មន្ត្រី​៖ មាន​ប្រាង្គ​ប្រាសាទបុរាណ​ដ្ឋា​ន​ចំនួន​៨៥៧​ទីតាំង​ស្ថិត​ក្នុង​តំបន់ការពារធម្មជាតិ – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

Picture

មន្ត្រី​៖ មាន​ប្រាង្គ​ប្រាសាទបុរាណ​ដ្ឋា​ន​ចំនួន​៨៥៧​ទីតាំង​ស្ថិត​ក្នុង​តំបន់ការពារធម្មជាតិ

1 អាទិត្យ មុន
  • Phnom Penh

រាជធានី​ភ្នំពេញ​ ៖ លោក​រដ្ឋលេខាធិការ​ និង​ជា​អ្នកនាំពាក្យ​ក្រសួងបរិស្ថាន​មួយរូប​​បាន​ថ្លែង​ឲ្យ​ដឹង​ថា ក្នុង​ចំណោម​ប្រាង្គ​ប្រាសាទ បុរាណ​ដ្ឋា​ន​សរុប​ជាង ៥៣០០ កន្លែង​នៅ​ទូ​ទាំង​ប្រទេស​ក្នុង​នោះ បុរាណ​ដ្ឋា​ន ប្រាង្គ​ប្រាសាទ​ស្ថិត​ក្នុង​តំបន់ការពារធម្មជាតិ​សរុប​មាន​ចំនួន…

រាជធានី​ភ្នំពេញ​ ៖ លោក​រដ្ឋលេខាធិការ​ និង​ជា​អ្នកនាំពាក្យ​ក្រសួងបរិស្ថាន​មួយរូប​​បាន​ថ្លែង​ឲ្យ​ដឹង​ថា ក្នុង​ចំណោម​ប្រាង្គ​ប្រាសាទ បុរាណ​ដ្ឋា​ន​សរុប​ជាង ៥៣០០ កន្លែង​នៅ​ទូ​ទាំង​ប្រទេស​ក្នុង​នោះ បុរាណ​ដ្ឋា​ន ប្រាង្គ​ប្រាសាទ​ស្ថិត​ក្នុង​តំបន់ការពារធម្មជាតិ​សរុប​មាន​ចំនួន ៨៥៧ ទីតាំង ក្នុង​នោះ ៤២៦ បុរាណ​ដ្ឋា​ន​ស្ថិត​នៅ​ក្នុង​ឧទ្យាន​ជាតិ​ព្រះ​ជ័យ​វរ្ម័ន​«​ភ្នំ​គូលែន​»​។ លោក​បន្ត​ថា ចំនួន​បុរាណ​ដ្ឋា​ន​នៅ​ក្នុង​តំបន់ការពារធម្មជាតិ​និង​របៀង​អភិរក្ស​ជីវៈចម្រុះ​អាច នៅ​មាន​ច្រើន​ទៀត​ដែល​ស្ថិត​ក្នុង​ព្រៃ​ជ្រៅ​មិន​ទាន់​រក​ឃើញ​។

អ្នកនាំពាក្យ​រូប​នោះ​បាន​បន្ថែម​ថា ប្រព័ន្ធ​តំបន់ការពារធម្មជាតិ​និង​របៀង​អភិរក្ស​ចម្រុះ​កម្ពុជា​បច្ចុប្បន្ន​មាន​សរុប​មាន​ចំនួន​ជាង ៧០ ទីតាំង​នៅ​ក្នុង​ខេត្ត​ចំនួន ២១ ក្នុង​ចំណោម​ខេត្ត​រាជធានី ២៥ របស់​កម្ពុជា​មាន​ផ្ទៃដី​សរុប​ទំហំ ៧៣​លាន​ហិ​កតា ស្មើ​ប្រមាណ ៤១%​នៃ​ផ្ទៃដី​ប្រទេស​កម្ពុជា​។ លោក​ថា តំបន់ការពារធម្មជាតិ​និង​របៀង​អភិរក្ស​ជីវៈចម្រុះ​មិន​ត្រឹមតែ​សម្បូណ៌​ដោយ​ធនធានធម្មជាតិ ព្រៃឈើ សត្វព្រៃ និង​រុក្ខជាតិ​តូច​ធំ​ដែល​មាន​តម្លៃ​ផ្នែក​ប្រព័ន្ធ​អេកូឡូស៊ី និង​ការ​អភិរក្ស​ជីវៈចម្រុះ​នោះ​ទេ តែ​ក៏​មាន​បុរាណ​ដ្ឋា​ន​ដែល​ជា​ជង្រុក​នៃ វប្បធម៌ ប្រពៃណី​ទំនៀមទំលាប់​របស់​ជាតិ​សាសន៍​ខ្មែរ​ដ៏​សម្បូណ៌​បែប​។

