តារាសម្តែងនាង អៀ ម៉េងលិ ហៅ ម៉ីម៉ី បានទទួលការរិះគន់ដូចទឹកបាក់ទំនប់ ក្នុងពេលដែលតារារូបនេះបានស្លៀកពាក់យ៉ាងសិចស៊ីស្ទើរបញ្ចេញដើមទ្រូងកណ្តាលវាល នៅពេលដែលនាងបាន live លក់បុរីមួយ
រាជធានីភ្នំពេញ ៖ តារាសម្តែងនាង អៀ ម៉េងលិ ហៅ ម៉ីម៉ី បានទទួលការរិះគន់ដូចទឹកបាក់ទំនប់ ក្នុងពេលដែលតារារូបនេះបានស្លៀកពាក់យ៉ាងសិចស៊ីស្ទើរបញ្ចេញដើមទ្រូងកណ្តាលវាល នៅពេលដែលនាងបាន live លក់បុរីមួយ។
រូបភាពវីដេអូខាងលើនេះ ត្រូវបានគេចែកចាយពេញបណ្តាញសង្គមហ្វេសប៊ុក និងមានអ្នកចូលទស្សនារាប់សិបម៉ឺននាក់ ខណៈពេលការរិះគន់ក៏មានយ៉ាងគគ្រឹកគគ្រែងផងដែរ។ មហាជនបានធ្វើការស្តីបន្ទោសយ៉ាងខ្លាំងទៅលើតារារូបនេះ ចំពោះការស្លៀកពាក់ដ៏សិចស៊ីមិនសមភ្នែក ហើយបើកបង្ហាញជាសាធារណៈ ខណៈពេលមហាជនខ្លះបានរិះគន់ថា ការស្លៀកពាក់នេះមិនសាកសមការថតផ្សព្វផ្សាយលក់បុរីនោះឡើយ។
យ៉ាងណា បន្ទាប់ពីមានការរិះគន់យ៉ាងចាស់ដៃពីមហាជននោះមក វីដេអូរបស់ អៀ ម៉េងលិ រូបនេះ ត្រូវបានលុបចោលវិញ ដើម្បីបញ្ចៀសការបន្ថែមនៃការរិះគន់។
ហើយជុំវិញបញ្ហាខាងលើនេះ តារាសម្តែងដែលចូលចិត្តសម្ញែងនូវភាពសិចស៊ីនាង អៀ ម៉េងលិ ហៅម៉ីម៉ី បានបង្ហោះសារតាមគណនេយ្យហ្វេសប៊ុករបស់ខ្លួនថា «ខ្ញុំមិនហាមអោយនិយាយ មិនហាមអោយរិះគន់ទេ ខ្ញុំក៏មិនចង់ល្បីដែរ តែម្នាក់ៗដូចទ្រុងជ្រួលជ្រើមស៊ែរជាន់ខ្ញុំដល់ហើយនិយាយមែន»។ នាងថា «ខ្ញុំស្លៀកតាមកាលៈទេសៈរបស់ខ្ញុំ មិនមែនគ្រប់ពេលសិចស៊ីរហូតទេ ហើយស្រីៗមួយចំនួននិយាយមកធ្វើដូចខ្លួនឯងនឹងឥតខ្ចោះ និយាយមកមើលងាយម៉ង មើលខ្លួនឯងផងមុននឹងនិយាយខ្ញុំ ហើយបើអាប្រុសខ្លះវិញ និយាយមកដូចប្រពន្ធខ្លួនឯងប្រុស ម៉ែខ្លួនឯងប្រុស អាគេពាក់សុភាពអី មិនប្រកាច់ស៊ែរហើយរិះគន់ផង» ។
បន្ថែមពីលើអ្វីដែលបានបង្ហោះការលើនេះ អៀ ម៉េងលិ បានអះអាងប្រាប់កោះសន្តិភាពតាមសារអេឡិចត្រូនិចថា «នាងមិនចង់បកស្រាយអ្វីអោយកាន់តែវែងឆ្ងាយឡើយលើរឿងនេះ ហើយក៏មានចេតនាណាមួយស្លៀកពាក់ដូច្នេះ ដើម្បីប្រម៉ូតបុរីអោយគេផងដែរ»។ នាងបញ្ជាក់ថា «ការស្លៀកពាក់បែបនេះ គឺមិនមែននាងចង់ប្រម៉ូតបុរីអោយលក់ដាច់ និងអោយមានអ្នកចូលមើលបានច្រើននោះឡើយ ព្រោះនាងមិនមែនជាអ្នកលក់ប្រចាំបុរីនោះទេ ឬបានកំម៉ុយហ្សង់ពីបុរីនោះដែរ»។ នាងថា «ចៃដន្យអីនាងចង់ទៅមើលផ្ទះនៅទីនោះផង ហើយក៏ឆ្លៀតប្រម៉ូតទីផ្សារអោយបុរីនោះបន្តិច ព្រោះក្នុងនាមជាអ្នកសិល្បៈមួយរូប»។
នាងបន្ថែមថា «ការស្លៀកពាក់របស់នាងនាពេលនេះ គឺមិនជាណាស់ណាឡើយ ព្រោះនាងមានពាក់អាវក្រៅ មិនមែនព្រលែងដើមទ្រូងចេញមកក្រៅទាំងស្រុងនោះឡើយ»។ អៀ ម៉េងលិ បានអះអាងថា «ការស្លៀកពាក់សិចស៊ីគឺជាចំណង់ចំណូលចិត្តរបស់នាងតាំងពីដើមមក ហើយការស្លៀកពាក់ខាងលើនេះ ក៏មិនហួសហេតុពេកដែរ ព្រោះនេះជាឈុតខោលអាវដែលមានអាវក្រៅ និងខាងក្នុងជាអាវកាក់ មិនមែនអាវទ្រនាប់នោះឡើយ»។
យ៉ាងណា បើតាម អៀ ម៉េងលិ ថា ការរិះគន់ពីមហាជននាពេលនេះ គឺនាងហាក់មានអារម្មណ៍មិនសប្បាយចិត្តនោះឡើយ ខណៈពេលនាងចាត់ទុកការរិះគន់ខ្លះ គឺជាការជាន់ពន្លិចមិនមែនក្នុងន័យស្ថាបនានោះឡើយ។ នាងបញ្ជាក់ថា តារាស្រុកខ្មែរ មិនមែនតែនាងម្នាក់ទេ ដែលសិចស៊ី ពោលគឺមានច្រើនទៀត ហេតុអ្វីអ្នកខ្លះសំដៅតែមកលើនាងតែម្នាក់? ហើយចង់ជាន់នាងទម្លាក់តែម្តង។ នាងថា ប្រសិនបើការរិះគន់ពួកគាត់ក្នុងន័យស្ថាបនា នោះនាងទទួលយក តែពួកគាត់ខ្លះរិះគន់មកជាន់យើងតែម្តង ដែលការរិះគន់នេះនាងមិនអាចទទួលយកបាននោះឡើយ៕
ចែករំលែកព័តមាននេះ