ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា មានហេតុការណ៍ស្រុតដីរលំផ្ទះសង្កត់ពីលើមនុស្ស បណ្តាលឱ្យស្លា.ប់ម្នាក់ និងរបួសធ្ងន់-ស្រាលចំនួន៤នាក់ ខណៈពេលដែលក្រុមជាងកំពុងតែស្ទូចផ្ទះមួយខ្នង ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៨ព្រឹក ថ្ងៃទី១១ ខែឧសភា ឆ្នាំ២០២១ ស្ថិតនៅក្នុងភូមិជីយោគ ឃុំកំពង់ចិត្បូង ស្រុកស្ទោង ខេត្តកំពង់ធំ។
សេចក្តីរាយការណ៍បន្តថា ជនរងគ្រោះខាងលើមាន ៖ ១-ឈ្មោះ ហ៊ា សុហ៊ុន ភេទប្រុស អាយុ១៨ឆ្នាំ ទីលំនៅភូមិជីមាស ឃុំម្សាក្រង ស្រុកស្ទោង ជាកូនជាង (បានស្លា.ប់នៅនឹងកន្លែងកើតហេតុ) ទី២-ឈ្មោះ ពិន ខុម ភេទប្រុស អាយុ៥២ឆ្នាំ ទីលំនៅភូមិស៊ីវុត្ថា ឃុំប្រាសាទ ស្រុកសន្ទុក ជាមេការ (រងរបួសធ្ងន់) ទី៣-ឈ្មោះ ញឹក យ៉ាន់ ភេទប្រុស អាយុ៤៦ឆ្នាំ រស់នៅភូមិម្សាក្រងត្បូង ឃុំម្សាក្រង ស្រុកស្ទោង ជាកូនជាង (របួសធ្ងន់) ទី៤-ឈ្មោះ ឃឿន អិល ភេទប្រុស អាយុ២៩ឆ្នាំ ទីលំនៅភូមិសំបួរត្បូង ឃុំម្សាក្រង ស្រុកស្ទោង (របួសស្រាល) និងទី៥-ឈ្មោះ គី គន្ធា ភេទប្រុស អាយុ៣២ឆ្នាំ រស់នៅភូមិម្សាក្រងត្បូង ឃុំម្សាក្រង ស្រុកស្ទោង ជាកូនជាង (រងរបួសស្រាល) ។
បើតាមប្រភពព័ត៌មាននៅកន្លែងកើតហេតុបានឲ្យដឹងថា ដំបូងឡើយ បន្ទាប់ពីមានការពឹងពាក់ពីម្ចាស់ផ្ទះ ហើយក៏បានត្រូវរ៉ូវតម្លៃគ្នាជាមួយនឹងខាងជាងៗស៊ីឈ្នួលស្ទូចផ្ទះរួចមក ម្ចាស់ផ្ទះក៏បានរកវេលាល្អសម្រាប់ស្ទូចផ្ទះ ចំណែកឯក្រុមជាងវិញក៏បានរៀបចំជើងព្រួលទុករួចជាស្រេច ដោយរង់ចាំតែដល់ពេលវេលាកំណត់ និងចាប់ផ្តើមស្ទូចឡើងតែម្តង។
ប្រភពដដែលបន្តថា លុះដល់វេលាកំណត់នៅព្រឹកថ្ងៃកើតហេតុនោះ ខណៈពេលក្រុមជាងៗកំពុងតែដំណើរការស្ទូចផ្ទះឡើងបានតែបន្តិច ក៏ស្រាប់តែតួផ្ទះទាំងមូលរលំបាក់សង្កត់ពីលើក្រុមជាងតែម្តង បណ្តាលឱ្យមនុស្សស្លា.ប់ម្នាក់ និងរងរបួសធ្ងន់-ស្រាលចំនួន៤នាក់ទៀត ទើបបង្កឱ្យមានភ្ញាក់ផ្អើលឆោឡោ ។
ប្រភពដដែលប្រាប់ថា ចំពោះមូលហេតុ ដែលបណ្តាលឲ្យរលំផ្ទះសង្កត់ពីលើមនុស្សខាងលើនោះ គឺនៅពេលដែលក្រុមជាងកំពុងតែដំណើរការស្ទូចផ្ទះនោះ បានធ្វើឲ្យស្រុតដី រួចក៏កាច់ជំទល់រលំផ្ទះសង្កត់មកលើក្រុមជាងៗតែម្តង ។
ក្រោយពេលកើតហេតុ ជនរងគ្រោះដែលរងរបួសទាំង៤នាក់ ត្រូវបានយកទៅសង្គ្រោះនៅមន្ទីរពេទ្យបង្អែកស្ទោង ចំណែកជនរងគ្រោះដែលបានស្លា.ប់ ក៏ត្រូវបានប្រគល់ជូនសាច់ញាតិ ដើម្បីយកទៅចាត់ចែងធ្វើបុណ្យតាមប្រពៃណីផងដែរ។
ចែករំលែកព័តមាននេះ