រាជធានីភ្នំពេញ ៖ តារាចម្រៀង និងតារាសម្តែងដែលចាប់អារម្មណ៍ជាមួយបច្ចេកវិទ្យាលោកឆន សុវណ្ណារាជ និងកញ្ញា មាន សុនីតា បានចុះជួបលើកទឹកចិត្តដល់និស្សិតដែលកំពុងចូលរួមក្នុងវគ្គបណ្តុះបណ្តាលវិជ្ជាជីវៈ
រាជធានីភ្នំពេញ ៖ តារាចម្រៀង និងតារាសម្តែងដែលចាប់អារម្មណ៍ជាមួយបច្ចេកវិទ្យាលោកឆន សុវណ្ណារាជ និងកញ្ញា មាន សុនីតា បានចុះជួបលើកទឹកចិត្តដល់និស្សិតដែលកំពុងចូលរួមក្នុងវគ្គបណ្តុះបណ្តាលវិជ្ជាជីវៈផ្នែកផលិតផលអេឡិចត្រូនិច (Samsung Tech Institute) ចំនួន62នាក់ ដែលរៀបចំដោយក្រុមហ៊ុនសាមសុងថៃ អេឡិចត្រូនិចប្រចាំនៅកម្ពុជា នៅវិទ្យាស្ថានពហុបច្ចេកទេសនៃកម្ពុជា (NPIC) កាលពីថ្ងៃទី០២ កញ្ញា ដើម្បីជួយលើកទឹកចិត្តដល់និស្សិតដែលចូលរួមឲ្យខិតខំយកចិត្តទុកដាក់លើការសិក្សាបន្ថែមទៀត។
លោកឆន សុវណ្ណារាជ បានថ្លែងលើកទឹកចិត្តដល់និស្សិតទាំងអស់ថា «ខ្ញុំយល់ថា នេះជាកម្មវិធីសិក្សាដ៏ពិសេសមួយដែលមានសាស្ត្រាចារ្យដ៏ឆ្នើមជាមួយនឹងការបំពាក់ផលិតផលសាមសុងទំនើបៗសម្រាប់ការអនុវត្តជាក់ស្តែង ដូច្នេះសូមប្អូនៗទាំងអស់ខិតខំរៀនសូត្រ និងក្រេបជញ្ជក់ចំណេះដឹងពីវគ្គបណ្តុះបណ្តាលវិជ្ជាជីវៈនេះឲ្យបានច្រើនតាមលទ្ធភាពដែលអាចធ្វើបាន។ បើចេះជំនាញពិតប្រាកដអ្នកទាំងអស់គ្នាពិតជាងាយស្រួលក្នុងការស្វែងរកការងារធ្វើជាមិនខាន ដ្បិតទីផ្សារនៃផលិតផលអេឡិចត្រូនិចរបស់ក្រុមហ៊ុនសាមសុងនាពេលបច្ចុប្បន្នមិនថា តែទូរស័ព្ទដៃ ទូរទឹកកក ទូរទស្សន៍ និងផលិតផលផ្ទះបាយផ្សេងៗសុទ្ធតែកំពុងពេញនិយមប្រើប្រាស់ទាំងនៅក្នុងប្រទេសកម្ពុជា និងនៅជុំវិញពិភពលោក»។
តារាល្បីកញ្ញា មាន សុនីតា និងលោកឆន សុវណ្ណារាជ ក៏បានផ្តល់ឲ្យសម្ភារសិក្សាមួយចំនួនដល់និស្សិតទាំងនោះរួមមាន សៀវភៅ ប៊ិក ខ្មៅដៃ បន្ទាត់ ក្រដាសកត់ត្រា និងរបស់របរផ្សេងៗទៀតសម្រាប់ប្រើប្រាស់ក្នុងការសិក្សារៀនសូត្រប្រចាំថ្ងៃ ។
