រាជធានីភ្នំពេញ ៖ មហាជនធ្លាប់ដឹងហើយពីវត្តមានរបស់អតីតតារាចម្រៀងលោក ឆោម ប៊ុនយ៉ុង គ្រងស្បង់ចីវរបួសជាព្រះសង្ឃ ប៉ុន្តែអស់រយៈពេលប្រមាណជិត១០ឆ្នាំនេះ ក៏ភិក្ខុ ប៊ុនយ៉ុង កំពុងតែស្ថិតក្នុងភេទជាបព្វជិតដដែល…
រាជធានីភ្នំពេញ ៖ មហាជនធ្លាប់ដឹងហើយពីវត្តមានរបស់អតីតតារាចម្រៀងលោក ឆោម ប៊ុនយ៉ុង គ្រងស្បង់ចីវរបួសជាព្រះសង្ឃ ប៉ុន្តែអស់រយៈពេលប្រមាណជិត១០ឆ្នាំនេះ ក៏ភិក្ខុ ប៊ុនយ៉ុង កំពុងតែស្ថិតក្នុងភេទជាបព្វជិតដដែល ។
ភិក្ខុ ឆោម ប៊ុនយ៉ុង គង់នៅក្នុងជីវភាពសាមញ្ញបំផុត ក្នុងទីសេនាសនៈកម្សត់មួយកន្លែង ស្ថិតនៅបរិវេណ វត្តកោះមេត្តាពោធិវង្ស ភូមិកោះអណ្ដែត សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ ។
បច្ចុប្បន្នព្រះតេជគុណ ឆោម ប៊ុនយ៉ុង នៅមិនទាន់បានបង្ហាញជំហរជាថ្មីថា នឹងសឹកមកជាគ្រហស្ថ និងចាប់អាជីពសិល្បៈវិញទេ គឺនៅបន្តជីវិតជាព្រះសង្ឃបន្តទៅទៀត ។ ក្នុងនាមជាព្រះសង្ឃក្តី ព្រះតេជគុណ ឆោម ប៊ុនយ៉ុង នៅតែនឹករឭកដល់មិត្តសិល្បករទាំងអស់ ដែលរួមជំនាន់ជាមួយគ្នា ហើយព្រះអង្គស្វាគមន៍ ចំពោះមិត្តភក្តិ ដែលមានបំណងទៅសួរសុខទុក្ខគ្រប់ពេល ។
នាថ្ងៃម្សិលមិញនេះ ទី១៩ ខែវិច្ឆិកា ឆ្នាំ២០២០ អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ ក៏បានទៅសួរសុខទុក្ខ ព្រះតេជគុណ ឆោម ប៊ុនយ៉ុង ហើយជូនបច្ច័យ និងទេយ្យទានផងដែរ ។
កោះសន្តិភាពសូមរម្លឹកត្រួសៗជូនទស្សនិកជនអោយដឹងថា ពីមុនលោក ឆោម ប៊ុនយ៉ុង ជាអ្នកចម្រៀងមានរាងខ្ពស់សង្ហា និងច្រៀងពីរោះ ។ លោកបានចូលប្រឡូកក្នុងពិភពសិល្បៈ នាឆ្នាំ១៩៩៧ ដោយដំបូងច្រៀង នៅភោជនីយដ្ឋាន និងរង្គសាលក្នុងរាជធានីភ្នំពេញ ។ បន្ទាប់មកដោយសារលោកមានទឹកដមសម្លេងពីរោះ ត្រូវផលិតកម្មនៅក្នុង និងក្រៅប្រទេស ហៅឱ្យចូលរួមថតសម្លេងចូលស៊ីឌី និងសម្តែងកាយវិការខារ៉ាអូខេ ។
ម្តងម្កាលលោកតែងតែមានឱកាស បានឡើងច្រៀងជាកិត្តិយស នៅលើឆាកប្រគំតន្ត្រីចុងសប្តាហ៍ តាមស្ថានីយទូរទស្សន៍ ។ រហូតដល់ឆ្នាំ២០០៤ លោកមានកេរ្តិ៍ឈ្មោះល្បីគួរសម ។ ដោយសារមានកេរ្តិ៍ឈ្មោះល្បី លោកឆោម ប៊ុនយ៉ុង ធ្លាប់ចេញទៅសម្តែងនៅសហរដ្ឋអាមេរិក បារាំង អូស្ត្រាលី និងស្វ៊ីស ។ ក្រៅពីទទួលជោគជ័យក្នុងអាជីពសិល្បៈ សម្តែងនិងច្រៀង លោកបានបើកផលិតកម្មផ្ទាល់ខ្លួនមួយដោយដាក់ឈ្មោះរបស់លោក តែផលិតកម្មនោះមិនសូវដំណើរការទេ ។ លោកឆោម ប៊ុនយ៉ុង ថ្វីបើទទួលជោគជ័យនឹងការងារសិល្បៈ ហើយធ្លាប់បួសសងគុណម្តាយនាឆ្នាំ២០០៦ទៀតផង ។ ផ្ទុយទៅវិញលោកបានបរាជ័យរឿងស្នេហា ច្រើនដង ។
អ្នកចម្រៀងរូបនេះ បានបាត់មុខពីពិភពសិល្បៈ លើកទី១ ចាប់ពីឆ្នាំ២០០៨ ប៉ុន្តែដោយសារនិស្ស័យសិល្បៈ នៅដិតជាប់ខ្លួននោះ ចូលដល់ឆ្នាំ២០១១ លោកបានវិលចូលប្រឡូកសាជាថ្មី ដោយច្រៀងជាប្រចាំ នៅក្នុងភោជនីយដ្ឋានមជ្ឈមណ្ឌលកម្សាន្តមហាសាលខាងកើតវត្តភ្នំ និងម្តងម្កាលលោកឡើងច្រៀងជាកិត្តិយសក្នុងកម្មវិធីប្រគំតន្ត្រីតាមស្ថានីយទូរទស្សន៍ ព្រមទាំងច្រៀង និងសម្តែងកាយវិការឱ្យផលិតកម្មនៅក្រៅប្រទេស ។
អំឡុងចុងឆ្នាំ២០១២ បន្ទាប់ពីបានជួបរឿងស្នេហាមិនសមប្រកបទៀត និងរឿងរ៉ាវអាប់អួនៅក្នុងជីវិតមួយចំនួន លោក ឆោម ប៊ុនយ៉ុង បានសាងផ្នួសនៅវត្តព្រះធម៌លង្កាសុធារាម នៅខេត្តកំពង់ចាម រហូតមកដល់បច្ចុប្បន្ននេះ ព្រះតេជគុណ មកគង់នៅវត្តកោះមេត្តាពោធិវង្ស ៕
ចែករំលែកព័តមាននេះ