លោក​បាន​ឲ្យ​ដឹង​ទៀត​ថា ក្រសួងបរិស្ថាន​បាន​សហការ​យ៉ាង​ជិត​ស្និទ្ធ​ជាមួយ​ក្រសួង​វប្បធម៌ និង​វិចិត្រសិល្បៈ​ក្នុង​ការ​ការពារ និង​អភិរក្ស​បុរាណ​ដ្ឋា​ន​ទាំងនេះ​។​លោក​បញ្ជាក់​ថា ក្រសួងបរិស្ថាន​មាន​យុត្តាធិការ​លើ​ការ​គ្រប់គ្រង​និង​អភិរក្ស​ធនធានធម្មជាតិ​ក្នុង​តំបន់ការពារធម្មជាតិ និង​របៀង​អភិរក្ស ចំណែក​ក្រសួង​វប្បធម៌​និង​វិចិត្រ សិល្បៈ​មាន​តួនាទី​ក្នុង​ការ​អភិរក្ស​ការពារ​បុរាណ​ដ្ឋា​ន​និង​ប្រាង្គ​ប្រាសាទ​ក្នុង​តំបន់ការពារធម្មជាតិ​ទាំងនោះ​ដូច​ជា​ការ​ជួសជុល តំហែទាំ​ជាដើម​។ លោក​ថា​នេះ​គឺជា​កិច្ចសហការ​មួយ​ប្រកបដោយ​ការ​ទទួលខុសត្រូវ​ក្នុង​នាម​រាជរដ្ឋាភិបាល​ដើម្បី​ការពារ​និង​អភិរក្ស​សម្បត្តិ​ធម្មជាតិ​ផង និង​ការពារ​សម្បត្តិ​បេតិកភណ្ឌ​វប្បធម៌​ផង​ដែល​មាន​តម្លៃ​មហាសាល​សម្រាប់​ជាតិ និង​ប្រជាជន​កម្ពុជា​។

លោក​រដ្ឋលេខាធិការ​ក៏​បាន​បញ្ជាក់​បន្ថែម​ដែរ​ថា ប្រាង្គ​ប្រាសាទ​និង​បុរាណ​ដ្ឋា​ន​ដែល​ស្ថិត​ក្នុង​តំបន់ការពារធម្មជាតិ​បាន​ផ្សារ​ភ្ជាប់​យ៉ាង​ជិត​ស្និទ្ធ​នឹង​ធនធានធម្មជាតិ ខណ​ដែល​បុរាណ​ដ្ឋា​ន​ទាំងនេះ​បាន​និង​កំពុង​ក្លាយជា​តំបន់​ទេសចរណ៍​យ៉ាង​សំខាន់​ផ្សារ​ភ្ជាប់​នឹង​ទេសចរណ៍ធម្មជាតិ និង​បាន​កំពុង​ទាក់ទាញ​ការ​ចាប់អារម្មណ៍​របស់​ភ្ញៀវ​ទេសចរ​ជាតិ និង​អន្តរជាតិ​ដូច​ជា​ប្រាសាទ​ជាំ​ស្រម​ក្នុង​ដែនជម្រកសត្វព្រៃ​គូលែន​ព្រហ្ម​ទេព​ដែល​ជា​ការ​ផ្សារ​ភ្ជាប់​រវាង​ទេសចរណ៍​សត្វ​ស្លាប​និង​វប្បធម៌ ប្រពៃណី​ទំនៀមទម្លាប់​ពលរដ្ឋ​ខ្មែរ​។

ទន្ទឹម​នោះ​ក្រសួងបរិស្ថាន​សូម​អំពាវនាវ​ដល់​ពលរដ្ឋ​ទាំងឡាយ​ដែល​រស់នៅ​ក្នុង​តំបន់ការពារធម្មជាតិ​ដែល មាន​បុរាណ​ដ្ឋា​ន​និង​ប្រាសាទបុរាណ សូម​ចូលរួម​ការពារ​និង​អភិរក្ស​ឱ្យ​បាន​ល្អ​ដើម្បី​ថែរក្សា​កេរ​មរតក​ដូនតា​ខ្មែរ​ឱ្យ​នៅ​គង់វង្ស និង​អាច​ផ្តល់​ផលប្រយោជន៍​ទាំង​ការ​សិក្សា​ស្រាវជ្រាវ​ផ្នែ​បុរាណ វិទ្យា​និង​ការ​សិក្សា​ស្វែង​យល់​ពី​ប្រពៃណី​វប្បធម៌​ទំនៀមទម្លាប់​ប្រជាពលរដ្ឋ​នៅ​តំបន់​នោះ​៕

Picture
Picture
Picture
Picture