រាជធានីភ្នំពេញ ៖ ស្ថានទូតឥណ្ឌា ប្រចាំនៅព្រះរាជាណាចក្រកម្ពុជា បានប្រកាសអោយដឹងនាល្ងាចថ្ងៃទី០៥ ខែកុម្ភៈ ឆ្នាំ២០២១នេះថា ប្រទេសឥណ្ឌា បានសម្រេចផ្តល់ការផ្តល់ វ៉ាក់សាំងបង្ការជំងឺកូវីដ-១៩…
រាជធានីភ្នំពេញ ៖ ស្ថានទូតឥណ្ឌា ប្រចាំនៅព្រះរាជាណាចក្រកម្ពុជា បានប្រកាសអោយដឹងនាល្ងាចថ្ងៃទី០៥ ខែកុម្ភៈ ឆ្នាំ២០២១នេះថា ប្រទេសឥណ្ឌា បានសម្រេចផ្តល់ការផ្តល់ វ៉ាក់សាំងបង្ការជំងឺកូវីដ-១៩ ចំនួន១សែនដូស ដល់ប្រទេសកម្ពុជា ដើម្បីចាក់ជូនប្រជាពលរដ្ឋខ្មែរដោយឥតគិតថ្លៃ ។
សេចក្តីប្រកាសរបស់ស្ថានទូតឥណ្ឌា បានបញ្ជាក់យ៉ាងដូចថា ស្ថានទូតឥណ្ឌាភ្នំពេញ មានសេចក្តីសោមនស្សរីករាយ សូមជូនដំណឹងថា រដ្ឋាភិបាលឥណ្ឌាបានសម្រេច ផ្តល់ការផ្គត់ផ្គងវ៉ាក់សាំងប្រឆាំងជំងឺកូវីដ១៩ ចំនួនមួយសែនដុស (១០០,០០០) ដល់ព្រះរាជាណាចក្រកម្ពុជាក្នុងស្ថានភាពបន្ទាន់ ។
ការផ្តល់ការផ្គត់ផ្គងនេះ គឺជាការឆ្លើយតបចំពោះសំណើរបស់នាយករដ្ឋមន្ត្រី សម្តេច ហ៊ុន សែន ទៅកាន់លោកនាយករដ្ឋមន្ត្រី ណារិន្ត្រា ម៉ូឌី សម្រាប់ផ្តល់ជាជំនួយវ៉ាក់សាំងប្រឆាំងជំងឺកូវីដ១៩ ។
ការផ្គត់ផ្គង់ត្រូវបានធ្វើឡើង តាមរយៈវិទ្យាស្ថានសេរ៉ូមនៃប្រទេសឥណ្ឌា ទោះបីជាមានការប្រកួតប្រជែងនិងសំណើជាច្រើនពីប្រទេសដៃគូ និង ការប្តេជ្ញាចិត្តរបស់ឥណ្ឌា ចំពោះប្រជាជនខ្លួនក្នុងស្រុកក៏ដោយ ។
ការសម្រេចចិត្តនេះ គឺជាសក្ខីភាពបញ្ជាក់ពីទឹកចិត្ត របស់ឥណ្ឌាចំពោះប្រទេសកម្ពុជាដែលជាដៃគូសំខាន់ និង ជាការយកចិត្តទុកដាក់ចំពោះ សុខភាពនិងសុវត្ថិភាពសម្រាប់ប្រជាជនកម្ពុជា ។
សូមរម្លឹកថា ប្រមុខរដ្ឋាភិបាលកម្ពុជា បានស្នើសុំជំនួយវ៉ាក់សាំងប្រឆាំងវីរុសកូវីដ១៩ ពីប្រទេសឥណ្ឌា ដោយសារឥណ្ឌាក៏ជាប្រទេសមួយដែលផលិតវ៉ាក់សាំងប្រឆាំងជំងឺនេះដែរ ។
ការស្នើនេះ បានធ្វើឡើងនៅក្នុងជំនួបរវាងលោកនាយករដ្ឋមន្ត្រី ហ៊ុន សែន ជាមួយលោកស្រី Devyani Uttamkhobragade ឯកអគ្គរដ្ឋទូតថ្មីនៃសាធារណរដ្ឋឥណ្ឌាប្រចាំកម្ពុជា នៅវិមានសន្តិភាព រាជធានីភ្នំពេញ នៅព្រឹកថ្ងៃទី១៨ ខែមករា ឆ្នាំ២០២១ ៕
ចែករំលែកព័តមាននេះ