វគ្គបណ្តុះបណ្តាលផ្នែកផលិតផលអេឡិចត្រូនិចនេះ មានរយៈពេល4ខែដែលបានចាប់ផ្តើមតាំងពីថ្ងៃទី24 មិថុនា នឹងត្រូវបញ្ចប់នៅថ្ងៃទី24 តុលា 2015 នេះ។ និស្សិតដែលចូលរួមទាំងអស់បានទទួលការបណ្តុះបណ្តាលទៅលើការដំឡើងការជួសជុល និងដំណោះស្រាយបញ្ហាផ្សេងៗទៅលើផលិតផលបច្ចេកវិទ្យាមានដូចជា ទូរទស្សន៍ ម៉ាស៊ីនត្រជាក់ ទូរទឹកកក ម៉ាស៊ីនបោកគក់ និងទូរស័ព្ទដៃជាដើម។ និស្សិតឆ្នើមចំនួន6នាក់ នឹងត្រូវបានជ្រើសរើសចុះកម្មសិក្សានៅមជ្ឈមណ្ឌលផ្នែកសេវាកម្មរបស់ក្រុមហ៊ុនសាមសុង ដែលពួកគាត់ទាំងអស់អាចមានឱកាសក្លាយជាបុគ្គលិកពេញសិទ្ធិនៅការិយាល័យអេឡិចត្រូនិចរបស់សាមសុង។
លោកប៊ុន ភារិន្ទ នាយកនៃវិទ្យាស្ថានពហុបច្ចេកទេសបានមានប្រសាសន៍ថា «ខ្ញុំសូមអរគុណដល់កញ្ញា មាន សុនីតា និងលោកឆន សុវណ្ណារាជ ដែលបានចំណាយពេលដ៏មានតម្លៃមកលើកទឹកចិត្ត ក៏ដូចជាផ្តល់ជាសម្ភារសិក្សាដល់និស្សិតដែលកំពុងតែខ្វះខាត។ នេះពិតជាទង្វើដ៏គួរឲ្យកោតសរសើរមួយ»។
លោកសាស្ត្រាចារ្យ ស្រី ភារុណ ដែលកំពុងបង្រៀនបច្ចេកទេសគ្រឿងអេឡិចត្រូនិចដល់និស្សិតទាំងនេះបានមានប្រសាសន៍ថា «វគ្គសិក្សាគ្រឿងអេឡិចត្រូនិច និងទូរស័ព្ទរបស់សាមសុងនេះអាចជួយឲ្យនិស្សិតរៀន និងអនុវត្តជាក់ស្តែងជាមួយនឹងផលិតផលទំនើបដែលកំពុងទទួលការពេញនិយមពីសំណាក់អ្នកប្រើប្រាស់»។
និស្សិត ហួត ជំនិត ដែលកំពុងរៀនឆ្នាំទី4 នៃ NPIC បានបញេ្ចញចំណាប់អារម្មណ៍ថា «ខ្ញុំបានរៀននូវចំណេះដឹងជាច្រើនទាក់ទង និងការដំឡើង និងការជួសជុលសម្ភារទំនើបដែលខ្ញុំអាចយកចំណេះដឹងទាំងនេះទៅប្រើបាននៅពេលដែលខ្ញុំបញ្ចប់ការសិក្សា»។
លោកឆែ សុខឡេង ប្រធានផ្នែកផ្សព្វផ្សាយរបស់ក្រុមហ៊ុនសាមសុង អេឡិចត្រូនិច ប្រចាំនៅកម្ពុជា បានមានប្រសាសន៍ថា «ក្រុមហ៊ុនសាមសុង នៅតែបន្តគាំទ្រដល់និស្សិតកម្ពុជាក្នុងការស្វែងយល់អំពីបច្ចេកវិទ្យាថ្មីតាមរយៈវគ្គបណ្តុះបណ្តាល និងការចុះកម្មសិក្សាផ្សេងៗ ដើម្បីជាប្រយោជន៍ប្រជាជនទាំងអស់គ្នា»៕
ចែករំលែកព័តមាននេះ