ព្រះសីហនុ៖ ផ្ទះអ្នកលក់សាំង ជាប់យានដ្ឋានជួសជុលរថយន្ត បានឆាបឆេះ ពេលបូមដាក់ដប កាលពីរសៀលថ្ងៃទី៥ ខែធ្នូ។ ផ្ទះឆេះនេះ មានទីតាំងស្ថិតនៅជិតរង្វង់មូលវិថីសម្តេចសង្ឃទេពវង្ស ក្នុងក្រុម១…
ព្រះសីហនុ៖ ផ្ទះអ្នកលក់សាំង ជាប់យានដ្ឋានជួសជុលរថយន្ត បានឆាបឆេះ ពេលបូមដាក់ដប កាលពីរសៀលថ្ងៃទី៥ ខែធ្នូ។ ផ្ទះឆេះនេះ មានទីតាំងស្ថិតនៅជិតរង្វង់មូលវិថីសម្តេចសង្ឃទេពវង្ស ក្នុងក្រុម១ ភូមិ២ ឃុំអូរត្រេះ ស្រុកស្ទឹងហាវ ខេត្តព្រះសីហនុ។
របាយការណ៍របស់អាជ្ញាធរសមត្ថកិច្ចមូលដ្ឋាន បានឲ្យដឹងថា ករណីអគ្គិភ័យនេះ បណ្តាលមកពីឆ្លងចរន្តអគ្គិសនីចេញពីក្បាលអាគុយ នៅក្នុងយានដ្ឋានជួសជុលរថយន្ត ខណៈអាជីវករលក់សាំងក្បែរនោះ កំពុងតែបង្ហូរសាំងដាក់ដប ក៏បង្កឲ្យឆាបឆេះផ្ទះអស់ចំនួន ៥ខ្នង។ ផ្ទះលក់ប្រេងសាំង ប្រេងម៉ាស៊ូត សិប្បកម្មដែក និងជួសជុលរថយន្ត មានម្ចាស់ផ្ទះ ឈ្មោះ សួន សារិទ្ធ ហៅ តឿ ភេទប្រុស អាយុ ៤៩ឆ្នាំ។ ម្ចាស់ផ្ទះនេះ រងរបួសដោយសារភ្លើងឆេះរលាក បញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុ។ ចំណែកម្ចាស់ផ្ទះ ដែលរងការខូចខាត ៤ផ្ទះទៀត រួមមាន ១.ហួត សារ៉ន ភេទប្រុស អាយុ ៣៥ ឆ្នាំ មុខរបរជាងជួសជុលរថយន្ត និងសិប្បកម្មដែក។ ២. សារិទ្ធ អាយុ ៣៨ឆ្នាំ មុខរបរជាងជួសជុលម៉ូតូ។ ៣.កៅ យុទ្ធីយ៉ា ភេទប្រុស អាយុ ២៨ឆ្នាំ មុខរបរលក់ទូរស័ព្ទ (ខូចខាតទាំងស្រុង)។ ៤. កៅ ឡាដា ភេទស្រី អាយុ ៣០ឆ្នាំ មុខរបរលក់កាហ្វេ (ខូចខាតទាំងស្រុង)។
គ្រោះអគ្គិភ័យនេះ បណ្តាលឲ្យឆេះខូចខាតរថយន្ត ចំនួន ០២គ្រឿង រួមមាន រថយន្ត ម៉ាក់លុចស៊ីស RX 330 ខូចខាតទាំងស្រុង និង Hyundai ចំណុះ ១តោន ឆេះរោលមួយចំហៀង។ ក្រៅពីនោះ ក៏ខូចខាតម៉ូតូ ចំនួន ១៧គ្រឿង។ ក្នុងនោះ តូបលក់ទូរស័ព្ទ និងតូបលក់កាហ្វេ ដែលនៅជាប់នោះ ត្រូវឆេះខូចខាតសម្ភារៈទាំងស្រុង។
លោក ឆាយ សុគន្ធដា អភិបាលស្រុកស្ទឹងហាវ បានឲ្យដឹងថា ក្នុងប្រតិបត្តិការជួយអន្តរាគមន៍ ក្នុងករណីអគ្គិភ័យនេះ បានប្រើប្រាស់រថយន្តពន្លត់អគ្គិភ័យ សរុបចំនួន ១២គ្រឿង ប្រើប្រាស់ទឹកអស់២៥ ស៊ីទែន៕ រស់ ភីណា
ចែករំលែកព័តមាននេះ