ភូមិបាក់ព្រា គឺជាភូមិមួយនៅក្នុងឃុំកោះជីវាំង ស្រុកឯកភ្នំ ខេត្តបាត់ដំបង ជាភូមិចុងកាត់មាត់ញក ស្ថិតនៅលើផ្លូវទឹក ទៅកាន់ពាមទន្លេសាប ប្រកបដោយទេសភាពស្រងេះ
ភូមិបាក់ព្រា គឺជាភូមិមួយនៅក្នុងឃុំកោះជីវាំង ស្រុកឯកភ្នំ ខេត្តបាត់ដំបង ជាភូមិចុងកាត់មាត់ញក ស្ថិតនៅលើផ្លូវទឹក ទៅកាន់ពាមទន្លេសាប ប្រកបដោយទេសភាពស្រងេះស្រងោចខ្លោចផ្សាពន់ប្រមាណ ។
កាលពីសម័យសង្គមរាស្ត្រនិយម មានទូកដខ្លះ ដឹកអ្នកដំណើរតាំងពីភូមិព្រែកហ្លួង រហូតទៅដល់ភូមិបាក់ព្រា តែក្រោយមកទើបមានទូកបំពាក់មា៉ស៊ីន ឬកាណូតចុះឡើងរហូតទៅដល់ព្រែកទាល់ទន្លេសាប ។
លោកគង្គ ប៊ុនឈឿន អ្នកនិព្ធបទ «កូនស្រីអ្នកនេសាទ» លើកឡើងថា កាលនៅរៀនពីក្មេង លោកបានទៅលេងភ្លេងក្នុងពិធីបុណ្យផ្កាប្រាក់នៅភូមិបាក់ព្រា ហើយបានជាប់ចិត្តនឹងបុប្ផាមួយទងដែលជាកូនស្រីអ្នកនេសាទ ទើបចាប់ផ្តើមកត់ត្រាទុកក្នុងបេះដូង នូវបទចម្រៀងមួយដើម្បីឧទ្ទិសដល់បេះដូងស្រគត់ស្រគំនៃក្រមុំស្រុកទន្លេ ដែលរស់នៅឃ្លាតឆ្ងាយពីអរិយធម៌នៃអ្នកដីគោក ។
កាលណោះបទភ្លេង របស់បទ «កូនស្រីអ្នកនេសាទ» លោកគង្គ ប៊ុនឈឿន គ្រាន់តែបានកត់ត្រាទុកនៅក្នុងសៀវភៅកំណត់ហេតុប៉ុណ្ណោះ លុះមកដល់១៩៧៤ ទើបលោករៀបចំតាក់តែងទំនុកច្រៀងឡើងវិញ ហើយថតផ្សាយនៅពេលនោះ ។ បទ «កូនស្រីអ្នកនេសាទ» បានធ្វើឱ្យភ្ញាក់ផ្អើលដល់អ្នកស្រុកដែលរស់នៅតំបន់នោះជាខ្លាំង មិនតែប៉ុណ្ណោះវាក្លាយទៅជានិមិត្តរូបនៃខ្សែជីវិត ពិតៗរបស់កុលាបបាក់ព្រា ដែលលោកគង្គ ប៊ុនឈឿន បានពណ៌នានៅក្នុងរឿងប្រលោមលោករឿង «កូនស្រីអ្នកនេសាទ» ។
អ្នកស្រីរស់ សេរីសុទ្ធា ដែលអ្នកផងតែងតែប្រសិទ្ធនាមថា «ព្រលឹងស្ទឹងខៀវ» បាននិយាយប្រាប់លោកគង្គ ប៊ុនឈឿន នៅពេលថតបទ«កូនស្រីអ្នកនេសាទ» ចប់ថា អ្នកស្រីច្រៀងបទនេះដោយចិត្តរំភើបញាប់ញ័រពន់ពេកណាស់ ដោយសារអតីតកាលរបស់អ្នកស្រីធ្លាប់រស់នៅតំបន់នោះ និងធ្លាប់មានបេះដូងប្រេះឆាដូចជាបុប្ផាបាក់ព្រាដែរ ។
«កូនស្រីអ្នកនេសាទ» ជាបទចម្រៀងមួយដែលលោកគង្គ ប៊ុនឈឿន បានពណ៌នាប្លែកពីគេ គឺបរិយាយពីស្នេហាព្រាត់ប្រាសនៅលើភូមិឋានមួយ មើលទៅឃើញតែលំហទឹកល្ហាចល្ហឹម ប្រៀបបីដូចជាទន្លេទឹកភ្នែករបស់នារី ដែលមានបេះដូងបរិសុទ្ធចំពោះគូសង្សារ តែគ្មានអ្នកណាមើលឃើញនូវសេចក្តីស្មោះត្រង់របស់នាងឡើយ ។
បទ «កូនស្រីអ្នកនេសាទ» អ្នកដែលមិនដឹងចេះតែនាំគ្នាហៅថា «វាសនាភូមិបាក់ព្រា» ការណ៍ពិតគឺបទ «កូនស្រីអ្នកនេសាទ» ។ នេះបើតាមការបញ្ជាក់របស់លោកគង្គ ប៊ុនឈឿន ។
បទ «កូនស្រីអ្នកនេសាទ» និពន្ធបទភ្លេង និងទំនុកច្រៀងដោយលោកគង្គ ប៊ុនឈឿន សម្រួលតន្ត្រីដោយលោក មែរ ប៊ុន និងច្រៀងដោយអ្នកស្រីរស់ សេរីសុទ្ធា ។ បទនេះបានរាយទំនុកថា ៖
១-ឱភូមិបាក់ព្រានាពេលសុរិយារៀបលិច រលក ព្រិចៗ រំលេចពណ៌ព្រំសុវណ្ណ ពពករសាត់ កាត់មេឃនាពេលសាយណ្ហ ឯនាយផ្គរលានលាន់ឮសែនឆ្ងាយស្រណោះ ។
២-ភូមិអ្នកនេសាទអណ្តែតលើផ្ទៃជលសា ជំនោរសីហាកត់ត្រារឿងដើមទាំងអស់ កាលបងនិងអូនសាងក្បូនស្នេហាយា៉ងស្មោះ ឥឡូវរូបប្រុសបោះបង់ចោលអូនឯកា ។
បន្ទរ ៖ ធ្វើម៉េចរូបអូនជាកូនស្រីអ្នកនេសាទជាផ្កាមិនស្អាតប្រឡាក់ជាប់ក្លិនមច្ឆា បងស្គាល់ជាតិហើយបោះផ្កាចោលក្នុងជលសា នេះហើយវាសនាបុប្ផានៅភូមិបាក់ព្រា ។
៣-បាក់ព្រាព្រែកទ្រព្យបង្កប់រឿងស្នេហ៍អ្នកក្រ ដូចព្រាហ្មណ៍កេសរត្រូវប្តីយកទៅប្រហារ ចាំតាំងពីប្រាំងរហូតដល់ខែវស្សា ក៏ប្រុសស្នេហាមិនឃើញយាត្រាវិលវិញ ៕
ចែករំលែកព័តមាននេះ