាក់មានទី១/ ឈ្មោះ UYTTEBROECK MICHELភេទប្រុសអាយុ៤៥ឆ្នាំ ជាជនជាតិបែលហ្សិក កាន់លិខិតឆ្លងដែនលេខET៩៦៣៣៣១ បានចេញពីបាងកកតាមជើងយន្តហោះអន្តរជាតិ ជាភ្ញៀវទេសចរណ៍ទាំងអស់គ្នារួចនាំគ្នាបន្តជិះរថយន្តក្រុង ទៅដើរលេងកម្សាន្តនៅខេត្តព្រះសីហនុ ហើយស្នាក់នៅក្នុងផ្ទះសំណាក់បន្ទប់រួមគ្នា ត្រូវបានជនសង្ស័យលួចអស់ទ្រព្យសម្បត្តិមានដូចជា ម៉ាស៊ីនថត១គ្រឿងម៉ាកកាណុង៥Dពណ៌ខ្មៅ កាណុង ម៉ាស៊ីនថតចំនួន៣ និងទូរស័ព្ទដៃម៉ាកLG១គ្រឿង បន្ទាប់មកស្នាក់នៅ ក្នុងផ្ទះសំណាក់ជាមួយគ្នា យីហោ ថម អែនជេរី ស្ថិតនៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប ទី២/VAN TRUGNG ភេទប្រុស អាយុ២៩ឆ្នាំ ជាជាតិអាមេរិកកាំង (ភ្ញៀវទេសចរណ៍) កាន់លិខិតឆ្លងដែនលេខ ៤៦៤៤៦១៤២៩ ដែលបានចូលស្នាក់នៅក្នុងផ្ទះសំណាក់រួមគ្នា យីហោ ថមអែនជេរី ស្ថិតនៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាបត្រូវបានជនសង្ស័យលួចទ្រព្យសម្បត្តិអស់រួមមាន កាម៉េរាថតរូបចំនួន១ និងទូរស័ព្ទចំនួន១ និងទី៣/JOSE GONZALEZ ភេទប្រុស អាយុ២៤ឆ្នាំ ជាជាតិអេស្ប៉ាញ (ភ្ញៀវទេសចរណ៍)កាន់លិខិតឆ្លងដែនលេខ AA E៨៣៤២៧០ ដែលបានចូលស្នាក់នៅក្នុងផ្ទះសំណាក់រួមគ្នា យីហោ ថមអែនជេរី ស្ថិតនៅក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាបត្រូវបានជនសង្ស័យលួចទ្រព្យសម្បត្តិអស់រួមមានម៉ាស៊ីនថតរូបចំនួន១ ទូរស័ព្ទចំនួន១ និងលុយមួយចំនួន ។ចំណែកជនសង្ស័យ មានឈ្មោះ ADILRASHID JABER ភេទប្រុស អាយុ៣៧ ឆ្នាំជាជនជាតិអូស្ត្រាលី កាន់លិខិតឆ្លងដែនលេខN៨១២៤៣២១ បានជិះយន្តហោះចេញពីបាងកកចូលមកភ្នំពេញ រួចបន្តដំណើរទៅកំសាន្តនៅខេត្តព្រះសីហនុ រួចក៏បានលួចរបស់ភ្ញៀវបរទេសម្នាក់ជាជនជាតិបែលហ្សិក បានហើយក៏ត្រឡប់មក ក្រុងសៀមរាបចូលទៅស្នាក់នៅផ្ទះសំណាក់ខាងលើ ជាមួយគ្នាទៀត ប៉ុន្តែនៅបន្ទប់ផ្សេងគ្នា។
លោកបន្តទៀតថា បន្ទាប់ពីជនរងគ្រោះដើរលេងក្នុងផ្សារផប់ស្ទ្រីត ក៏ប្រទះឃើញជនសង្ស័យ ក៏រត់មកប្រាប់សមត្ថកិច្ច រួចកម្លាំងជំនាញចុះមកធ្វើការឃាត់ខ្លួនភ្លាមៗ រួចនាំយកមកកាន់អង្គភាពនគរបាលទេសចរណ៍ខេត្ត ដើម្បីធ្វើការសួរនាំ។ក្រោយពីធ្វើការឃាត់ខ្លួនបានជនសង្ស័យខាងលើកម្លាំងជំនាញបាននាំខ្លួនទៅធ្វើការឆែកឆេរនៅបន្ទប់របស់ជនសង្ស័យស្នាក់នៅផ្ទះសំណាក់ខាងលើ រកឃើញវត្ថុតាងយកមក រួចហៅជនរងគ្រោះមកទទួលសម្ភារៈដែលជនសង្ស័យបានលួចយកកាលពីកន្លងទៅ។បច្ចុប្បន្នជនសង្ស័យត្រូវបានកម្លាំងជំនាញកសាងសំណុំរឿងបញ្ជូនទៅតុលាការនៅរសៀលថ្ងៃទី១៣ ខែកុម្ភៈ ឆ្នាំ២០១៦ ដើម្បីចាត់ការតាមផ្លូវច្បាប់។ចំណែកវត្ថុតាងត្រូវបានប្រគល់ឱ្យជនរងគ្រោះ ដែលជាភ្ញៀវទេសចរណ៍ទាំងបីនាក់វិញ៕ដោយ ច័ន្ទ រស្មី
ចែករំលែកព័តមាននេះ