រាជធានីភ្នំពេញ ៖ កាលពីវគ្គមុន យើងបានដកស្រង់ការចែករំលែករបស់អ្នកជំនាញម្នាក់ អំពីប្រភេទការងារដែលអាចរកប្រាក់ចំណូលបន្ថែមក្នុងសម័យកូវីដ ១៩ ។ ប្រភពចំណូលបន្ថែមត្រូវបានបែងចែកជា ២ ប្រភេទ គឺប្រភេទចំណូលសកម្ម និងចំណូលអកម្ម ។ ក្នុងវគ្គមុន យើងបានលើកយកប្រភេទចំណូលសកម្ម មកបកស្រាយរួចមកហើយ ដូចនេះខាងក្រោមនេះជាវគ្គបន្ទាប់ដែលនិយាយពី ប្រភពចំណូលអកម្ម ។
នៅក្នុងការស្វែងរកចំណូលបន្ថែម លោកគ្រូ ស៊ាន ធនិន អគ្គនាយកក្រុមហ៊ុន CEO Master Club Investment បានបកស្រាយថា ៖ «ប្រភពចំណូលអកម្ម គឺជាប្រភពចំណូល ដែលយើងមិនបានចេញពលកម្មអ្វីច្រើនទេ ប៉ុន្តែទទួលបានចំណូលមកវិញ ។ បងប្អូនធ្លាប់ឭពាក្យថា គ្រាន់តែដេកក៏មានចំណូលចូលដែរ» ។ តោះ ចង់ដឹងថា លោកគ្រូ ស៊ាន ធនិន បាននិយាយអ្វីខ្លះទៅនឹងប្រភពចំណូលអកម្ ម? ខាងក្រោមនេះជាចម្លើយ ៖
ទី ១. ប្រភេទអចលនទ្រព្យផ្សេងៗ ដែលយើងមាន ៖ ប្រសិនជាបងប្អូនមាន ផ្ទះ បន្ទប់ ដី អគារនានា នោះអ្នកអាចដាក់វិនិយោគដោយការជួល កុំឱ្យវានៅទំនេរចោល យើងត្រូវរកអ្នកដែលត្រូវការ ។ ហើយយើងត្រូវមើលប្រសិនជាមានអ្នកត្រូវការឃ្លាំងដើម្បីជួល ប៉ុន្តែអ្នកមានតែដី ដូចនេះអ្នកត្រូវតែច្នៃដីនោះ ដោយធ្វើឃ្លាំងសម្រាប់គេជួល ប៉ុន្តែអ្នកក៏ត្រូវមានតិចនិកក្នុងការប្រកូប្រកាសរកអ្នកជួលផងដែរ ។ ហើយសម្រាប់អ្នកដែលមានចលនទ្រព្យវិញ ដូចជាឡាន ម៉ូតូ រឺម៉ក អ្នកទាំងអស់នេះក៏អាចជួលឱ្យគេបានដែរ អ្នកខ្លះមានឡានជួលឱ្យជនបរបទេសជាដើម អ្នកខ្លះមានម៉ូតូ ដូចសម័យនេះគេអាចជួលម៉ូតូទៅដឹកជញ្ជូនអីវ៉ាន់ ឬម្ហូបអាហារតាមរយៈគេកម្ម៉ង់តាមអនឡាញ ។ល។
ទី ២. រៀនវិនិយោ គ៖ ប្រសិនជាយើងនៅសល់លុយខ្លះ គឺយើងរៀនវិនិយោគជាមួយមិត្តភក្តិ រឺអ្នកជំនាញផ្នែកវិនិយោគ (ដែលអ្នកអាចជឿជាក់បាន និងមានភាពច្បាស់លាស់ ប្រាកដប្រជា) ដើម្បីភាគលាភ ឬផលចំណេញ ។ មានពេលខ្លះអ្នកវិនិយោគ ឬក្រុមហ៊ុនវិនិយោគមួយចំនួន