ខេត្តព្រៃវែង ៖ ជនសង្ស័យជាក្រុមចោរប្លន់ម្នាក់ ក្នុងចំណោមបក្សពួក៦នាក់ ត្រូវបានកំលាំងនគរបាលខេត្តនិងស្រុកស្ទាក់ចាប់បាន ក្រោយពេលដែលពួកគេបានធ្វើសកម្មភាពប្លន់យកម៉ូតូ១គ្រឿងពីបុរសម្នាក់បានសម្រេច តែរត់មិនរួច ព្រោះត្រូវជនរងគ្រោះស្គាល់មុខ ។
ហេតុការណ៌ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី២៦ ធ្នូ នៅលើកំណាត់ផ្លូវជាតិលេខ៣១៧ ត្រង់ចំណុចភូមិស្ដៅ ឃុំធាយ ស្រុកបាភ្នំ ខេត្តព្រៃវែង ។
ក្រុមចោរមានគ្នាចំនួន៦នាក់ ជិះម៉ូតូ៣គ្រឿង ចំណែកម៉ូតូមួយគ្រឿងដែលក្រុមចោរប្លន់យកទៅបាត ម៉ាកហុងដា ធុនសេ១២៥ ស៊េរីឆ្នាំ២០១៩ ពាក់ស្លាកលេខ កណ្តាល 1AB-3602 ជាកម្មសិទ្ធិរបស់ជនរងគ្រោះឈ្មោះ សួង រ៉េត ភេទប្រុស អាយុ៥៦ឆ្នាំ មានទីលំនៅក្នុងភូមិខ្វិត ឃុំធាយ ស្រុកបាភ្នំ ខេត្តព្រៃវែង។
យោងតាមប្រភពពត៌មានពីជនរងគ្រោះបានអោយដឹងថា នៅមុនពេលកើតហេតុ រូបគាត់កំពុងតែជិះម៉ូតូដឹកប្រពន្ធឈ្មោះ អ៊ុត យ៉ន អាយុ៥២ឆ្នាំ ដែលមានរបួសដៃឆ្វេងស្រាប់ ធ្វើដំណើរតាមផ្លូវត្រឡប់ទៅផ្ទះវិញ លុះពេលមកដល់ចំណុចកើតហេតុ ស្រាប់តែមានម៉ូតូ៣គ្រឿង ក្នុងនោះមួយគ្រឿងម៉ាកហុងដា ស៊េរីឆ្នាំ2018 ពណ៌ខ្មៅ, មួយគ្រឿងម៉ាកគុបជ្រុង និងមួយគ្រឿងទៀតមិនស្គាល់ម៉ាកនោះទេ មានគ្នា៦នាក់ បានជិះមកអែបម៉ូតូគាត់ ហើយបានធាក់ម៉ូតូគាត់អោយដួល រួចក៏ប្លន់យកម៉ូតូគាត់ជិះរត់គេចខ្លួនទៅទិសខាងលិចអស់ទៅ ហើយនៅលើម៉ូតូនោះ ក៏ជាប់ដោយទាំងកាបូបស្ពាយមួយ ដែលមានប្រាក់ក្នុងនោះចំនួន៥០០ដុល្លារផងដែរ។
តាមប្រភពដដែលនេះបានបន្តទៀតថា ក្រោយពេលដែលក្រុមចោរគេចខ្លួនទៅអស់ រូបគាត់និងប្រពន្ធ ក៏នាំគ្នារត់ទៅប្តឹងសមត្ថកិច្ចប៉ូស្តិ៍រដ្ឋបាលឃុំធាយ អោយជួយអន្តរាគមន៍ភ្លាមៗ ដោយក្នុងចំណោមក្រុមចោរទាំងនោះ ពួកគាត់បានស្គាល់ច្បាស់ម្នាក់គឺឈ្មោះ ជុំ ចន្នី ភេទប្រុស អាយុ២៨ឆ្នាំ ដែលជាអ្នកនៅក្នុងភូមិជាមួយគ្នា។
ចំណែកខាងសមត្ថកិច្ចស្រុកបាភ្នំបានអោយដឹងដែរថា ក្រោយពីទទួលបានពាក្យបណ្តឹងពីជនរងគ្រោះខាងលើនេះភ្លាម លោកអធិការស្រុកបាភ្នំ បានដឹកនាំកំលាំងចុះស្ទាក់គ្រប់ច្រក និងតាមស្រាវជ្រាវរកមុខសញ្ញាក្រុមចោរ រហូតធ្វើការចាប់ឃាត់ខ្លួនក្រុមចោរបានម្នាក់ឈ្មោះ ជុំ ចន្នី នៅវេលាម៉ោង៧ព្រឹកថ្ងៃបន្ទាប់ គឺថ្ងៃទី២៧ ធ្នូ និងដកហូតបានវត្ថុតាងម៉ូតូគុបជ្រុងមួយគ្រឿង ដែលគេជិះធ្វើសកម្មភាពប្លន់ជនរងគ្រោះកាលពីយប់ ។ ដោយឡែកបក្ខពួកក្រុមចោរចំនួន៥នាក់ទៀត សមត្ថកិច្ចបានស្គាល់អត្តសញ្ញាណអស់ហើយ និងពេលនេះកំពុងស្វែងរកចាប់ខ្លួន ដើម្បីយកមកផ្តន្ទាទោសទៅតាមច្បាប់។
គួរបញ្ជាក់ផងដែរថា ជនសង្ស័យ ជុំ ចន្នី ត្រូវបានសមត្ថកិច្ចបញ្ជូនខ្លួនទៅកាន់ស្នងការដ្ឋាននគរបាលខេត្តព្រៃវែង នៅរសៀលថ្ងៃទី២៨ធ្នូ ហើយត្រូវបានកសាងសំណុំរឿងបញ្ជូនបន្តទៅសាលាដំបូងខេត្តព្រៃវែង នៅព្រឹកថ្ងៃទី២៩ធ្នូនេះ៕ (កែសម្រួលដោយ ៖ ធីតា)
ចែករំលែកព័តមាននេះ