ខេត្តបន្ទាយមានជ័យ ៖ ជនសង្ស័យម្នាក់បានធ្វើសកម្មភាពចូលលួចលុយក្នុងផ្ទះ តែត្រូវម្ចាស់ផ្ទះ និងពលរដ្ឋជិតខាងដឹងទាន់ ក៏នាំគ្នាចាប់បានរួចប្រដៅយ៉ាងចាស់ដៃតែម្តង បណ្តាលជនសង្ស័យរូបនេះរងរបួសលើផ្ទៃមុខ និងបែកច្រមុះប្រហែល០៣ថ្នេរផងដែរ បើកុំតែនគរបាលចុះទៅទាន់ មិនដឹងថា…
ខេត្តបន្ទាយមានជ័យ ៖ ជនសង្ស័យម្នាក់បានធ្វើសកម្មភាពចូលលួចលុយក្នុងផ្ទះ តែត្រូវម្ចាស់ផ្ទះ និងពលរដ្ឋជិតខាងដឹងទាន់ ក៏នាំគ្នាចាប់បានរួចប្រដៅយ៉ាងចាស់ដៃតែម្តង បណ្តាលជនសង្ស័យរូបនេះរងរបួសលើផ្ទៃមុខ និងបែកច្រមុះប្រហែល០៣ថ្នេរផងដែរ បើកុំតែនគរបាលចុះទៅទាន់ មិនដឹងថា ជនសង្ស័យរូបនេះនឹងក្លាយជាយ៉ាងណានោះ ហេតុការណ៍នេះបានកើតឡើងកាលពីវេលាម៉ោង៨និង៥០នាទីយប់ ថ្ងៃទី០២ ខែធ្នូ ឆ្នាំ២០២០ នៅចំណុចផ្សារពីរជាន់បឹងត្រកួន (កំពង់សាងសង់) ស្ថិតក្នុងភូមិបន្ទាយមានរិទ្ធ ឃុំគោករមៀត ស្រុកថ្មពួក។
បើតាមអធិការនគរបាលស្រុកថ្មពួក លោកវរសេនីយ៍ទោ ឈឿន គឹមឈុន បានឲ្យដឹងថា នៅវេលាម៉ោង៨និង៥០នាទីយប់ថ្ងៃទី០២ ខែធ្នូនេះមានពលរដ្ឋឈ្មោះ មាន ចាន់ថន ភេទប្រុស អាយុ43ឆ្នាំ រស់នៅភូមិត្រពាំងសំរោង ឃុំគោករមៀត ស្រុកថ្មពួក បានរាយការណ៍ទៅនគរបាលប៉ុស្តិ៍រដ្ឋបាលឃុំគោករមៀតថា មានករណីប្រជាពលរដ្ឋចាប់បានចោរចូលលួចលុយនៅក្នុងផ្ទះរបស់ម្ចាស់ឈ្មោះ ប្រាក់ ថង ភេទស្រី អាយុ 60ឆ្នាំ នៅចំណុចផ្សារពីរជាន់បឹងត្រកួន (កំពង់សាងសង់) ក្នុងភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកអធិការនគរបាលស្រុកថ្មពួកបន្តថា ក្រោយពីទទួលបានព័ត៌មានភ្លាមៗនោះ កម្លាំងប៉ុស្តិ៍បានចុះទៅដល់កន្លែងកើតហេតុ ក៏បានឃើញប្រជាពលរដ្ឋចាប់ជនសង្ស័យឈ្មោះ ផ្លាយ សុផ្លា ភេទប្រុស អាយុ30ឆ្នាំ រស់នៅភូមិគោកព្រេច ឃុំគោករមៀត ស្រុកថ្មពួក និងនាំខ្លួនជនសង្ស័យមកកាន់ប៉ុស្តិ៍រដ្ឋបាលឃុំគោករមៀង ដើម្បីធ្វើសាកសួរតែម្តង។
លោកអធិកាបានបញ្ជាក់ថា នៅចំពោះមុខសមត្ថកិច្ចជនសង្ស័យបានសារភាពថា «ខ្លួនគេពិតជាបានចូលលួចយកលុយរបស់ម្ចាស់ផ្ទះខាងលើនោះពិតប្រាកដមែន»។ ម្យ៉ាងវិញទៀត នៅពេលដែលនគរបាលចុះទៅដល់ន្លែងនោះ ឃើញមានវត្ថុតាងលុយថៃដែលជនសង្ស័យលួចបានចំនួន4,840បាត (បួនពាន់ប្រាំបីរយសែសិបបាត) និងលុយខ្មែរចំនួន150,000រៀល (ដប់ប្រាំម៉ឺនរៀល)។
ក្រោយមកលុយទាំងអស់នោះត្រូវបានប្រគល់ជូនម្ចាស់ដើមវិញហើយ ។ ចំណែកជនសង្ស័យក៏បញ្ជូននាំទៅព្យាបាល រួចបញ្ជូនមកអធិការដ្ឋាននគរបាលស្រុកថ្មពួក ដើម្បីរៀបចំសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនី តិវិធីច្បាប់៕
ចែករំលែកព័តមាននេះ