គេមានគំនិតវិនិយោគច្រើន ប៉ុន្តែពេលខ្លះពួកគេក៏ត្រូវការទុនវិនិយោគពីអ្នកដែលនៅសល់លុយដែរ ដូចនេះប្រសិនជាអ្នកមានលុយ ហើយមិនដឹងយកទៅប្រើណា និងមិនទាន់មានគំនិតរកស៊ី អុីចឹងអ្នកអាចទៅរកមិត្តភក្តិ ឬក្រុមហ៊ុនវិនិយោគ ។ បងប្អូនត្រូវដឹងថា ការវិនិយោគត្រូវមានការច្បាស់លាស់ ប្រសិនជាបងប្អូនវិនិយោគមិនស្រួលអាចយកអង្ករចាក់អង្កាម ខាតបង់ហើយត្រូវគេបោកទៀត ។ ប្រសិនជាធ្វើជាមួយអ្នកណាក៏ដោយ ក៏ត្រូវមានកិច្ចសន្យា ឬក្រដាសស្នាមច្បាស់លាស់ដែរ បើទោះបីគេជាមិត្តភក្តិជិតស្និតយ៉ាងណានោះ ។
ទី ៣. ដាក់សន្សំនៅធនាគារ រឺមីក្រូហិរញ្ញវត្ថុ ៖ ប្រសិនជាបងប្អូនមានប្រាក់ច្រើនមិនហ៊ានវិនិយោគ ឬខ្លាចចាញ់បោកគេ អុីចឹងអ្នកអាចដាក់ប្រាក់របស់អ្នកក្នុងធនាគារ រឺមីក្រូហិរញ្ញវត្ថុ (សន្សំមានកាលកំណត់ ហើយបើកការប្រាក់ប្រចាំខែ ឬចុងគ្រា) ប៉ុន្តែសូមបញ្ជាក់បន្តិចដាក់ប្រាក់ក្នុងសម័យនេះ (កូវីដ ១៩) ការប្រាក់រៀងធ្លាក់បន្តិចហើយ ហើយវាអាស្រ័យទៅតាមធនាគារឬ រឺមីក្រូហិរញ្ញវត្ថុដែរ ។ ប៉ុន្តែវានៅតែជាជម្រើសល្អនឹង មានប្រភេទគណនេយ្យខ្លះអាចឱ្យការប្រាក់អ្នកប្រចាំខែ ឬប្រចាំឆ្នាំ (សន្សំមានកាលកំណត់ ហើយបើកការប្រាក់ប្រចាំខែ ឬចុងគ្រា) ។
ទី ៤. ចងការប្រាក់ (មានទ្រព្យធានា និងលិខិតស្នាមច្បាស់លាស់) ៖ ប្រសិនជាបងប្អូនមិនសូវខ្លាចហានិភ័យ និងចង់បានចំណូលមកវិញច្រើន បងប្អូនអាចយកប្រាក់ទៅចងការបាន ។ ប៉ុន្តែអ្នកត្រូវតែមានភាពច្បាស់លាស់ អ្នកចង់មកចងការយើងមានអ្វីដើម្បីបញ្ចាំ ឬអត់ ហើយរបស់បញ្ចាំនឹងត្រូវស៊ើបមើលផង ស្របច្បាប់ ឬអត់ ។ ដូចនេះបើប្រៀបធៀបជាមួយការដាក់ចងការ និងដាក់ប្រាក់ជាមួយធនាគារ លុយនៅក្នុងធនាគារទទួលបានការប្រាក់ទាប ប៉ុន្តែហានិភ័យក៏ទាបដែរ ដល់ចងការប្រាក់មានហានិភ័យខ្ពស់ ប៉ុន្តែបើធ្វើត្រូវការប្រាក់ទទួលបានខ្ពស់ ។ ចំណុចនេះសូមបងប្អូនគិតពិចារណាដោយខ្លួនឯង ៕
ចែករំលែកព័តមាននេះ