Man City នៅតែមានមហិច្ឆតាឆក់យក Lionel Messi នៅរដូវកាលក្រោយ
អេស្ប៉ាញ ៖ យោងតាមកាសែត Marca របស់ប្រទេសអេស្ប៉ាញបានឱ្យដឹងថាក្លិប Manchester City នៅតែបង្ហាញពីមហិច្ឆតារបស់ខ្លួន ក្នុងការចុះហត្ថលេខាលើខ្សែប្រយុទ្ធ Lionel…
អេស្ប៉ាញ ៖ យោងតាមកាសែត Marca របស់ប្រទេសអេស្ប៉ាញបានឱ្យដឹងថាក្លិប Manchester City នៅតែបង្ហាញពីមហិច្ឆតារបស់ខ្លួន ក្នុងការចុះហត្ថលេខាលើខ្សែប្រយុទ្ធ Lionel Messi របស់ក្រុម Barcelona។
ខ្សែប្រយុទ្ធអាហ្សង់ទីនវ័យ ៣៣ឆ្នាំខាងលើ បានប្រកាសជាផ្លូវការរួចមកហើយកាលពីខែសីហា អំពីជំហររបស់ខ្លូនក្នុងការលេងឱ្យ Barca មួយរដូវកាលទៀត ពោលគឺនៅពេលកុងត្រារបស់គេជាមួយក្លិបនឹងផុតនៅចុងខែមិថុនា ឆ្នាំ២០២១។
ជម្លោះរវាង Messi និង Barca បានធ្វើឱ្យមានការភ្ញាក់ផ្អើលយ៉ាងនៅលើសារព័ត៌មាននៅជុំវិញពិភពលោក បន្ទាប់ពីរូបគេមានចេតនាចង់ចាកចេញ នៅទីផ្សារដោះដូរកីឡាកររដូវក្តៅនេះ ដែលទើបតែបិទទ្វារកាលពីថ្ងៃទី៥ ខែតុលាកន្លងទៅ។
ដំណឹងនៃការចាកចេញរបស់ Messi ត្រូវបានផ្សារភ្ជាប់យ៉ាងខ្លាំងជាមួយក្លិប Man City ដែលជាទីកន្លែងអតីតគ្រូចាស់របស់គេគឺលោក Pep Guardiola កំពុងដឹកនាំ។ ប៉ុន្តែដោយសារតែនៅសល់កុងត្រាជាមួយ Barca ទើបបណ្តាលឱ្យរូបគេ មិនអាចចាកចេញពីក្លិបបាននៅរដូវក្តៅនេះ ប្រសិនបើ Man City គ្មានប្រាក់ ៧០០លានអឺរ៉ូសម្រាប់ដំណើរការនៃការផ្ទេរនេះ។
ដោយឡែកលោក Omar Berrada ប្រធានផ្នែកប្រតិបត្តិក្លិប Man City ថ្មីៗនេះ បានឆ្លើយឆ្លងជាមួយសារព័ត៌មាន The Athletic ហើយបានផ្តល់ការធានាថា Man City នៅតែមិនបានភ្លេចអំពីខ្សែប្រយុទ្ធរបស់ក្រុម Barca រូបនេះទេ។
លោកបានថ្លែងយ៉ាងដូច្នេះថា «ប្រសិនបើ Messi ចាកចេញពី Barcelona ហើយការចរចាទទួលបានភ្លើងខៀវ នោះពួកយើងនឹងស្វែងរកជម្រើសក្នុងដំណើរនៃការចរចានោះ។ គេគឺជាកីឡាករឆ្នើមបំផុតនៅលើពិភពលោក។ ខ្ញុំគិតថាក្លិបកំពូលៗជាច្រើន ក៏ចង់បានរូបគេផងដែរ»។
លោកបានបន្ថែមទៀតថា« វាពិតជាពិបាកនឹងស្មានណាស់ថា នឹងអាចមានរឿងអ្វីកើតឡើង នៅទីផ្សារដោះកីឡាកររដូវក្តៅក្រោយ។ ដូច្នេះពួកយើងត្រូវតែត្រៀមខ្លួន។ ប៉ុន្តែក្នុងពេលតែមួយនេះ ខ្ញុំគិតថាយើងមានធនធាន និងសមត្ថភាពគ្រប់គ្រាន់ដើម្បីធ្វើការវិនិយោគនៅពេលដែលចាំបាច់»៕
ចែករំលែកព័តមាននេះ