រាជធានីភ្នំពេញ ៖ ស្ដ្រីខ្មែរម្នាក់ដែលជាប់គុកទួលស្លែងក្នុងសម័យខ្មែរក្រហម បានលួចសរសេរសំបុត្រលាក់ទុកសំដែងអំពីសេចក្ដីស្នេហា និងសេចក្ដីនឹករលឹកទៅប្ដីរបស់នាង ។ កាលពីជំនាន់នោះ ពួកប៉ុល ពត គេមិនឱ្យអ្នក ទោសនៅគុកទួលស្លែងមានរបស់អ្វីក្រៅតែ ពីខោនិងអាវមួយចង្កេះឆ្អេះជាប់នឹងខ្លួនទេ ហើយគេក៏មិនដឹងថា តើនាងបានអ្វីយកមក សរសេរនៅលើក្រដាសដែលមិនដឹងថា បានមកពីណាដែរ ។ គេមិនអាចដឹងថា តើនាងលាក់ទុកសំបុត្រ នោះបានយូរប៉ុនណាទេ តែក្រោយមកពួកខ្មែរក្រហមដែលប្រជាជនខ្មែរតែងហៅថា បិសាច អាវខ្មៅ នោះបានចាប់សំបុត្រនេះបាន ។ នាងជាអ្នកទោសក្នុងគុកធំ ហើយថែមទាំងលួច ប្រព្រឹត្ដខុសមាគ៌ាអង្គការភ្នែកម្នាស់ដែលហាម ប្រជាជនខ្មែរទាំងអស់មិនឱ្យមានសិទ្ធិសេរីភាព ខាងសាសនា ស្នេហា មនោសញ្ចេតនាបងប្អូន កូនចៅ សាច់ញាតិ ប្ដី-ប្រពន្ធនោះទៀត ដូច្នេះ បើទោះបីជាមិនប្រាប់ក៏គេដឹងដែរថា នាងពិត ជាមិនអាចរស់បានដល់ថ្ងៃ មករា ឆ្នាំ១៩៧៩ នោះទេ ។
សំបុត្រនេះត្រូវបានគេរកឃើញនៅក្នុង សាលតម្កល់ឯកសារមួយក្នុងបរិវេណអតីតគុកទួលស្លែងដោយអ្នកកាសែតស្រី ជនជាតិអាមេ រិកឈ្មោះ Elisabeth Beckea កាលពីទសវត្ស ឆ្នាំ៩០ ដែលតាមរយៈសំបុត្រនោះគេបានស្គាល់ ឈ្មោះម្ចាស់សំបុត្រថា បុប្ពាណា ហើយបុប្ពាណា និងប្ដីរបស់នាងក៏ជាកម្មាភិបាលខ្មែរក្រហមដូចគ្នាដែរ មិនមែនជាប្រជាពលរដ្ឋកម្ពុជាធម្មតានោះទេ ។ បន្ទាប់ពីបានរកឃើញអត្ថន័យនៅក្នុងសំបុត្រខ្មោចនោះហើយ Elisabeth Beckea ក៏បានយករឿងនេះទៅចុះផ្សាយនៅក្នុងសៀវភៅមួយក្នុងប្រទេសអង់គ្លេស ដែលសៀវភៅ នេះបាននិយាយអំពីជីវិតរបស់ប្រជាពលរដ្ឋ កម្ពុជាក្នុងសម័យខ្មែរក្រហម ធ្វើឱ្យអ្នកស្រី Sara O’Brien ជនជាតិអង់គ្លេសមានការចាប់ អារម្មណ៍ចំពោះភាពក្ដុកក្ដួល និងអាណិតខ្លោច ចិត្ដចំពោះវាសនាអាយុជីវិតរបស់ពលរដ្ឋខ្មែរនាសម័យខ្មែរក្រហម ។ ដោយសារឥទ្ធិពលនេះ អ្នកស្រី Sara O’Brien បានចំណាយពេល១០ ឆ្នាំដើម្បីរៀបចំបង្កើតជាគ្រោងឆ្អឹងសំរាប់ សរសេររឿងល្ខោនអូប៉េរាមួយ និងចំណាយពេលមួយឆ្នាំគត់នៅក្នុងការសរសេរដល់ទីបញ្ចប់ ។
បច្ចុប្បន្នដើម្បីផ្សព្វផ្សាយល្ខោនអូប៉េរ៉ា ដែលនិយាយអំពីជីវិតសម័យខ្មែរក្រហមនៅក្នុងប្រទេសកម្ពុជាវិញ អ្នកនិពន្ធ Sara O’Brien បានសំរេចយករឿងនេះមកសំដែងរួមគ្នាបីជាតិ សាសន៍ គឺកម្ពុជា បារាំងនិងអាមេរិក ។ ដោយ មើលឃើញភាពអច្ឆរិយៈរបស់កុមារី បុស្បា ប៉ាន់ ដែលមានសម្លេងសូប្រាណូ អ្នកចំរៀងកំរិត អន្ដរជាតិនៅក្នុងប្រទេសកម្ពុជានោះ អ្នកនិពន្ធ រូបនេះបានសំរេចចិត្ដជ្រើសរើសយករូបនាង សំរាប់សំដែងធ្វើជាកុមារីម្នាក់ដែលជាប់គុកទួលស្លែង គឺសំដែងតាមឈុតមួយក្នុងរឿងល្ខោនអូប៉េរ៉ា របស់អ្នកស្រី ។ ការសំដែងនោះ ធ្វើឡើងនាសាលសន្និសីទចតុមុខនៅថ្ងៃទី៨ សីហា វេលាម៉ោង៧និង៣០នាទីយប់ ដោយសំបុត្រមួយលក់ក្នុងតំលៃ១០.០០០រៀល ។
លោកម៉េង ហ៊ាង ឪពុករបស់កុមារី បុស្បា ប៉ាន់ បាននិយាយថា ការដែលគេហៅ បុស្បា ប៉ាន់ថា កុមារីអច្ឆរិយៈនោះគឺនៅត្រង់ថា នាងជាកុមារីកម្ពុជាតែម្នាក់គត់ដែលរៀនចេះជំនាញបានច្រើន ខុសប្លែកពីកុមារីដទៃដែលមិនអាច ធ្វើដូច គឺនាងចេះច្រៀងបានពីរោះហើយមានសម្លេងសូប្រាណូទៀត គឺជាសម្លេងមួយដែល ខ្ពស់កំរិតអន្ដរជាតិ ។ នាងចេះលេងព្យ៉ាណូ ហ្គីតា វីយ៉ូឡុង កីឡាហែលទឹក កីឡាយូដូ ទទួលបានពានមាស ។ នាងមានសុខភាពល្អ កំលាំងកាយមាំមួន រៀនពូកែ និងមានលក្ខណៈ ជានារីតស៊ូ ហើយដោយសារតែចំណុចតស៊ូនេះ ហើយទើបនាងទទួលបានជំនាញជាច្រើននោះ ៕
ចែករំលែកព័តមាននេះ