ខេត្តកំពង់ចាម៖ ក្រោមការយកចិត្តទុកដាក់ពីសំណាក់អាជ្ញាធរខេត្ត ក៏ដូចជាជំនាញសុខាភិបាលបានបង្កើតមជ្ឈមណ្ឌលចត្តាឡីស័កនៅស្រុកចំនួន៣ ក្នុងនោះរួមមានចំការលើ ព្រៃឈរ និងបាធាយ ដើម្បីត្រៀមដាក់ពលករត្រឡប់មកពីប្រទេសថៃ ព្រោះឱកាសបុណ្យចូលឆ្នាំប្រពៃណីជាតិខ្មែរ កាន់តែខិតជិតមកដល់ ដូច្នេះ…
ខេត្តកំពង់ចាម៖ ក្រោមការយកចិត្តទុកដាក់ពីសំណាក់អាជ្ញាធរខេត្ត ក៏ដូចជាជំនាញសុខាភិបាលបានបង្កើតមជ្ឈមណ្ឌលចត្តាឡីស័កនៅស្រុកចំនួន៣ ក្នុងនោះរួមមានចំការលើ ព្រៃឈរ និងបាធាយ ដើម្បីត្រៀមដាក់ពលករត្រឡប់មកពីប្រទេសថៃ ព្រោះឱកាសបុណ្យចូលឆ្នាំប្រពៃណីជាតិខ្មែរ កាន់តែខិតជិតមកដល់ ដូច្នេះ ពលករចូលខ្ទង់ពាន់នាក់នឹងត្រូវមកលេងស្រុកកំណើត ដើម្បីចៀសវាងកុំឱ្យជំងឺកូវីដ-១៩ ឆ្លងចូលក្នុងសហគមន៍ ចាំបាច់ត្រូវតែធ្វើចត្តាទ្បីស័ក១៤ថ្ងែជាមុនសិន ទើបមានសុវត្ថិភាព។
លោកហាន កុសល អភិបាលរងខេត្តបានគូសបញ្ជាក់ថា ឯកឧត្តមអ៊ុន ចាន់ដា អភិបាលខេត្តនិងជាប្រធានគណៈកម្មការប្រយុទ្ធប្រឆាំងនឹងជម្ងឺ covid ព្រឹកថ្ងៃទី១៥ មីនា ២០២១ អមដំណើរដោយមានរូបលោក និងប្រធានមន្ទីរសុខាភិបាលខេត្តព្រមទាំងសហការីបានចុះមកកាន់ស្រុកចំការលើ ដោយបានណែនាំលោកអភិបាលស្រុក ត្រូវបង្កើនការយកចិត្តទុកដាក់បន្ថែមទៀត ដោយបង្កើតមជ្ឈមណ្ឌលចត្តាទ្បីស័កចំនួន៣កន្លែង ក្នុងនោះមានបរិក្ខារប្រើប្រាស់រួមទាំងបន្ទប់ទឹក អគ្គិសនីប្រើប្រាស់ដោយមិនឲ្យខ្វះ។ ដើម្បីត្រៀមដាក់ពលករមកពីប្រទេសថៃ ព្រោះឱកាសបុណ្យចូលឆ្នាំប្រពៃណីជាតិខ្មែរកាន់តែខិតជិតមក
ដល់។
លោកហាន កុសល អភិបាលរងខេត្តមានប្រសាសន៍បន្តថា ជាមួយនោះមានកម្មករធ្វើផ្លូវចំនួន២នាក់ បានលួចធ្វើដំណើរចេញពីខេត្តព្រះសីហនុ លុះមកដល់ស្រុកចំការលើនាពេលថ្មីៗ ត្រូវបានកម្លាំងសមត្ថកិច្ចស្រាវជ្រាវរកឃើញ និងបានរាយការណ៍មកជំនាញសុខាភិបាលខេត្ត ដោយបានយកកម្មករទាំងពីរនាក់នោះធ្វើចត្តាទ្បីស័កនៅសណ្ឋាគារមេគង្គ ព្រមទាំងស្រាវជ្រាវរកអ្នកពាក់ព័ន្ធមួយចំនួនទៀតផងដែរ ។
បេសកកម្មបានបន្តមកស្រុកព្រៃឈរនៅជាប់នឹងដងផ្លូវជាតិលេខ៧ ដោយឯកឧត្តមអភិបាលខេត្ត បានក្រើនរំលឹកឲ្យអភិបាលស្រុកព្រៃឈរ ត្រូវយកចិត្តទុកដាក់បន្ថែមទៀត ក្នុងនោះបង្កើតមជ្ឈមណ្ឌលចត្តាឡីស័ក នៅសាលាពុទ្ធិកបឋមសិក្សាក្នុងស្រុកព្រៃឈរមួយកន្លែង រួមនឹងបានចុះពិនិត្យទីតាំងបញ្ចុះសពសម្រាប់បងប្អូនខ្មែរឥស្លាម ប្រសិនបើមានករណីស្លាប់ដោយជម្ងឺកូវីដ នឹងត្រូវយកទៅបញ្ចុះនៅទីនោះ ដោយអនុវត្តវិធានការតាមជំនាញសុខាភិបាល និងបានបន្តការងារមកគោលដៅទី៣ នៅវិទ្យាស្ថានជាតិបាធាយ ជាប់នឹងសាលាស្រុកបាធាយ ដែលនឹងត្រូវបង្កើតមជ្ឈមណ្ឌលចត្តាឡីស័ក ត្រៀមដាក់ពលករមកពីប្រទេសថៃ ។ ចាប់ពីពេលនេះទៅ រដ្ឋបាលខេត្តកំពង់ចាមគឺត្រូវអនុវត្តវិធានការតឹងរឹងតាមច្បាប់ដើម្បីប្រយុទ្ធប្រឆាំងនឹងជម្ងឺ covid អោយមានប្រសិទ្ធភាព ក្នុងករណីបើសិនមានបុគ្គលណាម្នាក់ពេលកំពុងធ្វើចត្តាឡីស័កនៅកន្លែងណាមួយក្នុងខេត្តកំពង់ចាម ហើយបុគ្គលនោះបានរត់ចេញគឺត្រូវប្រឈមនឹងច្បាប់ដោយផាកពិន័យនិងជាប់ទោសទណ្ឌបន្ថែមទៀត។
លោកហាន កុសល អភិបាលរងខេត្តបញ្ជាក់ថា ចំពោះសិស្សរៀននៅសាលាបឋមសិក្សានានាក្នុងខេត្តកំពង់ចាម មិនទាន់ត្រូវបានបិទទ្វារនោះទេ នេះដោយសារតែការខិតខំប្រឹងប្រែងរបស់តន្ត្រីអប់រំព្រមទាំងគ្រូបង្រៀនដោយបានអនុវត្តនៅវិធានការ៣កុំនិង៣ការពារ ។ ទោះជាបែបនេះក្តីអាជ្ញាធរខេត្ត គឺនៅតែបង្កើនការប្រុងប្រយ័ត្ន គឺខិតខំប្រឹងប្រែងទាំងយប់ទាំងថ្ងៃប្រយុទ្ធប្រឆាំងនឹងជំងឺកូវីដធ្វើយ៉ាងណាកុំឱ្យជំងឺនេះឆ្លងចូលក្នុងសហគមន៍៕
ចែករំលែកព័តមាននេះ